ಏಪ್ರಿಲ್‌ 7ರಿಂದ ದೆಹಲಿಯಲ್ಲಿ ಕನ್ನಡ ಭಾಷಿಕರ ಸಮ್ಮೇಳನ

ಬೆಂಗಳೂರು : ಕನ್ನಡ ಭಾಷಿಕರ 18ನೇ ರಾಷ್ಟ್ರೀಯ ಸಮ್ಮೇಳನ ಏಪ್ರಿಲ್‌ 7 ಮತ್ತು 8ರಂದು ನವದೆಹಲಿಯಲ್ಲಿ ನಡೆಯಲಿದೆ.

ದೆಹಲಿಯಲ್ಲಿ ಪ್ರಕಟವಾಗುವ ‘ದೆಹಲಿ ಕನ್ನಡಿಗ’ ಮಾಸಿಕ ಆಯೋಜಿಸಿರುವ ಈ ಸಮ್ಮೇಳನವನ್ನು ರಾಜ್ಯ ವೈದ್ಯಕೀಯ ಶಿಕ್ಷಣ ಸಚಿವೆ ನಫೀಸಾ ಫಸಲ್‌ ಉದ್ಘಾಟಿಸಲಿದ್ದಾರೆ. ಇಂದಿರಾಗಾಂಧಿ ರಾಷ್ಟ್ರೀಯ ಕಲಾ ಕೇಂದ್ರದ ಎನ್‌.ಆರ್‌.ಶೆಟ್ಟಿ ಸಮಾರಂಭದ ಅಧ್ಯಕ್ಷತೆ ವಹಿಸಲಿದ್ದಾರೆ. ಕೇಂದ್ರ ಜಾಗೃತಿ ಇಲಾಖಾ ಆಯುಕ್ತ ಎನ್‌.ವಿಠ್ಠಲ್‌ ಸ್ಮರಣಸಂಚಿಕೆ ಬಿಡುಗಡೆ ಮಾಡಲಿದ್ದಾರೆ. ಕರ್ನಾಟಕ ಸಾಂಸ್ಕೃತಿಕ ಹಬ್ಬವನ್ನು ಬೆಂಗಳೂರು ಮೇಯರ್‌ ಪ್ರೇಮಾ ಕಾರ್ಯಪ್ಪ ಉದ್ಘಾಟಿಸುವರು.

ಸಮ್ಮೇಳನದ ಸಂಚಾಲಕ ಎಂ.ಬಿ.ಸಾಮಗ ಮಾಧ್ಯಮಗಳಿಗೆ ಹೊರಡಿಸಿರುವ ಪ್ರಕಟಣೆಯಲ್ಲಿ ಈ ವಿಷಯ ತಿಳಿಸಿದ್ದಾರೆ. ಚೆನ್ನೈನ ಐಜಿಟಿಯ ಮಾಜಿ ನಿರ್ದೇಶಕ ಪ್ರೊ.ಪಿ.ವಿ.ಇಂದಿರೇಶನ್‌, ಜವಾಹರಲಾಲ್‌ ನೆಹರು ವಿಶ್ವವಿದ್ಯಾಲಯದ ಪ್ರೊಫೆಸರ್‌ ಡಾ.ಎ.ಆರ್‌.ರಮೇಶ ರಾವ್‌, ಸಿಂಡಿಕೇಟ್‌ ಬ್ಯಾಂಕಿನ ಕಾರ್ಯ ನಿರ್ವಾಹಕ ನಿರ್ದೇಶಕ ಹಾಗೂ ಅಧ್ಯಕ್ಷ ಡಿ.ಟಿ.ಪೈ ಅವರಿಗೆ ಕ್ರಮವಾಗಿ ಉತ್ತಮ ಹೊರನಾಡ ಕನ್ನಡಿಗ, ಉತ್ತಮ ದೆಹಲಿ ಕನ್ನಡಿಗ ಹಾಗೂ ಉತ್ತಮ ಬ್ಯಾಂಕರ್‌ ಪ್ರಶಸ್ತಿಗಳನ್ನು ಸಮ್ಮೇಳನದಲ್ಲಿ ಪ್ರದಾನ ಮಾಡಲಾಗುವುದು.

ಸುಮಾರು 2 ಸಾವಿರಕ್ಕೂ ಹೆಚ್ಚು ಮಂದಿ ಭಾಗವಹಿಸಲಿರುವ ಈ ಸಮ್ಮೇಳನದಲ್ಲಿ ಕನ್ನಡ ಭಾಷೆ, ಸಾಹಿತ್ಯ ಹಾಗೂ ಸಂಸ್ಕೃತಿ ಬಗ್ಗೆ ಚರ್ಚೆ ಮಾಡಲಾಗುವುದು. ಮಹಿಳಾ ಕೂಟ, ಭಾಷೈಕ್ಯತೆ, ಸಂಗೀತ, ನೃತ್ಯ, ಕವಿ ಗೋಷ್ಠಿ ಇವೆಲ್ಲಾ ಸಮ್ಮೇಳನದ ಆಕರ್ಷಣೆಗಳು.

(ಯುಎನ್‌ಐ)