ಧಗೆಯಾಡನೆ ಬೇನೆ, ಕಾಲರಾ ಹರಡುತ್ತಿರುವ ಸುಡು ಬೇಸಗೆ

ಬೆಂಗಳೂರು : ಕಲುಷಿತ ನೀರಿನಿಂದಾಗಿ ಈವರೆಗೆ ಕರಳುಬೇನೆಗೆ ತುತ್ತಾಗಿರುವ ಬೆಂಗಳೂರಿಗರ ಸಂಖ್ಯೆ 440. ಬೇಸಿಗೆ ಮುಗಿಯಲು ಇನ್ನೂ 2 ತಿಂಗಳಿದ್ದು ಈ ಸಂಖ್ಯೆ ಇನ್ನೂ ಎಷ್ಟಕ್ಕೇರುತ್ತದೋ ಎಂಬ ಆತಂಕ ಐಸೋಲೇಷನ್‌ ಆಸ್ಪತ್ರೆಯ ವೈದ್ಯರದು.

ಪ್ರಸ್ತುತ ಬೆಂಗಳೂರಿನಲ್ಲಿ ಪರಿಸ್ಥಿತಿಯೇನೋ ಸುಧಾರಿಸಿದೆ. ಆದರೆ ನಗರ ಜಿಲ್ಲೆಯ ಕನಕಪುರವೊಂದರಲ್ಲೇ ಕಳೆದ ಭಾನುವಾರದಿಂದ ಈವರೆಗೆ 15 ಮಂದಿ ಕರಳುಬೇನೆ ಬಾಧೆಗೊಳಗಾಗಿದ್ದಾರೆ. ಸ್ಥಳೀಯ ಆಸ್ಪತ್ರೆಗೆ ದಾಖಲಾಗಿದ್ದ ಇವರ ಪೈಕಿ 4 ಮಂದಿಯ ಸ್ಥಿತಿ ತೀರಾ ಗಂಭೀರವಾಗಿತ್ತು. ಆ ಕಾರಣ ನಮ್ಮ ಆಸ್ಪತ್ರೆಗೆ ಬಂದು ಸೇರಿದರು. ಈಗ ಅವರು ಚೇತರಿಸಿಕೊಂಡಿದ್ದಾರೆ ಎಂದು ಐಸೋಲೇಷನ್‌ ಆಸ್ಪತ್ರೆಯ ವೈದ್ಯರು ತಿಳಿಸಿದ್ದಾರೆ.

ಸದ್ಯಕ್ಕೆ ಬೆಂಗಳೂರಿನ 22 ಮಂದಿ ಒಳರೋಗಿಗಳಾಗಿ ಚಿಕಿತ್ಸೆ ಪಡೆಯುತ್ತಿದ್ದು, ಪರಿಸ್ಥಿತಿ ತಹಬಂದಿಗೆ ಬಂದಿದೆ. ಆದರೆ ಜಿಲ್ಲೆಯ ವಿವಿಧೆಡೆಯಲ್ಲೂ ಕಾಲರಾ, ಕರಳುಬೇನೆ ಹರಡುತ್ತಿದ್ದು ಇದನ್ನು ತಡೆಗಟ್ಟಲು ಕ್ಷಿಪ್ರ ಕ್ರಮ ಕೈಗೊಳ್ಳುವುದು ಸೂಕ್ತ ಎಂದು ವೈದ್ಯರು ಸಲಹೆ ಇತ್ತಿದ್ದಾರೆ.

(ಇನ್ಫೋ ವಾರ್ತೆ)