ಅಮೆರಿಕಾದ ಸಿಲಿಕಾನ್‌ ವ್ಯಾಲಿ ರೂಪದಲ್ಲಿ 5 ವರ್ಷದಲ್ಲಿ ಬೆಂಗಳೂರು

ಬೆಂಗಳೂರು : ಮುಂದಿನ ಐದು ವರ್ಷಗಳಲ್ಲಿ ಅಮೆರಿಕಾದ ಸಿಲಿಕಾನ್‌ ವ್ಯಾಲಿ ಮಾದರಿಯಲ್ಲಿ ಬೆಂಗಳೂರು ಹೊರ ಹೊಮ್ಮುವ ವಿಶ್ವಾಸವನ್ನು ಅಮೆರಿಕೆಯ ಟೆಕ್‌ಮಾರ್ಕ್‌ನ ಗೋಡೊನ್‌ ಕ್ಯಾಂಬೆಲ್‌ ವ್ಯಕ್ತಪಡಿಸಿದ್ದಾರೆ.

ಚಿಪ್‌ ವಿನ್ಯಾಸದಲ್ಲಿ ಬೆಂಗಳೂರು ಜಾಗತಿಕ ಹಿರೇಮಣಿಯಾಗಿ ಬೆಳೆದಿದೆ. ಅದು ಇನ್ನೈದು ವರ್ಷಗಳಲ್ಲಿ ಸಿಲಿಕಾನ್‌ ವ್ಯಾಲಿಯಾಗಿ ಹೊರಹೊಮ್ಮುವುದು ಖಚಿತ ಎಂದು ಕ್ಯಾಂಬೆಲ್‌ ಹೇಳಿದರು. ಅವರು ಸೋಮವಾರ ನಡೆದ ಕರ್ನಾಟಕ ಸರ್ಕಾರ ಹಾಗೂ ಯುನಿಟ್‌ ಟ್ರಸ್ಟ್‌ ಆಫ್‌ ಇಂಡಿಯಾ ಒಡಂಬಡಿಕೆ ಪತ್ರಕ್ಕೆ ಸಹಿ ಹಾಕಿದ ಸಂದರ್ಭದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡುತ್ತಿದ್ದರು.

ಅಮೆರಿಕೆಯಲ್ಲಿ ಮೂಲಭೂತ ಅಗತ್ಯಗಳನ್ನು ಕಲ್ಪಿಸಲು ಅಲ್ಲಿನ ಸರ್ಕಾರ ನಿಧಿ ಒದಗಿಸಿತ್ತು . ಅದೇ ಮಾದರಿಯಲ್ಲಿ ಭಾರತದಲ್ಲಿ ಮೂಲಭೂತ ಅಗತ್ಯಗಳನ್ನು ಕಲ್ಪಿಸುವಲ್ಲಿ ಹಣಕಾಸಿನ ಅಗತ್ಯವಿದೆ. ಬೆಂಗಳೂರು ಸಿಲಿಕಾನ್‌ ವ್ಯಾಲಿಯಾಗಿ ಬೆಳೆಯುವಲ್ಲಿಯೂ ಮೂಲಭೂತ ಅಗತ್ಯಗಳ ಸ್ವರೂಪ ಮತ್ತಷ್ಟು ಉತ್ತಮಗೊಳ್ಳಬೇಕಾದ ಅಗತ್ಯವಿದೆ. ಈ ವಿಷಯವನ್ನು ಸವಾಲಾಗಿ ಪರಿಗಣಿಸಬೇಕಾದ ಅಗತ್ಯವಿದೆ ಎಂದು ಕ್ಯಾಂಬೆಲ್‌ ಹೇಳಿದರು.

(ಯುಎನ್‌ಐ)