16 ಗಂಟೆ ಅವಧಿಯಲ್ಲಿ ಎರಡು ರಸ್ತೆ ಅಪಘಾತ -ಹತ್ತು ಮಂದಿ ಬಲಿ

ಬೆಂಗಳೂರು : ಕಳೆದ ಹದಿನಾರು ಗಂಟೆಗಳಲ್ಲಿ ನಡೆದ ಎರಡು ಪ್ರತ್ಯೇಕ ರಸ್ತೆ ಅಪಘಾತಗಳಲ್ಲಿ ಐದು ಮಂದಿ ಮೃತಪಟ್ಟಿದ್ದು ಹದಿನಾರು ಮಂದಿ ಗಾಯಗೊಂಡಿದ್ದಾರೆ.

ಚಿತ್ರದುರ್ಗದಿಂದ 25 ಕಿ.ಮೀ. ದೂರದ ಚಳ್ಳಕೆರೆಯಲ್ಲಿ ಟ್ರಾಕ್ಟರ್‌ ಪಲ್ಟಿಯಾಗಿ ಐದು ಮಂದಿ ಸ್ಥಳದಲ್ಲಿಯೇ ತೀರಿಕೊಂಡಿದ್ದು ಗಾಯಗೊಂಡ ಹದಿನಾರು ಮಂದಿಯನ್ನು ಚಿತ್ರದುರ್ಗತದ ಜಿಲ್ಲಾ ಆಸ್ಪತ್ರೆಗೆ ಸೇರಿಸಲಾಗಿದೆ. ಅಪಘಾತಕ್ಕೆ ಕಾರಣನಾದ ಟ್ರಾಕ್ಟರ್‌ ಚಾಲಕ ಓಡಿ ಹೋಗಿದ್ದು, ಪೊಲೀಸರು ಆತನಿಗಾಗಿ ಹುಡುಕುತ್ತಿದ್ದಾರೆ ಎಂದು ಜಿಲ್ಲಾ ಪೊಲೀಸ್‌ ಅಧೀಕ್ಷಕ ಎಂ.ಎಂ. ಗೋಕಾಕ್‌ ಹೇಳಿದ್ದಾರೆ.

ತುಮಕೂರಿನ ಕೋರಾ ಚೆಕ್‌ಪೋಸ್ಟ್‌ನ ಬಳಿ ನಡೆದ ಎರಡು ಲಾರಿಗಳ ಮುಖಾಮುಖಿಯಲ್ಲಿ ಐದು ಮಂದಿ ಸತ್ತಿರುವುದಾಗಿ ತುಮಕೂರು ಗ್ರಾಮೀಣ ವಲಯದ ಪೊಲೀಸ್‌ ಮೂಲಗಳು ತಿಳಿಸಿವೆ. ಹುಮನಾಬಾದ್‌ನ ರಸ್ತೆ ಅಪಘಾತದ ಸುದ್ದಿಯ ಬೆನ್ನಿಗೇ ಸಂಭವಿಸಿದ ಇನ್ನೆರಡು ರಸ್ತೆ ಅಪಘಾತಗಳು ಜನರಲ್ಲಿ ಆಂತಕ ಮೂಡಿಸಿವೆ.

(ಯುಎನ್‌ಐ)