ತೆಹಲ್ಕಾ ಪ್ರಕರಣ : ರಕ್ಷಣಾ ಸಚಿವ ಜಾರ್ಜ್‌ ಫರ್ನಾಂಡಿಸ್‌ ರಾಜೀನಾಮೆ

ನವದೆಹಲಿ : ತೆಹಲ್ಕಾ ಡಾಟ್‌ ಕಾಮ್‌, ರಕ್ಷಣಾ ವ್ಯವಹಾರಕ್ಕೆ ಸಂಬಂಧಿಸಿದ ಹಗರಣವನ್ನು ಬಹಿರಂಗಗೊಳಿಸಿದ ಹಿನ್ನೆಲೆಯಲ್ಲಿ ರಕ್ಷಣಾ ಸಚಿವ ಜಾರ್ಜ್‌ ಫರ್ನಾಂಡಿಸ್‌ ಅವರ ರಾಜೀನಾಮೆಗೆ ಒತ್ತಾಯಿಸಿ ಮಮತಾ ಬ್ಯಾನರ್ಜಿ ಎನ್‌ಡಿಎ ಸರಕಾರಕ್ಕೆ ಬೆಂಬಲ ವಾಪಾಸು ತೆಗೆದುಕೊಂಡ ಕೆಲವೇ ಗಂಟೆಗಳಲ್ಲಿ ಜಾರ್ಜ್‌ ಫರ್ನಾಂಡಿಸ್‌ ರಾಜೀನಾಮೆ ನೀಡಿದ್ದಾರೆ.

ಫರ್ನಾಂಡಿಸ್‌ ರಾಜೀನಾಮೆ ನೀಡಿದ ಮರುಗಳಿಗೆಯಲ್ಲೇ ಸಮತಾ ಪಕ್ಷಕ್ಕೆ ಸೇರಿದ ಸಚಿವರಾದ, ಕೃಷಿ ಸಚಿವ ನಿತೇಶ್‌ ಕುಮಾರ್‌, ರೈಲ್ವೇ ಖಾತೆ ರಾಜ್ಯ ಸಚಿವ ದಿಗ್ವಿಜಯ್‌ ಸಿಂಗ್‌ ಮತ್ತು ಆಹಾರ ಮತ್ತು ಗ್ರಾಹಕ ವ್ಯವಹಾರಗಳ ಸಚಿವ ವಿ. ಶ್ರೀನಿವಾಸ್‌ ಪ್ರಸಾದ್‌ ಅವರೂ ತಮ್ಮ ರಾಜೀನಾಮೆ ಪತ್ರಗಳನ್ನು ಪ್ರಧಾನಿ ವಾಜಪೇಯಿ ಅವರಿಗೆ ಸಲ್ಲಿಸಿದ್ದಾರೆ. ಆದರೆ ಈ ಮೂವರ ರಾಜೀನಾಮೆ ಅಂಗೀಕಾರವಾಗಿಲ್ಲ. ಪ್ರಕರಣದ ಬಗ್ಗೆ ಸ್ವತಂತ್ರ ತನಿಖೆ ನಡೆದು ಫರ್ನಾಂಡಿಸ್‌ ದೋಷ ಮುಕ್ತರಾಗುವವರೆಗೆ ತಾವು ರಾಜೀನಾಮೆ ವಾಪಾಸು ಪಡೆಯುವುದಿಲ್ಲ ಎಂದು ಮೂವರೂ ಪಟ್ಟು ಹಿಡಿದಿದ್ದಾರೆ.

ಜಾರ್ಜ್‌ ಫರ್ನಾಂಡಿಸ್‌, ಅಜಿತ್‌ ಪಾಂಜಾ ಮತ್ತು ಮಮತಾ ಅವರ ರಾಜೀನಾಮೆ ಪತ್ರಗಳನ್ನು ಪ್ರಧಾನಿ ಅಂಗೀಕರಿಸಿದ್ದಾರೆ.

(ಇನ್ಫೋ ವಾರ್ತೆ)