ಆಸ್ಟ್ರೇಲಿಯಾದ ಲಕ್ಷ್ಮಣರೇಖೆ ಮೀರಿದ ಲಕ್ಷ್ಮಣ್‌ ಅಮೋಘ ದ್ವಿಶತಕ

ಕೋಲ್ಕತ : ಆಸ್ಟ್ರೇಲಿಯಾದ ಗೆಲುವಿನ ಆಸೆಗೆ ತಣ್ಣೀರೆರುಚುತ್ತಿರುವ ವಿವಿಎಸ್‌ ಲಕ್ಷ್ಮಣ್‌ ಹಾಗೂ ಕಲೆಗಾರ ದ್ರಾವಿಡ್‌ ಭಾರತದ ಬ್ಯಾಟಿಂಗನ್ನು ಜೀವಂತವಾಗಿರಿಸಿದ್ದಾರೆ. ಲಕ್ಷ್ಮಣ್‌, ಅಂತರರಾಷ್ರೀಯ ಟೆಸ್ಟ್‌ ಕ್ರಿಕೆಟ್ಟಿನಲ್ಲಿ ತಮ್ಮ ಮೊದಲ ದ್ವಿಶತಕ ದಾಖಲಿಸಿದರೆ, ದ್ರಾವಿಡ್‌ ಶತಕದ ಗಡಿ ಮುಟ್ಟಲು ಇನ್ನು ಮೂರೇ ಗೇಣು.

ಲಕ್ಷ್ಮಣ್‌ ಅವರ ದ್ವಿಶತಕ (200) 35 ಬೌಂಡರಿಗಳನ್ನು ಒಳಗೊಂಡಿದೆ. 89 ರನ್ನುಗಳನ್ನು ಗಳಿಸಿರುವ ದ್ರಾವಿಡ್‌ 13ಬೌಂಡರಿಗಳನ್ನು ಬಾರಿಸಿದ್ದಾರೆ. 4 ವಿಕೆಟ್‌ ನಷ್ಟಕ್ಕೆ 471 ರನ್ನುಗಳನ್ನು ಗಳಿಸಿರುವ ಭಾರತ ಪ್ರಸ್ತುತ 171 ರನ್ನುಗಳ ಮುನ್ನಡೆ ಗಳಿಸಿದೆ.

ಮಂಗಳವಾರ ಆಸ್ಟ್ರೇಲಿಯಾ ಮೊತ್ತಕ್ಕಿಂತ 20 ರನ್‌ಗಳಿಂದ ಹಿಂದುಳಿದಿದ್ದ ಭಾರತ, ಬುಧವಾರ ಭರವಸೆಯ ಆರಂಭ ಕಂಡಿತು. ಗಿಲ್ಲೆಸ್ಪಿ ಎಸೆತಗಳನ್ನು ನೀರು ಕುಡಿದಷ್ಟೇ ಸಲೀಸಾಗಿ ಬೌಂಡರಿಗಟ್ಟಿದ ಲಕ್ಷ್ಮಣ್‌ ನಿಧಾನವಾಗಿ ಸಾಗುತ್ತಿದ್ದ ಆಟಕ್ಕೆ ವೇಗದ ತಿರುವು ಕೊಟ್ಟರು. ರನ್‌ ಗಳಿಸಲು ಪರದಾಡುತ್ತಿದ್ದರೂ, ಕ್ರೀಸಿಗೆ ಅಂಟಿಕೊಂಡಿದ್ದ ದ್ರಾವಿಡ್‌ ಕೂಡ ಆಟಕ್ಕೆ ಕುದುರಿಕೊಂಡರು. ಈ ಇಬ್ಬರೂ ಆಟಗಾರರು ಮೆಕ್‌ಗ್ರಾತ್‌ ಸೇರಿದಂತೆ ಆಸ್ಟ್ರೇಲಿಯಾದ ಎಲ್ಲಾ ಬೌಲರ್‌ಗಳಿಗೂ ಗಂಜಿ ಕುಡಿಸಿದರು.

(ಇನ್ಫೋ ವಾರ್ತೆ)

ದ್ವಿಶತಕದತ್ತ ಲಕ್ಷ್ಮಣ್‌, ಇನ್ನಿಂಗ್ಸ್‌ ಸೋಲಿಂದ ಪಾರಾದ ಭಾರತ