ಬೆಂಗಳೂರಲ್ಲಿ ಹೆಚ್ಚುತ್ತಿರುವ ನೆರೆ ರಾಜ್ಯದ ಭಿಕ್ಷುಕರ ಕಾಟ

ಬೆಂಗಳೂರು : ನೀವು ಬೆಂಗಳೂರಿನ ರಸ್ತೆಗಳಲ್ಲಿ ಓಡಾಡಿದ್ದೀರಲ್ಲಾ? ಹಾಗಾದರೆ, ಟ್ರಾಫಿಕ್‌ ಸಿಗ್ನಲ್‌ಗಳಲ್ಲಿ ಪುಟ್ಟ ಮಗು ಎತ್ತಿಕೊಂಡ ಹೆಂಗಸು, ವಯಸ್ಸಾದ ವೃದ್ಧರು ಇಲ್ಲವೇ ಹರಕು ಬಟ್ಟೆ ತೊಟ್ಟ ಹತ್ತು ವರ್ಷದೊಳಗಿನ ಮಕ್ಕಳು ನಿಮ್ಮನ್ನು ಭಿಕ್ಷೆ ನೀಡುವಂತೆ ಕಾಡಿಯೇ ಇದ್ದಾರೆ. ನೀವೂ ಕರುಣೆತೋರಿ ನಾಲ್ಕಾರು ಬಾರಿ ಒಂದೋ, ಎರಡೋ ರುಪಾಯಿ ಕೊಟ್ಟೇ ಇದ್ದೀರಿ?

ಬೆಂಗಳೂರಿಗೆ ಏನಾಗಿದೆ? ಬೆಂಗಳೂರಲ್ಲಿ ಭಿಕ್ಷುಕರ ಕಾಟ ಹೆಚ್ಚಿದೆಯೇ? ಹೌದು. ಈ ವಿಷಯವನ್ನು ಸರಕಾರವೂ ಒಪ್ಪಿಕೊಂಡಿದೆ. ನೆರೆಯ ತಮಿಳುನಾಡು ಹಾಗೂ ಆಂಧ್ರಪ್ರದೇಶದಿಂದ ರಾಜ್ಯಕ್ಕೆ ಅದರಲ್ಲೂ ಬೆಂಗಳೂರಿಗೆ ವಲಸೆ ಬರುತ್ತಿರುವ ಭಿಕ್ಷುಕರ ಸಂಖ್ಯೆ ದಿನದಿಂದ ದಿನಕ್ಕೆ ಏರುತ್ತಲೇ ಇದೆ. ಈ ಪೈಕಿ ಕೆಲವು ಭಿಕ್ಷುಕರನ್ನು ವಾಪಸ್‌ ಕಳುಹಿಸಿದ್ದರೂ, ಮತ್ತೆ ಮತ್ತೆ ಬರುತ್ತಿದ್ದಾರೆ ಎಂದು ರಾಜ್ಯದ ಸಮಾಜ ಕಲ್ಯಾಣ ಸಚಿವ ಕಾಗೋಡು ತಿಮ್ಮಪ್ಪ ತಮ್ಮ ಅಸಹಾಯಕತೆ ತೋಡಿಕೊಂಡಿದ್ದಾರೆ.

ಮಂಗಳವಾರ ವಿಧಾನಸಭೆಯ ಪ್ರಶ್ನೋತ್ತರ ವೇಳೆಯಲ್ಲಿ ಸಚಿವರು ಈ ವಿಷಯ ತಿಳಿಸಿದರು. ಬೆಂಗಳೂರನ್ನು ಭಿಕ್ಷಾಟನೆ ರಹಿತ ಪ್ರದೇಶವಾಗಿ ಮಾಡಲು ಯೋಜನೆ ಹಮ್ಮಿಕೊಳ್ಳಲಾಗಿದೆ. ಕೆಲವು ಬಡಾವಣೆಗಳಲ್ಲಿ ಇದು ಯಶಸ್ವಿಯಾಗಿದೆ. ಆದರೆ, ಕೆಲವು ಬಡಾವಣೆಗಳಲ್ಲಿ ವಿಫಲವಾಗಿದ್ದೇವೆ ಎಂದರು.

ಬೆಂಗಳೂರಿನಲ್ಲಿ ಭಿಕ್ಷಾಟನೆಯನ್ನು ಸಂಪೂರ್ಣವಾಗಿ ತೊಡೆದುಹಾಕಲು ಹಲವು ವರ್ಷಗಳ ಹಿಂದೆ ಅವರಿಗೆ ಪುನರ್ವಸತಿ ಕಲ್ಪಿಸಲಾಗಿತ್ತು. ಭಿಕ್ಷುಕರ ಕಾಲೋನಿಯಾಂದನ್ನೇ ಮಾಗಡಿ ರಸ್ತೆಯ ಬಳಿ ನಿರ್ಮಿಸಿ, ಭಿಕ್ಷುಕರಿಗೆ ಉದ್ಯೋಗ ಒದಗಿಸಲಾಗಿತ್ತು. ಆದರೂ ದಿನದಿಂದ ದಿನಕ್ಕೆ ಭಿಕ್ಷುಕರ ಸಂಖ್ಯೆ ಹೆಚ್ಚುತ್ತಿದೆ. ಈ ಹಿನ್ನೆಲೆಯಲ್ಲಿ ಬೆಂಗಳೂರು ನಗರ ಪಾಲಿಕೆ ಸಾರ್ವಜನಿಕರಿಂದ ವಸೂಲಿ ಮಾಡುವ ಭಿಕ್ಷಾಟನೆ ನಿಯಂತ್ರಣ ಶುಲ್ಕದಲ್ಲಿ ಪುನರ್ವಸತಿ ಕೈಗೊಳ್ಳಲಾಗುವುದು. ಆದರೆ, ಸಮಾಜ ಕಲ್ಯಾಣ ಇಲಾಖೆಗೆ ಈ ಶುಲ್ಕದಲ್ಲಿ ಇನ್ನೂ 6.5 ಕೋಟಿ ರುಪಾಯಿ ಬಾಕಿ ಬರಬೇಕಾಗಿದೆ.

ಕೂಡಲೇ ಪಾಲಿಕೆಯಿಂದ ಪುನರ್ವಸತಿಗೆ 50 ಲಕ್ಷ ರುಪಾಯಿ ಬಿಡುಗಡೆ ಮಾಡಿಸಲು ಕ್ರಮ ಕೈಗೊಳ್ಳಲಾಗಿದೆ. ಹೊರರಾಜ್ಯದಿಂದ ಬರುತ್ತಿರುವ ಭಿಕ್ಷುಕರನ್ನು ವಾಪಸ್‌ ಕಳಿಸಲೂ ಕ್ರಮ ಕೈಗೊಳ್ಳಲಾಗಿದೆ. ಇನ್ನಾದರೂ ಬೆಂಗಳೂರಲ್ಲಿ ಭಿಕ್ಷುಕರ ಕಾಟ ತಪ್ಪುತ್ತದೆಯೇ ಎಂಬುದನ್ನು ಕಾದೇ ನೋಡಬೇಕು.