ಮಾ.18 : ರಾಜೀವ್‌ ಪ್ರತಿಮೆ ಮುಸುಕು ಸರಿಸಲಿರುವ ಸೋನಿಯಾ

ಬೆಂಗಳೂರು : ನಗರದಲ್ಲಿ ಮಾರ್ಚ್‌ 18 ರ ಭಾನುವಾರ ಮಾಜಿ ಪ್ರಧಾನಿ ರಾಜೀವ್‌ಗಾಂಧಿಯವರ ಕಂಚಿನ ಪ್ರತಿಮೆಯನ್ನು ಕಾಂಗ್ರೆಸ್‌ ಪಕ್ಷದ ರಾಷ್ಟ್ರೀಯ ಅಧ್ಯಕ್ಷೆ ಸೋನಿಯಾಗಾಂಧಿ ಅನಾವರಣಗೊಳಿಸುವರು.

ಒಂಭತ್ತೂವರೆ ಅಡಿ ಎತ್ತರದ ಕಂಚಿನ ಪ್ರತಿಮೆಯನ್ನು ನಾಲ್ಕು ಲಕ್ಷ ರುಪಾಯಿಗಳ ವೆಚ್ಚದಲ್ಲಿ ತಯಾರಿಸಲಾಗಿದೆ. ಈ ಮೊತ್ತವನ್ನು ರಾಜೀವ್‌ಗಾಂಧಿ ಸಂಸ್ಮರಣ ಸಂಸ್ಥೆ ಭರಿಸಿದೆ ಎಂದು ಕಾಂಗ್ರೆಸ್‌ ಸೇವಾದಳದ ಅಧ್ಯಕ್ಷ ಬಿ.ಕೆ. ಹರಿಪ್ರಸಾದ್‌ ಮಂಗಳವಾರ ಸುದ್ದಿಗಾರರಿಗೆ ತಿಳಿಸಿದರು.

ಪ್ರತಿಮೆಯ ಅನಾವರಣ ಮಾತ್ರವಲ್ಲದೆ, ದುರ್ಬಲ ವರ್ಗದವರ ಬಳಕೆಗಾಗಿ ಎರಡು ಆ್ಯಂಬುಲೆನ್ಸ್‌ಗಳಿಗೆ ಸೋನಿಯಾ ಚಾಲನೆ ನೀಡುವರು. ಶನಿವಾರದಿಂದ ಪ್ರಾರಂಭವಾಗುವ ಅಖಿಲ ಭಾರತ ಕಾಂಗ್ರೆಸ್‌ ಅಧಿವೇಶನದಲ್ಲಿ ರಾಜ್ಯದ 1000 ಸೇವಾದಳದ ಸದಸ್ಯರು ಸೇರಿದಂತೆ ಒಟ್ಟು 2 ಸಾವಿರ ಸೇವಾದಳದ ಸದಸ್ಯರು ಭಾಗವಹಿಸುವರು ಎಂದು ಹರಿಪ್ರಸಾದ್‌ ಹೇಳಿದರು.

(ಯುಎನ್‌ಐ)