ಕೃಷ್ಣ ಗೈರು ಹಾಜರಿಯಲ್ಲಿ ಮಿಂಚಿದ ತೆಲುಗು ಬಿಡ್ಡ ನಾಯ್ಡು

ಬೆಂಗಳೂರು : ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ಕರ್ನಾಟಕದ ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ಅವರಿಗೆ ದಾಯಾದಿ ಎನ್ನ ಬಹುದಾದ ನೆರೆಯ ತೆಲುಗು ಬಿಡ್ಡ ಚಂದ್ರಬಾಬು ನಾಯ್ಡು ಅಪರೂಪಕ್ಕೆ ಅನ್ನುವಂತೆ ಮಂಗಳವಾರ ಭಾರತದ ಸಿಲಿಕಾನ್‌ ವ್ಯಾಲಿಗೆ ಆಗಮಿಸಿದ್ದರು. ಏಷ್ಯಾ ಟೆಕ್ನಾಲಜಿ ಸಮ್ಮೇಳನದಲ್ಲಿ ಮಂಗಳವಾರದ ಮುಖ್ಯ ಆಕರ್ಷಣೆ ಅವರೇ.

ಎಐಸಿಸಿ ಅಧಿವೇಶನದಲ್ಲಿ ಬಿಜಿಯಾಗಿರುವ ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ಸಮ್ಮೇಳನದಲ್ಲಿ ಹಾಜರಿರಲಿಲ್ಲವಾದ್ದರಿಂದ ನಾಯ್ಡು ಮಾಧ್ಯಮಗಳ ಚುಂಬಕ ಕೇಂದ್ರವಾಗಿದ್ದರು. ವಿದೇಶಿ ಮಾಧ್ಯಮಗಳ ಪಾಲಿಗಂತೂ ನಾಯ್ಡು ಕಣ್ಮಣಿಯಾಗಿದ್ದರು. ನಾಯ್ಡು ಪ್ರಭಾವಳಿಯೆದುರು ಕರ್ನಾಟಕದ ಕೈಗಾರಿಕಾ ಮಂತ್ರಿ ಆರ್‌.ವಿ. ದೇಶಪಾಂಡೆ ಪಕ್ಕಕ್ಕೆ ಸರಿದದ್ದರಲ್ಲಿ ಆಶ್ಚರ್ಯವೇನೂ ಇರಲಿಲ್ಲ .

ಆಂಧ್ರದಲ್ಲಿ ಐಟಿಗೂ ಶಿಕ್ಷಣಕ್ಕೂ ಮದುವೆ

ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ತಾವು ತಮ್ಮ ರಾಜ್ಯದಲ್ಲಿ ಹಮ್ಮಿಕೊಂಡಿರುವ ಯೋಜನೆಗಳನ್ನು ನಾಯ್ಡು ಸಮ್ಮೇಳನದಲ್ಲಿ ಹಂಚಿಕೊಂಡರು. ಮುಖ್ಯವಾಗಿ, ವಿಡಿಯೋ ಕಾನ್ಫೆರೆನ್ಸಿಂಗ್‌ ಸೌಲಭ್ಯ ಹೊಂದಿರುವ ಇಂಜಿನಿಯರಿಂಗ್‌ ಕಾಲೇಜುಗಳನ್ನು ಆಂಧ್ರದಲ್ಲಿ ಸ್ಥಾಪಿಸುವ ಯತ್ನದಲ್ಲಿದ್ದೇವೆ. ಇದರಿಂದಾಗಿ ಒಬ್ಬನೇ ಉಪನ್ಯಾಸಕ ಏಳು ಶಾಲಾ ಕೊಠಡಿಗಳಲ್ಲಿ ಉಪನ್ಯಾಸ ನೀಡಲು ಸಾಧ್ಯವಾಗಲಿದೆ ಎಂದು ನಾಯ್ಡು ವಿವರಿಸಿದರು.

ಪ್ರಸ್ತುತ ಆಂಧ್ರದಲ್ಲಿ 104 ಇಂಜಿನಿಯರಿಂಗ್‌ ಕಾಲೇಜುಗಳನ್ನು ಹೊಂದಿದ್ದು , ಎಲ್ಲಾ ಕಾಲೇಜುಗಳಲ್ಲಿಯೂ ವಿಡಿಯೋ ಕಾನ್ಫೆರೆನ್ಸಿಂಗ್‌ ಸೌಲಭ್ಯ ಅಳವಡಿಸಲು ಉದ್ದೇಶಿಸಿದ್ದೇವೆ. ಪ್ರಸ್ತುತ ವರ್ಷ ಇನ್ನೂ 13 ಇಂಜಿನಿಯರಿಂಗ್‌ ಕಾಲೇಜುಗಳನ್ನು ಪ್ರಾರಂಭಿಸುತ್ತಿದ್ದೇವೆ ಎಂದರು.

ಐಟಿ ಕ್ಷೇತ್ರದಲ್ಲಿ ಭಾರತದಲ್ಲಿ ನಂ 1 ಅನ್ನಿಸಿಕೊಳ್ಳಲು ಕೃಷ್ಣ ಹಾಗೂ ನಾಯ್ಡು ನಡುವೆ ನಡೆಯುತ್ತಿರುವ ಸ್ಪರ್ಧೆಯನ್ನು ಕುರಿತ ಸುದ್ದಿಗಾರರ ಪ್ರಶ್ನೆಗೆ- ನನಗೆ ಸಹಕಾರದಲ್ಲಿ ನಂಬಿಕೆಯಿದೆಯೇ ಹೊರತು ಸ್ಪರ್ಧೆಯಲ್ಲಲ್ಲ ಎಂದು ನಾಯ್ಡು ಮುಗುಮ್ಮಾಗಿ ಉತ್ತರಿಸಿದರು.

(ಇನ್ಫೋ ವಾರ್ತೆ)