ತ್ರಿಮೂರ್ತಿಗಳನ್ನೂ ಕಾಡಿದ ಬಿಸಿಲ ಬೇಗೆ

ದೇವರೇ ಆದ ಈ ಸೂರ್ಯ ದೇವಾನು ದೇವತೆಗಳನ್ನೂ ಕಾಡದೇ ಬಿಟ್ಟಿಲ್ಲ. ತ್ರಿಮೂರ್ತಿಗಳನ್ನೂ ಬಿಟ್ಟಿಲ್ಲ. ಏನು ತ್ರಿಮೂರ್ತಿಗಳೂ ಸೂರ್ಯತಾಪಕ್ಕೆ ಒಳಗಾದರೆ ಎಂಬ ಪ್ರಶ್ನೆ ಸಹಜ. ಹಾಗಿಲ್ಲದಿದ್ದರೆ. ಕೈಲಾಸನಾಥನಾದ ಪರಮೇಶ್ವರನು ತನ್ನ ತಲೆಯ ಮೇಲೆ ನೀರು ಅರ್ಥಾತ್‌ ಗಂಗೆಯನ್ನೇಕೆ ಧರಿಸುತ್ತಿದ್ದ? ಇನು ್ನ ಜಗತ್‌ ರಕ್ಷಕನಾದ ಶ್ರೀಮನ್ನಾರಾಯಣನಾದರೂ ಕ್ಷೀರ ಸಮುದ್ರದಲ್ಲೇ ಏಕೆ ವಾಸಿಸುತ್ತಿದ್ದ ? ಎಲ್ಲಕ್ಕಿಂತಲೂ ಮಿಗಿಲಾಗಿ ಸೃಷ್ಟಿಕರ್ತನಾದ ಬ್ರಹ್ಮನು ನೀರಿನಲ್ಲೇ ಹುಟ್ಟಿದ ಕಮಲವನ್ನೇಕೆ ಆಶ್ರಯಿಸುತ್ತಿದ್ದ. ಅಂದಮೇಲೆ ಬಿಸಿಲ ಬೇಗೆ ಇವರನ್ನೂ ಕಾಡಿದೇ ಎಂದೇ ಅರ್ಥ ಅಲ್ಲವೇ.

ತ್ರಿಮೂರ್ತಿಗಳನ್ನೇ ಬಿಡದ ಸೂರ್ಯ ಸಾಮಾನ್ಯರಾದ ನಮ್ಮನ್ನು ಬಿಟ್ಟಾನೆ. ಅದಕ್ಕೆ ನಾವೂ ತ್ರಿಮೂರ್ತಿಗಳಂತೆ ಜಲದಾಶ್ರಯ ಬಯಸಬೇಕಷ್ಟೇ. ಶಿಶಿರದ ಕೊರೆತ ಎಳ್ಳಮಾವಾಸ್ಯೆಗೆ ಎಳ್ಳಿನಷ್ಟು, ಮಕರ ಸಂಕ್ರಾಂತಿಗೆ ಶಂಖದಷ್ಟು ಕಡಿಮೆಯಾಗಿ ಶಿವರಾತ್ರಿಗೆ ಶಿವಶಿವ ಎಂದು ಹೊರಟು ಹೋಗುತ್ತಿದ್ದಂತೆ ಬಿಸಿಲ ಝಳ ತಾನಾಗೇ ಏರುತ್ತಲೇ ಸಾಗುತ್ತದೆ. ಅಬ್ಬಾ ಈ ವರ್ಷ ಅದೇನು ಚಳಿಯಪ್ಪ ನಡುಗಿಸಿಬಿಟ್ಟಿತು ಎನ್ನುತ್ತಿದ್ದ ಜನ ಊಶ್‌ ಅಪ್ಪಾ ಈ ಸೆಕೆ ತಡೆಯಲಾಗದು. ಅದೇನು ಬಿಸಿಲು ಅದೇನು ಧಗೆ ಎಂದು ರಾಗ ಎಳೆಯದೇ ಇರರು.

ಚಳಿಗಾಲದಲ್ಲಿ ಸ್ವೆಟರ್‌ ಧರಿಸಿ, ಕಂಬಳಿ ಹೊದ್ದಾದರೂ ನಿದ್ದೆ ಹೋಗಬಹುದು. ಈ ಸೆಕೆ ತಡೆಯುವುದು ಹೇಗೆ. ಫ್ಯಾನ್‌ ಹಾಕಿದರೂ ಬಿಸಿಗಾಳಿ. ಹೊರಗಿನಿಂದ ಬಂದರಂತೂ ಮುಗಿದೇ ಹೋಯಿತು. ಅದೇನು ಬಿಸಿಲು!