ತುಮಕೂರು : 6 ಅಂಗಡಿಗಳಿಗೆ ಬೆಂಕಿ, 10 ಲಕ್ಷ ಭಸ್ಮ

ತುಮಕೂರು : ಹೂವಿನ ಅಂಗಡಿ, ಹಣ್ಣಿನ ಅಂಗಡಿ, ಸೈಕಲ್‌ ಷಾಪ್‌, ಸಿಹಿ ತಿಂಡಿಗಳ ಅಂಗಡಿ, ಬೇಕರಿ, ಹೋಟೆಲ್‌ - ಭೇದಭಾವ ತೋರದ ಬೆಂಕಿ ಹೊತ್ತಿಕೊಂಡು ತಣ್ಣಗಾಗುವ ಹೊತ್ತಿಗೆ 6 ಅಂಗಡಿಗಳಿಂದ ಒಟ್ಟು 10 ಲಕ್ಷ ರುಪಾಯಿ ನಷ್ಟವಾಗಿತ್ತು . ಬೆಂಕಿ ಹೊತ್ತಿಕೊಂಡದ್ದು ಪಟ್ಟಣದ ಖಾಸಗಿ ಬಸ್‌ ನಿಲ್ದಾಣದಲ್ಲಿ . ಗುರುವಾರ ಇನ್ನೂ ಬಿಸಿಲು ಬಲಿಯದ ಬೆಳಿಗ್ಗೆಯೇ.

ಬೆಂಕಿ ಹೊತ್ತಿಕೊಂಡು ಅಂಗಡಿಗಳ ಪಕ್ಕದಲ್ಲಿಯೇ ಪೆಟ್ರೋಲ್‌ ಬಂಕ್‌ ಇತ್ತು , ಬಿಳಿ ಸೀಮೆಎಣ್ಣೆ ಅಂಗಡಿ ಇತ್ತು . ಸದ್ಯ ಸಮಯಕ್ಕೆ ಸರಿಯಾಗಿ ಆಗಮಿಸಿದ ಮೂರು ಅಗ್ನಿಶಾಮಕ ದಳದ ವಾಹನ- ಸಿಬ್ಬಂದಿಯ ಸುಮಾರು 60 ನಿಮಿಷಗಳ ಹೋರಾಟ ಹೆಚ್ಚಿನ ಅನಾಹುತವನ್ನು ತಪ್ಪಿಸಿತು. ಜನ ಸಮಾಧಾನದ ನಿಟ್ಟುಸಿರು ಬಿಟ್ಟರು. ಬೆಂಕಿ ಆಕಸ್ಮಿಕಕ್ಕೆ ವಿದ್ಯುತ್‌ ಷಾರ್ಟ್‌ ಸರ್ಕ್ಯೂಟ್‌ ಕಾರಣ ಎಂದು ನಂಬಲಾಗಿದೆ. ಅಂದಹಾಗೆ, ಗುರುವಾರದಿಂದಲೇ ರಾಜ್ಯಾದ್ಯಂತ ಲೋಡ್‌ ಶೆಡ್ಡಿಂಗ್‌ ಜಾರಿಗೆ ಬಂದಿದೆ.

ದುರಂತ ಸಂಭವಿಸಿದ ಸ್ಥಳಕ್ಕೆ ನಗರ ಡಿವೈಎಸ್ಪಿ ಶ್ರೀಕಂಠಯ್ಯ, ನಗರ ಸರ್ಕಲ್‌ ಎಸ್‌ಐ ಎಚ್‌.ಎಂ. ಓಂಕಾರಯ್ಯ ಭೇಟಿಕೊಟ್ಟಿದ್ದರು. ಏಪ್ರಿಲ್‌ನಲ್ಲಿ ಜರುಗಲಿರುವ ಸಿದ್ಧಗಂಗಾ ಶ್ರೀಗಳ ಗುರುವಂದನಾ ಕಾರ್ಯಕ್ರಮ ಸಿದ್ಧತೆಯಲ್ಲಿ ವ್ಯಸ್ತರಾಗಿರುವ ಸಂಸದ ಜಿ.ಎಸ್‌. ಬಸವರಾಜು ಅವರಿಗೆ ಕೂಡ ಸ್ಥಳಕ್ಕೆ ಧಾವಿಸಲು ತುಸು ಪುರುಸೊತ್ತು ಸಿಕ್ಕಿದ್ದು ವಿಶೇಷ.

(ಇನ್ಫೋ ವಾರ್ತೆ)

ವಾರ್ತಾ ಸಂಚ-ಯ
ಮುಖಪುಟ / ಇವತ್ತು... ಈ ಹೊತ್ತು...