ಈಗಾಗಲೇ ಜಾರಿಯಾಗಿದೆ, ರಾಜ್ಯದಲ್ಲಿ ಅನಿಯಮಿತ ವಿದ್ಯುತ್‌ ನಿಲುಗಡೆ !

ಬೆಂಗಳೂರು : ವ್ಯತ್ಯಯವಿಲ್ಲದೆ ಗ್ರಾಹಕರಿಗೆ ವಿದ್ಯುತ್‌ ಪೂರೈಕೆ ಕಲ್ಪಿಸಬೇಕು ಎಂದು ಪ್ರಧಾನಿಗಳು ರಾಜ್ಯಗಳಿಗೆ ಸಲಹೆ ನೀಡಿ ವಾರ ಕಳೆಯುವ ಮುನ್ನವೇ ಲೋಡ್‌ಶೆಡ್ಡಿಂಗ್‌ ಪ್ರಕಟಣೆ ಕೆಪಿಟಿಸಿಎಲ್‌ನಿಂದ ಹೊರಬಿದ್ದಿದೆ. ರಾಜ್ಯದ ಎಲ್ಲ ಭಾಗಗಳಲ್ಲಿ ತಕ್ಷಣದಿಂದಲೇ ಜಾರಿಗೆ ಬರುವಂತೆ ಅನಿಯಮಿತ ವಿದ್ಯುತ್‌ ನಿಲುಗಡೆ ಜಾರಿಗೆ ಬರಲಿದೆ ಎಂದು ಕೆಪಿಟಿಸಿಎಲ್‌ ಪ್ರಕಟಣೆ ತಿಳಿಸಿದೆ.

ಬೆಂಗಳೂರು ನಗರ ಸೇರಿದಂತೆ ರಾಜ್ಯಾದ್ಯಂತ ಅನಿಯಮಿತ ವಿದ್ಯುತ್‌ ನಿಲುಗಡೆ ಜಾರಿಗೆ ಬಂದಿದ್ದು, ಇದು ವಿದ್ಯುತ್‌ ಜಾಲದಲ್ಲಿ ಸುಧಾರಣೆ ಆಗುವವರೆಗೂ ಮುಂದುವರೆಯಲಿದೆ ಎಂದು ಕೆಪಿಟಿಸಿಎಲ್‌ ಪ್ರಧಾನ ವ್ಯವಸ್ಥಾಪಕ ಎನ್‌. ರಾಘವೇಂದ್ರ ರಾವ್‌ ಹೇಳಿದ್ದಾರೆ.

ಸಂಜೆಯ ಪೀಕ್‌ ಅವರ್ಸ್‌ಗಳಲ್ಲಿ 30 ರಿಂದ 45 ನಿಮಿಷ ವಿದ್ಯುತ್‌ ಕಡಿತಾಗಲಿದೆ. ಗ್ರಾಮೀಣ ಪ್ರದೇಶದಲ್ಲಿ ಈಗಾಗಲೇ ಜಾರಿಯಲ್ಲಿರುವ ವಿದ್ಯುತ್‌ ಕಡಿತ ಮತ್ತಷ್ಟು ಹೆಚ್ಚಾಗಲಿದೆ. ವಿದ್ಯುತ್‌ ಕಡಿತ ಶುಕ್ರವಾರ ಬೆಳಿಗ್ಗೆಯಿಂದಲೇ ಆರಂಭವಾಗಿದ್ದು, ಬೆಂಗಳೂರು ನಗರದಲ್ಲಿ 35 ನಿಮಿಷಗಳ ವಿದ್ಯುತ್‌ ನಿಲುಗಡೆ ಮಾಡಲಾಗಿತ್ತು .

ಕೈಗಾ, ನಾಗಝರಿ ಮತ್ತು ರಾಯಚೂರು ಶಾಖೋತ್ಪನ್ನ ಕೇಂದ್ರಗಳಲ್ಲಿ ಒಟ್ಟು ಐದು ಘಟಕಗಳಲ್ಲಿ ವಿದ್ಯುತ್‌ ಉತ್ಪಾದನೆ ಸ್ಥಗಿತಗೊಂಡಿರುವುದು ಲೋಡ್‌ ಶೆಡ್ಡಿಂಗ್‌ಗೆ ಮುಖ್ಯ ಕಾರಣ . ರಾಜ್ಯಕ್ಕೆ ಪ್ರತಿದಿನ ನಾಲ್ಕು ಸಾವಿರ ಮೆಗಾವ್ಯಾಟ್‌ ವಿದ್ಯುತ್‌ ಅಗತ್ಯವಿದ್ದು, ರಾಜ್ಯದ ವಿದ್ಯುತ್‌ ಸ್ಥಾವರದ ಘಟಕಗಳು ವಿದ್ಯುತ್‌ ಉತ್ಪಾದನೆ ನಿಲ್ಲಿಸಿರುವುದರಿಂದ 1,070 ಮೆಗಾವ್ಯಾಟ್‌ ವಿದ್ಯುತ್‌ ಕೊರತೆ ಉಂಟಾಗುತ್ತದೆ.

(ಇನ್ಫೋ ವಾರ್ತೆ)