ಉರುಸ್‌ ಬಿಸಿಯಲ್ಲಿ ಬಾಬಾ ಬುಡನ್‌ ಗಿರಿಯ ಚಂದ್ರ ದ್ರೋಣ

ಬಾಬಾ ಬುಡನಗಿರಿ : ಇಲ್ಲಿನ ವಿವಾದಿತ ಚಂದ್ರದ್ರೋಣ ಬೆಟ್ಟದಲ್ಲಿ ಮಾರ್ಚ್‌ 10 ರಿಂದ ಮೂರು ದಿನಗಳ ಕಾಲ ಮುಸಲ್ಮಾನ ಹಬ್ಬ ಉರುಸ್‌ ನಡೆಸಲು ನಿರ್ಧರಿಸಲಾಗಿದೆ.

ಪ್ರತಿ ವರ್ಷ ಗುರು ದತ್ತಾತ್ರೇಯ ಬಾಬಾಬುಡನ್‌ ದರ್ಗಾದ ಮುಖ್ಯಸ್ಥರಾದ ಸಜ್ಜಾದೆ ನಷೀನ್‌ ಅವರ ನೇತೃತ್ವದಲ್ಲಿ ಉರುಸ್‌ ನಡೆಯುತ್ತಿತ್ತು. ಆದರೆ ಕಳೆದ ವರ್ಷ ಸರಕಾರವು ಗುರುದತ್ತಾತ್ರೇಯ ಪೀಠದ ಉಸ್ತುವಾರಿ ಸಮಿತಿಯನ್ನು ನೇಮಿಸಿದ್ದು, ಈ ಸಮಿತಿಯ ಮೇಲ್ವಿಚಾರಣೆಯಲ್ಲಿಯೇ ಉರುಸ್‌ ನಡೆಯಬೇಕು ಎಂಬ ಒತ್ತಾಯಗಳು ಕೇಳಿ ಬರುತ್ತಿದ್ದವು. ಆದರೆ ದರ್ಗಾದ ಮುಖ್ಯಸ್ಥರು ಇದನ್ನು ತಿರಸ್ಕರಿಸಿದ್ದಾರೆ.

ಈ ನಡುವೆ ಪ್ರತಿವರ್ಷದಂತೆ ದರ್ಗಾದ ಪೀಠಾಧಿಪತಿಗಳ ನೇತೃತ್ವದಲ್ಲಿಯೇ ಉರುಸ್‌ ನಡೆಯಲಿದೆ ಎಂದು ಚಿಕ್ಕಮಗಳೂರು ಜಿಲ್ಲಾಧಿಕಾರಿ ಹೇಳಿದ್ದಾರೆ. ಉರುಸ್‌ ಆಚರಣೆಗೆ ಯಾರ ನೆರವನ್ನೂ ನಿರೀಕ್ಷಿಸುವುದಿಲ್ಲ ಎಂದು ಸಜ್ಜಾದೆ ನಷೀನ್‌ ತಿಳಿಸಿದ್ದಾರೆ. ಆದರೆ ಕಾಣಿಕೆ ಹುಂಡಿ ಇಡುವ, ಅಂಗಡಿ ಮಳಿಗೆಗಳನ್ನು ಹಾಕುವ ಅಧಿಕಾರವನ್ನು ಸಮಿತಿ ಹೊಂದಿರುತ್ತದೆ. ಉರುಸ್‌ ನಡೆಯುವ ಸಂದರ್ಭದಲ್ಲಿ ಶಾಂತಿ ಮತ್ತು ಸುವ್ಯವಸ್ಥೆ ಕಾಪಾಡಲು ಸಾಕಷ್ಟು ಸಂಖ್ಯೆಯಲ್ಲಿ ಪೊಲೀಸ್‌ ಬಂದೋಬಸ್ತ್‌ ಒದಗಿಸಲಾಗುವುದು ಎಂದು ಜಿಲ್ಲಾಡಳಿತ ಹೇಳಿದೆ.

ದರ್ಗಾದ ಮುಖ್ಯಸ್ಥರನ್ನು ಸಜ್ಜಾದೆ ನಷೀನ್‌ ಎಂದು ಕರೆಯುವುದು ರೂಢಿ. ಈ ವರ್ಷದ ಸಜ್ಜಾದೆ ನಷೀನ್‌ ಆಗಿರುವ ಸೈಯ್ಯದ್‌ ಗೌಸ್‌ ಮೊಹಿದ್ದೀನ್‌ ಅವರನ್ನು ಸರಕಾರ ಶಾಖಾದ್ರಿ ಎಂದು ನೇಮಿಸಿದ್ದು, ಪರಂಪರಾಗತ ಹಕ್ಕನ್ನು ಕಳೆದುಕೊಳ್ಳಲು ತಾವು ತಯಾರಿಲ್ಲ , ಆದ್ದರಿಂದ ಸರಕಾರದ ಕ್ರಮವನ್ನು ನ್ಯಾಯಾಲಯದಲ್ಲಿ ಪ್ರಶ್ನಿಸಿರುವುದಾಗಿ ಮೊಹಿದ್ದೀನ್‌ ಹೇಳಿದ್ದಾರೆ.

(ಇನ್ಫೋ ವಾರ್ತೆ)