ಅಲಹಾಬಾದ್‌ಗೆ ಮರುನಾಮಕರಣ:ಅದಿನ್ನು ತೀರ್ಥರಾಜ್‌ ಪ್ರಯಾಗ್‌

ಲಖನೌ : ಬಾಂಬೆ ಮುಂಬಯಿಯಾಯಿತು. ಮದ್ರಾಸ್‌ ಚೆನ್ನೈ ಆಯಿತು. ಮೊನ್ನೆಯಷ್ಟೇ ಕಲ್ಕತ್ತಾ ಕೋಲ್ಕತಾ ಎಂದು ಹೆಸರು ಬದಲಾಯಿಸಿಕೊಂಡಿತು. ಈಗ ಈ ಯಾದಿಗೆ ಪ್ರಯಾಗ ನಗರಿ ಎಂದೇ ಹೆಸರಾದ ಅಲಹಾಬಾದ್‌ ಹೊಸ ಸೇರ್ಪಡೆ. ಇನ್ನು ನೀವು ಅಲಹಾಬಾದ್‌ ಅನ್ನೋ ಬದಲು ತೀರ್ಥರಾಜ್‌ ಪ್ರಯಾಗ್‌ ಅನ್ನಬೇಕು.

ಮಹಾಕುಂಭಮೇಳದ ನೆನಪಿನ್ನೂ ಹಸುರಾಗಿದೆ. ಈ ಮಹಾ ಮಾನವ ಜಾತ್ರೆಯನ್ನು ಯಶಸ್ವಿಯಾಗಿ ನಡೆಸಿಕೊಟ್ಟ ಉತ್ತರ ಪ್ರದೇಶದ ಮುಖ್ಯಮಂತ್ರಿ ರಾಜನಾಥ ಸಿಂಗ್‌ ಅವರನ್ನು ಬುಧವಾರ ಸ್ಥಳೀಯ ಸಾಧು- ಸಂತರು ಸನ್ಮಾನಿಸಿದರು. ಸಮಾರಂಭದಲ್ಲಿ ಮಾತನಾಡಿದ ಮುಖ್ಯಮಂತ್ರಿ, ಅಲಹಾಬಾದನ್ನು ತೀರ್ಥರಾಜ್‌ ಪ್ರಯಾಗ್‌ ಅಂತ ಮರುನಾಮಕರಣ ಮಾಡುವುದಾಗಿ ಘೋಷಿಸಿದರು. ಮಾಜಿ ಶಂಕರಾಚಾರ್ಯ ಸತ್ಯವಿತ್ರಾನಂದ ಗಿರಿ ಸ್ವಾಮಿ ಹೊಸ ಹೆಸರನ್ನು ಸೂಚಿಸಿದ್ದು, ತಾವು ಅವರ ಸಲಹೆಗೆ ತಕ್ಷಣ ಸ್ಪಂದಿಸಿರುವುದಾಗಿ ಮುಖ್ಯಮಂತ್ರಿ ಹೇಳಿದರು.

ಗಂಗಾ, ಯಮುನಾ ಹಾಗೂ ಸರಸ್ವತಿ ನದಿಗಳ ಸಂಗಮ ಸ್ಥಾನ ಅಲಹಾಬಾದ್‌ ಆದ್ದರಿಂದ ಅದಕ್ಕೆ ಈ ಪವಿತ್ರ ಹೆಸರನ್ನು ಸೂಚಿಸಲಾಗಿದೆ. ಪ್ರಯಾಗ ಅಂದರೆ ಪವಿತ್ರ. ಹೆಸರಿನ ಮೊದಲ ಪದ ತನ್ನಲ್ಲೇ ಅರ್ಥ ಹುದುಗಿಸಿಟ್ಟುಕೊಂಡಿದೆ. ಅಮೃತ ಬಿಂದು ಸೇರಿದೆ ಎನ್ನಲಾದ ಈ ತ್ರಿವೇಣಿ ಸಂಗಮಕ್ಕೆ ಹೊಸ ಹೆಸರು ಇಡುವುದು ಸರಿಯೋ, ತಪ್ಪೋ ನೀವೇ ಹೇಳಿ.

(ಇನ್ಫೋ ವಾರ್ತೆ)