ಮಲ್ಯ ಆಸ್ಪತ್ರೆಯ ಹಾಸಿಗೆಯಲ್ಲಿ ದಣಿದು ಮಲಗಿರುವ ಟೈಗರ್‌

ಬೆಂಗಳೂರು : ಸ್ಯಾಂಡಲ್‌ವುಡ್‌ನ ಜನಪ್ರಿಯ ನಾಟಕ ನಟ ಟೈಗರ್‌ ಪ್ರಭಾಕರ್‌ ತೀವ್ರ ಅಸ್ವಸ್ಥತೆಯಿಂದ ಬಳಲುತ್ತಿದ್ದು , ಮಲ್ಯ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಅವರ ಆರೋಗ್ಯ ಪರಿಸ್ಥಿತಿ ಸ್ವಲ್ಪ ಮಟ್ಟಿಗಿನ ಸುಧಾರಣೆ ಕಂಡು ಬಂದಿದೆ ಎಂದು ಆಸ್ಪತ್ರೆಯ ಮೂಲಗಳು ತಿಳಿಸಿವೆ.

ಹೃದಯ ಸಂಬಂಧಿ ಹಾಗೂ ಉಲ್ಬಣ ಕಾಮಾಲೆ ರೋಗದ ಕಾರಣ ಪ್ರಭಾಕರ್‌ ಅವರನ್ನು ಭಾನುವಾರ ಸಂಜೆ ಮಲ್ಯ ಆಸ್ಪತ್ರೆಗೆ ಸೇರಿಸಲಾಗಿತ್ತು . ಪ್ರಭಾಕರ್‌ ಅವರನ್ನು ಕಾಲು ನೋವು ಕೂಡ ಬಳಲಿಸುತ್ತಿದೆ. ಅವರ ಕಾಲಿಗೆ ಗ್ಯಾಂಗ್ರಿನ್‌ ಆಗಿದೆ ಎಂದು ಕೆಲವು ಪತ್ರಿಕೆಗಳು ವರದಿ ಮಾಡಿದ್ದನ್ನು ಇಲ್ಲಿ ಸ್ಮರಿಸಬಹುದು.

ಈ ನಡುವೆ ವರನಟ ಡಾ. ರಾಜ್‌ಕುಮಾರ್‌, ಪಾರ್ವತಮ್ಮ ರಾಜ್‌ಕುಮಾರ್‌, ಶ್ರೀನಾಥ್‌, ಜಯಂತಿ ಮುಂತಾದ ಸಿನಿಮಾ ಕಲಾವಿದರು ಆಸ್ಪತ್ರೆಗೆ ಭೇಟಿ ಕೊಟ್ಟು ಪ್ರಭಾಕರ್‌ ಅವರ ಆರೋಗ್ಯ ವಿಚಾರಿಸಿದರು.

(ಇನ್ಫೋ ವಾರ್ತೆ)