ಮೊದಲು ದೇಶ, ಆಮೇಲೆ ಧರ್ಮ ಕರ್ಮ ಎಲ್ಲ- ವೀರೇಂದ್ರ ಹೆಗ್ಗಡೆ

ಮಂಗಳೂರು : ಧರ್ಮಕ್ಕಿಂತ ದೇಶ ಮಿಗಿಲು. ದೇಶ ಸುರಕ್ಷಿತವಾಗಿದ್ದರೆ ಧರ್ಮ, ಸಂಸ್ಕೃತಿ, ಜನ ಜೀವನ ಸುಭಿಕ್ಷವಾಗಿರುತ್ತದೆ. ಅಲ್ಲಿ ಭಗವಂತ ನೆಮ್ಮದಿಯಿಂದಿರುತ್ತಾನೆ ಎಂದು ಧರ್ಮಸ್ಥಳದ ಧರ್ಮಾಧಿಕಾರಿ ಡಾ. ಡಿ. ವೀರೇಂದ್ರ ಹೆಗ್ಗಡೆ ಅಭಿಪ್ರಾಯಪಟ್ಟಿದ್ದಾರೆ.

ಮಂಗಳೂರಿಗೆ ಸಮೀಪದ ಮೂಲ್ಕಿಯ ಗಾಂಧಿ ಮೈದಾನದಲ್ಲಿ ದಕ್ಷಿಣ ಕನ್ನಡದ ಗಾಂಧಿ ಎಂದೇ ಹೆಸರಾದ ಕಾರ್ನಾಡ್‌ ಸದಾಶಿವರಾಯರ 120 ನೇ ಜನ್ಮದಿನದ ಅಂಗವಾಗಿ ಮಂಗಳವಾರ ನಡೆದ ಸಂಸ್ಮರಣಾ ಸಮಾರಂಭದಲ್ಲಿ ಅವರು ಮಾತನಾಡುತ್ತಿದ್ದರು.

ಇದೇ ಸಂದರ್ಭದಲ್ಲಿ ಕಾರ್ನಾಡ್‌ ಜಂಕ್ಷನ್‌ನಲ್ಲಿ ಕಾರ್ನಾಡ್‌ ಸದಾಶಿವರಾಯರ ಪ್ರತಿಮೆಯನ್ನು ಅನಾವರಣಗೊಳಿಸಿದ ಅವರು, ದೇಶಕ್ಕೆ ಸ್ವಾತಂತ್ರ್ಯ ಬಂದದ್ದು ಸದಾಶಿವ ರಾಯರಂಥ ಹೋರಾಟಗಾರರಿಂದಲೇ ಹೊರತು ಸೈನಿಕರಿಂದ ಅಲ್ಲ ಎಂದರು. ತಾಲಿಬಾನ್‌ನ ಬುದ್ಧ ವಿಗ್ರಹನಾಶದ ಕಾರ್ಯವನ್ನು ಕಟುವಾಗಿ ಟೀಕಿಸಿದ ವೀರೇಂದ್ರ ಹೆಗ್ಗಡೆ ಅವರು, ಧರ್ಮದ ಹುಚ್ಚು ಆವೇಶದಲ್ಲಿ ನಡೆದ ಈ ಕೃತ್ಯವನ್ನು ದೇಶಭಕ್ತಿಯ ಕೆಲಸವೆಂದು ಬಣ್ಣಿಸುವುದು ವಿಪರ್ಯಾಸ ಎಂದು ವಿಷಾದಿಸಿದರು.

ಕಾಸರಗೋಡಿನ ಹಿರಿಯ ಸಾಹಿತಿ ಕಯ್ಯಾರ ಕಿಂಞಣ್ಣ ರೈ ಸಮಾರಂಭದ ಅಧ್ಯಕ್ಷತೆ ವಹಿಸಿದ್ದರು. ಸಂಶೋಧಕ ಡಾ. ಸೂರ್ಯನಾಥ ಕಾಮತ್‌, ಜಿ. ವರದರಾಜರ ಕಾರ್ನಾಡ್‌ ಸದಾಶಿವರಾಯರ ಜೀವನ ಚರಿತ್ರೆ ಕೃತಿಯನ್ನು ಬಂಡುಗಡೆ ಮಾಡಿದರು. ಮಾಜಿ ಶಾಸಕ ಅಮರನಾಥ ಶೆಟ್ಟಿ , ಶಾಸಕ ಅಭಯಚಂದ್ರ, ಸದಾಶಿವರಾಯರ ವಂಶಸ್ಥ ಶ್ರೀಧರ ಕಾರ್ನಾಡ್‌ ಹಾಗೂ ಕೆ. ಸೋಮಪ್ಪ ಕಾರ್ಯಕ್ರಮದಲ್ಲಿ ಹಾಜರಿದ್ದರು.

(ಮಂಗಳೂರು ಪ್ರತಿನಿಧಿಯಿಂದ)

ಮುಖಪುಟ / ಇವತ್ತು... ಈ ಹೊತ್ತು...