ಬಿಜಾಪುರದಲ್ಲಿ ರೈತರ ಪ್ರತಿಭಟನೆಯಿಂದಾಗಿ ಅಸ್ವಸ್ಥಗೊಂಡ ಸಚಿವ

ಬಿಜಾಪುರ : ಕುಡಿಯುವ ನೀರಿನ ಸಮಸ್ಯೆಯನ್ನು ಬಗೆಹರಿಸುವಂತೆ ಒತ್ತಾಯಿಸಿ ಭೀಮಾ ನದಿ ಪ್ರಾಂತ್ಯದ ರೈತರು ನಡೆಸಿದ ಘರಾವ್‌ನಿಂದಾಗಿ ತೀವ್ರ ರಕ್ತದ ಒತ್ತಡಕ್ಕೆ ತುತ್ತಾದ ಜಿಲ್ಲಾ ಉಸ್ತುವಾರಿ ಸಚಿವ ಎಸ್‌.ಆರ್‌. ಕಾಶಪ್ಪನವರ್‌ ಅಸ್ವಸ್ಥಗೊಂಡ ಘಟನೆ ತಡವಾಗಿ ವರದಿಯಾಗಿದೆ.

ಕುಡಿಯುವ ನೀರಿನ ಕೊರತೆಯಿಂದ ಬಳಲುತ್ತಿರುವ ಕೊನೆಯ ಹಳ್ಳಿಯವರೆಗೆ ಮಹಾರಾಷ್ಟ್ರದಿಂದ ನೀರು ಬಿಡಿಸುವಂತೆ ಪ್ರವಾಸಿ ಮಂದಿರದಲ್ಲಿದ್ದ ಸಚಿವರನ್ನು ಉದ್ರಿಕ್ತ ರೈತರು ಸೋಮವಾರ ಒತ್ತಾಯಿಸಿದರು. ತಮ್ಮ ಸರ್ಕಾರ ಮಹಾರಾಷ್ಟ್ರ ಸರ್ಕಾರದಿಂದ ನೀರು ಬಿಡಿಸುವ ಕುರಿತು ಪ್ರಾಮಾಣಿಕ ಪ್ರಯತ್ನ ನಡೆಸಿದೆ. ರಾಜ್ಯ ಸರ್ಕಾರ ರೈತರ ಹಿತವನ್ನು ಎಂದೂ ಕಡೆಗಣಿಸಿಲ್ಲ ಎಂದು ಕಾಶಪ್ಪನವರ್‌ ಹೇಳಿದರು.

ಸಚಿವರ ಮಾತಿಗೆ ತೃಪ್ತಿಗೊಳ್ಳದ ರೈತರು, ಸಚಿವರ ವಿರುದ್ಧ ಧಿಕ್ಕಾರ ಕೂಗಿದರು. ಇದರಿಂದಾಗಿ ಹಠಾತ್ತನೆ ರಕ್ತದೊತ್ತಡಕ್ಕೆ ತುತ್ತಾದ ಕಾಶಪ್ಪನವರು ಅಸ್ವಸ್ಥರಾದಾಗ ಗಾಬರಿಗೊಳ್ಳುವ ಸರದಿ ರೈತರದ್ದು . ತಕ್ಷಣವೇ ಪ್ರವಾಸಿ ಮಂದಿರಕ್ಕೆ ವೈದ್ಯರನ್ನು ಕರೆಸಿ ಚಿಕಿತ್ಸೆ ಕೊಡಿಸಲಾಯಿತು. ಸ್ವಲ್ಪ ಕಾಲದ ವಿಶ್ರಾಂತಿಯ ನಂತರ ಸಚಿವರು ಚೇತರಿಸಿಕೊಂಡರು.

(ಇನ್ಫೋ ವಾರ್ತೆ)