ಹೋಳಿ ಬಂದಿದೆ - ಹುಣ್ಣಿಮೆಯಾಂದಿಗೆ

ಇಯರೆಂಡ್‌ನ ತರಾತುರಿ, ಹಳೇ ರೆಕಾರ್ಡ್‌ಗಳು, ಪೇಪರ್‌ ಫೈಲುಗಳ ಧೂಳು...ಅಂದ ಹಾಗೆ ಈಗೀಗ ಹಳೇ ಫೈಲುಗಳ ರಾಶಿ ಎಲ್ಲ ಆಫೀಸಿನಲ್ಲೂ ಇರುವುದಿಲ್ಲ. ಎಲ್ಲ ಮಾಹಿತಿ, ದಾಖಲೆಗಳನ್ನೂ ಕಂಪ್ಯೂಟರ್‌ ನುಂಗಿಟ್ಟುಕೊಂಡಿರುತ್ತದೆ.

ಹೋಳಿ ಬರ್ತಾ ಇದೆ. ಕಾಲೇಜು ಮುಗಿದು ಪರೀಕ್ಷೆಗಳ ಸಾಲು ಭಯ ಬರುತ್ತಿರುವಂತೆಯೇ ಕಾಲೇಜಿನ ಕೊನೆಯ ಮಜಾ ಎಂಬಂತೆ, ರೇಗಿಸಲು ಕಾಡಿಸಲು, ಸುಮ್ಮನೇ ಜಗಳವಾಡಲು ಹೋಳಿ ಬಂದಿದೆ - ಹುಣ್ಣಿಮೆಯಾಂದಿಗೆ. ದುಂಡು ಚಂದ್ರಮನ ಬೆಳ್ಳಿ ಬೆಳಕಿನೊಂದಿಗೆ.

ತುಂಬಾ ರಂಗಿನ ಪುಡಿಗಳು ಅಂಗಡಿಗಳಿಗೇ ಬಣ್ಣ ಹಚ್ಚಿವೆ. ಅವತ್ತು ಆದಷ್ಟು ಮಸುಕಾಗಿರುವ ಹಳೆಯ ಡ್ರೆಸ್‌ ಹಾಕಿಕೊಂಡು ಹೋಗಬೇಕು ಅಂತ ಹುಡುಗಿಯರೆಲ್ಲಾ ಬಸ್ಸಿನಲ್ಲಿ ಬಸ್‌ಸ್ಟಾಂಡ್‌ನಲ್ಲಿ ಆಗಲೇ ಲೆಕ್ಕಾಚಾರಗಳನ್ನು ಹಾಕಿಕೊಂಡಿದ್ದಾರೆ.

ನಡುವೆ ಬಿಸಿಲು ಸಾಗುತ್ತಿದೆ, ಮಳೆಗಾಲದಲ್ಲಿ ಮೂಲೆ ಸೇರಿದ ಕೊಡೆಯನರಳಿಸಿ. ಕುಡಿಯುವ ನೀರಿಗೆ ಮೈಲುಗಟ್ಟಲೆ ನಡೆಯೆನ್ನುವ ಬಿಸಿಲು ಸದ್ಯಕ್ಕಿನ್ನೂ ಕ್ರೂರಿಯಾದ ಸುದ್ದಿ ಬಂದಿಲ್ಲ. ಬಾರದಿರಲಿ.

ಮಂಗಳವಾರ ರಾಜ್ಯಾದ್ಯಂತ ಒಣಹವೆ ಮುಂದುವರಿದಿದೆ. ನಾಳೆ ನಾಳಿದ್ದೂ ಇದೇ ಪರಿಸ್ಥಿತಿ ಅನ್ನುತ್ತಿದೆ ಹವಾಮಾನ ಇಲಾಖೆಯ ವರದಿ.