ಐಸೊಲೇಷನ್‌ ಆಸ್ಪತ್ರೆಯ ರಿಜಿಸ್ಟರಿನಲ್ಲಿ233 ಕರಳುಬೇನೆ ಪ್ರಕರಣ

ಬೆಂಗಳೂರು : ಕರಳುಬೇನೆ ಪೀಡಿತರ ಸಂಖ್ಯೆ ನಗರದಲ್ಲಿ ದಿನದಿಂದ ದಿನಕ್ಕೆ ಹೆಚ್ಚುತ್ತಲೇ ಇದ್ದು , ಫೆಬ್ರವರಿ 1 ರಿಂದ ಈವರೆಗೆ 233 ಕರಳುಬೇನೆ ಪ್ರಕರಣಗಳು ದಾಖಲಾಗಿವೆ ಎಂದು ಐಸೊಲೇಷನ್‌ ಆಸ್ಪತ್ರೆಯ ವೈದ್ಯಾಧಿಕಾರಿಗಳು ತಿಳಿಸಿದ್ದಾರೆ.

ಕಳೆದ ವರ್ಷ ಇದೇ ಅವಧಿಯಲ್ಲಿ ಕೂಡ ಕರಳುಬೇನೆ ಪ್ರಕರಣಗಳು ಹೆಚ್ಚಿನ ಸಂಖ್ಯೆಯಲ್ಲಿ ಆಸ್ಪತ್ರೆಗೆ ದಾಖಲಾಗಿದ್ದವು. ಈ ವರ್ಷವೂ ಕರಳುಬೇನೆ ಮರುಕರುಳಿಸಿದೆ. ಕಳೆದ ಫೆಬ್ರವರಿಯಲ್ಲಿ 144 ಪ್ರಕರಣಗಳು ದಾಖಲಾಗಿದ್ದವು. ಈ ಸಂಖ್ಯೆ ಮಾರ್ಚ್‌ ಹೊತ್ತಿಗೆ 264ಕ್ಕೆ ಏರಿತ್ತು. ಆದರೆ, ಈ ವರ್ಷ ಈಗಾಗಲೇ ಕರಳುಬೇನೆ ಪ್ರಕರಣಗಳ ಸಂಖ್ಯೆ 233 ಮುಟ್ಟಿದ್ದು , ಈ ಸಂಖ್ಯೆ ಇನ್ನೂ ಹೆಚ್ಚುವ ನಿರೀಕ್ಷೆಯಿದೆ ಎಂದು ಆಸ್ಪತ್ರೆಯ ಮುಖ್ಯಾಧಿಕಾರಿ ಡಾ. ಪ್ರಭಾಕರ ಗುಪ್ತ ತಿಳಿಸಿದ್ದಾರೆ.

ಸೋಮವಾರ ಕೂಡ ಆಸ್ಪತ್ರೆಗೆ ಕರಳುಬೇನೆಯಿಂದಾಗಿ 20 ಪ್ರಕರಣಗಳು ದಾಖಲಾಗಿವೆ. ಇವರಲ್ಲಿ ಯಾರೂ ಪ್ರಾಣಾಪಾಯ ಎದುರಿಸುತ್ತಿಲ್ಲ ಎಂದು ಗುಪ್ತ ತಿಳಿಸಿದ್ದಾರೆ.

(ಇನ್ಫೋ ವಾರ್ತೆ)