ಹಂಪಿ ಕನ್ನಡ ವಿಶ್ವವಿದ್ಯಾಲಯದ ಕುಲಪತಿಯಾಗಿ ಡಾ. ಲಕ್ಕಪ್ಪಗೌಡ

ಬೆಂಗಳೂರು : ಕನ್ನಡ ಪುಸ್ತಕ ಪ್ರಾಧಿಕಾರದ ಅಧ್ಯಕ್ಷ ಡಾ. ಎಚ್‌.ಜೆ. ಲಕ್ಕಪ್ಪಗೌಡ ಅವರನ್ನು ಹಂಪಿ ಕನ್ನಡ ವಿಶ್ವವಿದ್ಯಾಲಯದ ಕುಲಪತಿಗಳನ್ನಾಗಿ ನೇಮಿಸಲಾಗಿದೆ. ಕರ್ನಾಟಕದ ರಾಜ್ಯಪಾಲರು ಹಾಗೂ ವಿಶ್ವವಿದ್ಯಾಲಯದ ಕುಲಾಧಿಪತಿಗಳೂ ಆದ ವಿ.ಎಸ್‌. ರಮಾದೇವಿ ಅವರು ಈ ಆದೇಶವನ್ನು ಹೊರಡಿಸಿದ್ದಾರೆ.

ಪ್ರತಿಷ್ಠೆಯ ಕಣವಾಗಿದ್ದ ಹಂಪಿ ವಿ.ವಿ.ಯ ಕುಲಪತಿ ಸ್ಥಾನಕ್ಕೆ ಹಲವು ಗಣ್ಯರು ಪೈಪೋಟಿ ನಡೆಸಿದ್ದರು. ಈಗ ಮಾರ್ಚ್‌ 6ರಿಂದ ಮೂರು ವರ್ಷಗಳ ಅವಧಿಗೆ ಲಕ್ಕಪ್ಪಗೌಡ ಅವರನ್ನು ಕುಲಪತಿಗಳನ್ನಾಗಿ ನೇಮಿಸಲಾಗಿದೆ. ಹಾಸನ ಜಿಲ್ಲೆಯ ಹಂಪಾಪುರ ಮೂಲದ ಲಕ್ಕಪ್ಪ ಗೌಡರು ಈ ಹಿಂದೆ ಕುವೆಂಪು ವಿಶ್ವವಿದ್ಯಾಲಯದ ಕುಲಪತಿಗಳಾಗಿಯೂ ಸೇವೆ ಸಲ್ಲಿಸಿದ್ದರು.

ಪಿ.ಯು. ಮಂಡಳಿ ನಿರ್ದೇಶಕರ ನೇಮಕ : ಐ.ಎ.ಎಸ್‌ ಅಧಿಕಾರಿ ರಾಮಪ್ರಸಾದ್‌ ಅವರನ್ನು ಪಿ.ಯು. ಮಂಡಳಿ ನಿರ್ದೇಶಕರನ್ನಾಗಿ ನೇಮಿಸಲಾಗಿದೆ.

ತಮ್ಮ ಪುತ್ರಿ ದ್ವಿತೀಯ ಪಿ.ಯು.ಸಿ. ಪರೀಕ್ಷೆ ಬರೆಯುತ್ತಿರುವ ಹಿನ್ನೆಲೆಯಲ್ಲಿ ನೈತಿಕ ಹೊಣೆಗಾರಿಕೆಯಿಂದ 45 ದಿನಗಳ ಕಾಲ ರಜೆ ಮೇಲೆ ತೆರಳಿರುವ ಸಿ.ಇ.ಟಿ. ಘಟಕ ಹಾಗೂ ಪದವಿ ಪೂರ್ವ ಶಿಕ್ಷಣ ಮಂಡಳಿ ನಿರ್ದೇಶಕ ಹರೀಶ್‌ ಗೌಡ ಅವರ ಸ್ಥಾನದಲ್ಲಿ ರಾಮಪ್ರಸಾದ್‌ ಕಾರ್ಯ ನಿರ್ವಹಿಸಲಿದ್ದಾರೆ.