ಫಸ್ಟ್‌ ರಿಯಾಕ್ಷನ್‌ ! ವೇಗವಾಗಿ ಕಾರುಗಳ ಬೆಲೆ ಇಳಿಸಿದ ಮಾರುತಿ

ನವದೆಹಲಿ : ಬಜೆಟ್‌ ಹೊರಬಿದ್ದದ್ದೇ ತಡ, ಮಾರುತಿ ಉದ್ಯೋಗ್‌ ಲಿಮಿಟೆಡ್‌ ತನ್ನ ಗ್ರಾಹಕರಿಗೆ ಸಿಹಿ ಸುದ್ದಿ ಪ್ರಕಟಿಸಿದೆ. ಬುಧವಾರದಿಂದಲೇ ಮಾರುತಿ ಕಾರುಗಳ ಬೆಲೆ ಆಯಾ ಮಾದರಿಗೆ ಅನುಗುಣವಾಗಿ 11 ಸಾವಿರ ರುಪಾಯಿಯಿಂದ 42 ಸಾವಿರ ರುಪಾಯಿವರೆಗೆ ಅಗ್ಗವಾಗಲಿದೆ ಎಂದು ಕಂಪನಿಯ ಪ್ರಕಟಣೆ ತಿಳಿಸಿದೆ.

ತೆರಿಗೆಯಲ್ಲಿ ಆಗಲಿರುವ ಕಡಿತವನ್ನು ಕಂಪನಿ ತನ್ನ ಸ್ವಾರ್ಥಕ್ಕೆ ಬಳಸಿಕೊಳ್ಳದೆ ಗ್ರಾಹಕರ ಮಿತ್ರನಾಗುವ ನಿಟ್ಟಿನಲ್ಲಿ ಈ ನಿರ್ಧಾರ ಕೈಗೊಂಡಿದೆ. ಮಾರುತಿಯ ವಿವಿಧ ಮಾದರಿಗಳ ಮೇಲೆ ಕಡಿತಗೊಳ್ಳುವ ದರ ಇಂತಿದೆ-

ಮಾರುತಿ 800 ಗೆ 11 ಸಾವಿರ ರು. ಕಡಿತ, ಬೆಲಿನೊ ಗೆ 42 ಸಾವಿರ ಕಡಿತ, ಆಲ್ಟೋಗೆ 16 ಸಾವಿರದ 500 ರುಪಾಯಿ ಕಡಿತ, ವ್ಯಾಗನ್‌ ಆರ್‌ ಗೆ 18 ರಿಂದ 19 ಸಾವಿರ, ಝೆನ್‌ಗೆ 18 ಸಾವಿರ ಕಡಿತ ಹಾಗೂ ಎಸ್ಟೀಮ್‌ ದರದಲ್ಲಿ 25 ಸಾವಿರ ಕಡಿತ ದೊರೆಯಲಿದೆ.

ಬಂಗಾರದ ಮೇಲಿನ ಸುಂಕದಲ್ಲಿ ಇಳಿಕೆ

ಕಂಪ್ಯೂಟರ್‌ ಹಾಗೂ ಟೆಲಿಕಾಂ ಸಾಧನಗಳ ಬೆಲೆಗಳನ್ನು ಕುಗ್ಗಿಸಿ ಐಟಿ ಪ್ರಿಯರ ಮೆಚ್ಚುಗೆ ಗಳಿಸಿರುವ ಕೇಂದ್ರ ಹಣಕಾಸು ಖಾತೆ ಸಚಿವ ಯಶವಂತ ಸಿನ್ಹಾ ಬಂಗಾರದ ಬೆಲೆಯಲ್ಲೂ ಇಳಿಕೆ ತರುವ ಮೂಲಕ ಹೆಂಗಳೆಯರನ್ನೂ ತೃಪ್ತಿ ಪಡಿಸಲು ಪ್ರಯತ್ನಿಸಿದ್ದಾರೆ. ಬಂಗಾರದ ಮೇಲಿನ ಸುಂಕವನ್ನು ಪ್ರತಿ 10 ಗ್ರಾಂಗೆ 400 ರುಪಾಯಿಯಿಂದ 250 ರುಪಾಯಿಗೆ ತಗ್ಗಿಸುವುದಾಗಿ ಅವರು ತಮ್ಮ ಬಜೆಟ್‌ ಭಾಷಣದಲ್ಲಿ ಘೋಷಿಸಿದ್ದಾರೆ. ಇದರಿಂದಾಗಿ, ಬಂಗಾರದ ಬೆಲೆ ಪ್ರತಿ 10 ಗ್ರಾಂಗೆ 150 ರುಪಾಯಿಯಷ್ಟು ಅಗ್ಗವಾಗಲಿದೆ. ಬಂಗಾರದ ಕಳ್ಳ ಸಾಗಣೆ ತಡೆಗಟ್ಟಲು ಈ ಕ್ರಮ ಕೈಗೊಂಡಿರುವುದಾಗಿ ಸಚಿವರು ಪ್ರಕಟಿಸಿದ್ದಾರೆ.

(ಯುಎನ್‌ಐ)