ಹೊನ್ನಾವರದಲ್ಲಿ ಮಂಗನ ಕಾಯಿಲೆ, ಐದು ಮಂದಿ ಆಸ್ಪತ್ರೆಗೆ

ಹೊನ್ನಾವರ : ಇಲ್ಲಿನ ಮಂಕಿ, ಸಂಶಿ, ಮಾಗೋಡು ಮತ್ತು ಶರಾವತಿ ಎಡದಂಡೆ ಗ್ರಾಮಗಳಲ್ಲಿ ಮಂಗಗಳು ಸಾಯುತ್ತಿರುವುದು ಕಂಡು ಬಂದಿದ್ದು, ಈ ಪ್ರದೇಶಗಳ ಆಸು ಪಾಸಿನಲ್ಲಿ ವಾಸಿಸುವ ಐದು ಮಂದಿ ವಿಪರೀತ ಜ್ವರದಿಂದ ಬಳಲುತ್ತಿದ್ದಾರೆ.

ಈಗಾಗಲೇ ಐದು ಮಂದಿಯನ್ನು ಆಸ್ಪತ್ರೆಗೆ ಸೇರಿಸಲಾಗಿದೆ. ಮಂಜು ಶಿವ ಗೌಡ(23) ಅವರ ಸ್ಥಿತಿ ಕರುಣಾಜನಕವಾಗಿದ್ದು ಅವರನ್ನು ಹುಬ್ಬಳ್ಳಿಯ ಕೆ.ಎಂ. ಸಿ ಆಸ್ಪತ್ರೆಗೆ ಸೇರಿಸಲಾಗಿದೆ. ಗೌರಿ ಮಂಜುಗೌಡ(18), ಪಾರ್ವತಿ ಸಣಕೂಸ ಗೌಡ(15), ಮಂಜು ಕೃಷ್ಣ ಗೌಡ (45), ನಾಗವೇಣಿ ಶಿವಯ್ಯ ಗೌಡ(19) ಅವರು ಹೊನ್ನಾವರದ ಸರಕಾರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಸಿದ್ಧಾಪುರದ ಕ್ಯಾದಗಿ, ಜೋಯಿಡಾಗಳಲ್ಲಿ ಮಂಗಗಳು ಸತ್ತಿವೆ. ಮಂಗ ಸತ್ತ ಸ್ಥಳದಿಂದ ಸುಮಾರು ನಾಲ್ಕು- ಐದು ಕಿ.ಮೀ. ದೂರದವರೆಗೆ ಹರಡುವ ಉಣ್ಣಿಗಳು ಮಂಗನ ಕಾಯಿಲೆಯನ್ನು ಹಬ್ಬಿಸುತ್ತವೆ.

ಶಿವಮೊಗ್ಗದ ಲಸಿಕೆ ತಯಾರಿಕಾಕೇಂದ್ರದಲ್ಲಿ , ಉಪಕರಣಗಳು ಮತ್ತು ಕಟ್ಟಡಗಳು ಸರಿಯಾಗಿಲ್ಲ ಎಂಬ ಕಾರಣಕ್ಕೆ ರಾಜ್ಯ ಔಷಧಿ ನಿಯಂತ್ರಕರು ಪರವಾನಿಗಿ ರದ್ದು ಪಡಿಸಿದ್ದಾರೆ. ಈ ಘಟಕಗಳು ಹಿಂದೆ ವರ್ಷಕ್ಕೆ ಲಕ್ಷ ಡೋಸ್‌ ಲಸಿಕೆಗಳನ್ನು ತಯಾರಿಸುತ್ತಿದ್ದವು. ಆದರೆ ಈ ಬಾರಿ ಹತ್ತು ಸಾವಿರ ಡೋಸ್‌ ಲಸಿಕೆ ತಯಾರಾಗಿದ್ದು, ಮಂಗನಕಾಯಿಲೆ ಸಂಭವನೀಯ ಪ್ರದೇಶಗಳಲ್ಲಿ ಅವುಗಳನ್ನು ವಿತರಿಸಲಾಗಿದೆ.

(ಇನ್ಫೋ ವಾರ್ತೆ)