ಬಜೆಟ್‌ - 2001.. ಬಂಡವಾಳ ಮಾರುಕಟ್ಟೆಯ ಸುತ್ತ ಗಿರಕಿ ...

ನವದೆಹಲಿ : ನೇರ ತೆರಿಗೆ - ಪರೋಕ್ಷ ತೆರಿಗೆಯಿಂದ ಆರ್ಥಿಕ ಸುಧಾರಣೆಯತ್ತ ಮುಖಮಾಡಿರುವ ಯಶವಂತಸಿನ್ಹ ಅವರ ಬಜೆಟ್‌ ಎಲ್ಲಿ ಗೆದ್ದಿದೆ ? ಎಲ್ಲಿ ಎಡವಿದೆ. ತೆರಿಗೆ ವಿನಾಯಿತಿ, ಸರಕಾರಿ ವೆಚ್ಚ, ಕೈಗಾರಿಕೆ ಮತ್ತು ಬಂಡವಾಳ ಮಾರುಕಟ್ಟೆಗೆ ಮಾತ್ರ ಅನ್ವಯಿಸುವಂತಿದೆ. ಕೃಷಿ ಕ್ಷೇತ್ರಕ್ಕೆ ಸಂಬಂಧಿಸಿದಂತೆ ಆಮದು ತೆರಿಗೆ ವಿನಾಯಿತಿ ವಿನಾ ಮತ್ತಾವ ಸುಧಾರಣೆ ಕಂಡುಬಂದಿಲ್ಲ

ಶೈತ್ಯಾಗಾರ ನಿರ್ಮಾಣಕ್ಕೆ ಮಾತ್ರ ಸಬ್ಸಿಡಿ ನೀಡಲಾಗಿದೆ. ಯೋಜನೆ ಮಂಡಳಿ ಮೂಲಕ ನೀರಾವರಿ ಸೌಲಭ್ಯ ಹೆಚ್ಚಳಕ್ಕೆ ಕ್ರಮ ಕೈಗೊಂಡಿಲ್ಲ. ನಮ್ಮ ದೇಶದ ಕೃಷಿ ಇನ್ನೂ ಮಳೆಯನ್ನೇ ಅವಲಂಬಿಸಿದೆ. ನೀರಾವರಿ ಮೇಲೆ ಹೆಚ್ಚಿನ ಗಮನ ಹರಿಸದ ಕಾರಣ ಮುಂದಿನ ದಿನಗಳಲ್ಲಿ ದೇಶ ಸಂಕಷ್ಟ ಎದುರಿಸುವ ಸ್ಥಿತಿ ಬಂದಿದೆ.

ರೈಲ್ವೆ ಬಜೆಟ್‌ನಂತೆಯೇ ಈ ಬಜೆಟ್‌ ಮೇಲೂ ಚುನಾವಣೆಯ ಗಾಳಿ ಬೀಸಿದೆ. ಡಬ್ಲ್ಯೂಟಿಓ ಆಘಾತದಿಂದ ಆಗುವ ನಷ್ಟ - ಲಾಭದ ಚರ್ಚೆ ನಡೆಯಲೇಬೇಕು. ಕೃಷಿ ಕ್ಷೇತ್ರದಲ್ಲಿ ಆಗಿರುವ ಅಭಿವೃದ್ಧಿ ಶೂನ್ಯ. ಗೊಬ್ಬರ ಬಳಕೆಯಲ್ಲಿ ನಾಲ್ಕನೇ ಸ್ಥಾನದಲ್ಲಿರುವ ರಾಷ್ಟ್ರದ ಕೃಷಿ ಕ್ಷೇತ್ರದ ಮೇಲೆ ಹೆಚ್ಚಿನ ಗಮನ ನೀಡಿದ ಬಜೆಟ್‌ ಇದು .

ಪ್ರಸಕ್ತ ಬಜೆಟ್‌ನ ಕೃಷಿ ನೀತಿಗೂ - ಯೋಜನೆ ಆಯೋಗದ ನೀತಿಗೂ ತಾಳಮೇಳ ಇಲ್ಲ. ಇಂತಹ ಕೃಷಿ ನೀತಿಯಿಂದ ಯಾವುದೇ ಪ್ರಯೋಜನ ಇಲ್ಲ. ಬುಧವಾರ ಮಂಡಿಸಲಾದ ಬಜೆಟ್‌ನಲ್ಲಿ ಕೇವಲ ಬಂಡವಾಳ ಮಾರುಕಟ್ಟೆಯ ಸುತ್ತ ಮಾತ್ರ ಗಿರಕಿ ಹೊಡೆಯುತ್ತಿದೆ.

ಬಜೆಟ್‌ನ ಮತ್ತಷ್ಟು ಮುಖ್ಯಾಂಶಗಳು : ಹೊಸ ಅಬಕಾರಿ ಸುಂಕದಲ್ಲಿ ಪಾರದರ್ಶಕತ್ವ. ನೇರ ತೆರಿಗೆ ದರದಲ್ಲಿ ಯಾವುದೇ ಬದಲಾವಣೆ ಇಲ್ಲ. ಶೇಕಡಾ 2ರಷ್ಟು ಭೂಕಂಪದ ಅಧಿಕರ, ನಷ್ಟದಲ್ಲಿರುವ ಕಂಪನಿಗಳಿಗೂ ಸಹ ಅದಾಯ ತೆರಿಗೆ ನಮೂನೆ - ವಿವರ ಸಲ್ಲಿಕೆ ಕಡ್ಡಾಯ, ಒಂದು ಲಕ್ಷಕ್ಕೂ ಕಡಿಮೆ ವೇತನ ವರಮಾನದ ವ್ಯಕ್ತಿಗಳಿಗೆ ಶೇ. 30ರ ವಿನಾಯಿತಿ.

ಡಿವಿಡೆಂಡ್‌ ತೆರಿಗೆ ಶೇ. 10ರಷ್ಟು ಇಳಿಕೆ. ಮೂಲಭೂತ ಸೌಕರ್ಯದ ಕಂಪನಿಗಳಿಗೆ 10 ವರ್ಷಗಳ ಕಾಲ ತೆರಿಗೆ ರಜೆ, ಮೂಲಭೂತ ಸೌಕರ್ಯ ಯೋಜನೆಗೆ ಆದ್ಯತೆ. ಜೈವಿಕ ತಂತ್ರಜ್ಞಾನ ಕ್ಷೇತ್ರಕ್ಕೆ ವಿಶೇಷ ಆದ್ಯತೆ, ತೆರಿಗೆ ದಾರರಿಗೆ ಸ್ನೇಹಪರ ಯೋಜನೆ, ವೈದ್ಯಕೀಯ ಹಾಗೂ ಶಿಕ್ಷಣ ಸಂಸ್ಥೆಗಳ ಆದಾಯ ನಿರ್ಧರಣೆಯ ಹಕ್ಕು ತೆರಿಗೆ ಆಯುಕ್ತರಿಗೆ.

ವಿದೇಶಿ ಚಾನೆಲ್‌ಗಳ ಮೇಲೆ ತೆರಿಗೆ ಹೇರಿಕೆ, 1.63,031 ಕೋಟಿ ರುಪಾಯಿ ತೆರಿಗೆ ನಿರೀಕ್ಷೆ.