ಬೆಂಗಳೂರು: ಕಲುಷಿತ ನೀರು ಸೇವನೆಯಿಂದ ಬಾಲಕನ ಸಾವು

ಬೆಂಗಳೂರು : ಕಲುಷಿತ ನೀರು ಸೇವನೆಯಿಂದ ನಗರದ ಅಲಸೂರಿನಲ್ಲಿ ಸೋಮವಾರ, ಒಬ್ಬ ಬಾಲಕ ಸಾವಿಗೀಡಾಗಿದ್ದು 72 ಮಂದಿ ಅನಾರೋಗ್ಯದಿಂದ ಆಸ್ಪತ್ರೆಗೆ ದಾಖಲಾಗಿದ್ದಾರೆ.

ವಾಂತಿ ಭೇದಿಯಿಂದ ನರಳುತ್ತಿದ್ದ ಜೋಗೂ ಪಾಳ್ಯದ ಪಳನಿ(4) ಎಂಬ ಬಾಲಕ ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದಿದ್ದಾನೆ. ಕಳೆದ ಎರಡು ದಿನಗಳಿಂದ ಅಲಸೂರು ಸುತ್ತ ಮುತ್ತಲಿನ ಬೈಯ್ಯಪ್ಪನಹಳ್ಳಿ, ಲಕ್ಷ್ಮೀಪುರ, ಸರಸ್ವತಿಪುರ, ಬಿನ್ನಮಂಗಲ, ಇಂದಿರಾನಗರ, ತಿಪ್ಪ ಸಂದ್ರ ಜೋಗೂಪಾಳ್ಯ ಮತ್ತಿತರ ಪ್ರದೇಶದಲ್ಲಿ ಕಲುಷಿತ ನೀರು ಕುಡಿದು 72 ಮಂದಿ ವಾಂತಿ ಭೇದಿಯಿಂದ ನರಳುತ್ತಿದ್ದಾರೆ.

ಈಗಾಗಲೇ 72 ಮಂದಿಯನ್ನು ಇಲ್ಲಿನ ಐಸೊಲೇಷನ್‌ ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ. ಕಲುಷತ ನೀರು ಸೇವಿಸಿರುವ ಇನ್ನೂ ಅನೇಕ ಮಂದಿ ಅಸ್ವಸ್ಥರಾಗಿ ಆಸ್ಪತ್ರೆಗೆ ದಾಖಲಾಗುತ್ತಿದ್ದಾರೆ. ಅಸ್ವಸ್ಥರಾದವರಲ್ಲಿ ಕಾಲರಾ ಲಕ್ಷಣಗಳು ಕಾಣಿಸಿಕೊಂಡಿರುವುದರಿಂದ ನಾಗರಿಕರು ಆತಂಕಗೊಂಡಿದ್ದಾರೆ.

ಜಲಮಂಡಲಿಯ ಕೊಳವೆಯಲ್ಲಿ ಕಲುಷಿತ ನೀರು ಮಿಶ್ರವಾಗಿ, ಅದೇ ನೀರನ್ನು ಕುಡಿದಿರುವುದರಿಂದ ನಾಗರಿಕರು ಅಸ್ವಸ್ಥರಾಗಿದ್ದಾರೆ ಎನ್ನಲಾಗಿದ್ದರೂ, ಜಲಮಂಡಲಿ ಇದನ್ನು ನಿರಾಕರಿಸಿದೆ. ಎಂ.ವಿ.ಗಾರ್ಡನ್‌ ಪ್ರದೇಶದಲ್ಲಿ ತಮಗಿಷ್ಟ ಬಂದ ಹಾಗೆ ಸಾರ್ವಜನಿಕರು ನೀರಿನ ಸಂಪರ್ಕ ತೆಗೆದುಕೊಂಡಿದ್ದಾರೆ. ಅಲ್ಲಿ ನೈರ್ಮಲ್ಯ ಇಲ್ಲದಿರುವುದರಿಂದ ನೀರು ಕಲುಷಿತವಾಗಿದೆ ಎಂದು ಜಲಮಂಡಲಿಯ ಅದ್ಯಕ್ಷ ಎಂ. ಎನ್‌. ವಿದ್ಯಾಶಂಕರ್‌ ತಮ್ಮ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

(ಇನ್ಫೋ ವಾರ್ತೆ)