ಕೋಲಾರದಲ್ಲಿ ಹರಡುತ್ತಿರುವ ಫ್ಲೋರೋಸಿಸ್‌ ರೋಗ

ಕೋಲಾರ : ಅಂತರ್ಜಲ ಮಟ್ಟದ ಕುಸಿತದಿಂದಾಗಿ ಕುಡಿಯುವ ನೀರಿನಲ್ಲಿ ಫ್ಲೋರೈಡ್‌ ಅಂಶ ಹೆಚ್ಚಾಗಿರುವುದರಿಂದ ಜಿಲ್ಲೆಯ 264 ಹಳ್ಳಿಗಳಲ್ಲಿ ವಾಸಿಸುತ್ತಿರುವ ಜನ ಫ್ಲೋರೋಸಿಸ್‌ ರೋಗದಿಂದ ಬಳಲುತ್ತಿದ್ದಾರೆ.

ಜಿಲ್ಲೆಯ ಫ್ಲೋರೋಸಿಸ್‌ ನಿಯಂತ್ರಣ ಕೇಂದ್ರದ ನಿರ್ದೇಶಕ ಕೆ. ನಾರಾಯಣ ಸ್ವಾಮಿ ಅವರ ಸಮೀಕ್ಷೆಯ ಪ್ರಕಾರ ಸುಮಾರು 18 ಸಾವಿರ ಮಂದಿ ಫ್ಲೋರೋಸಿಸ್‌ ವ್ಯಾಧಿ ಪೀಡಿತರಾಗಿರುವುದು ಕಂಡು ಬಂದಿದೆ. ಜಿಲ್ಲೆಯ ಬಾಗೇಪಲ್ಲಿ ಮತ್ತು ಗುಡಿಬಂಡೆ ತಾಲ್ಲೂಕುಗಳಲ್ಲಿ ಅಂತರ್ಜಲ ಮಟ್ಟ 500 ಅಡಿಗಿಂತಲೂ ಆಳಕ್ಕೆ ಹೋಗಿದೆ. ಇದರಿಂದಾಗಿ ಜಿಲ್ಲೆಯಲ್ಲಿ ದಂತದ ಫ್ಲೋರೋಸಿಸ್‌ ಮತ್ತು ಎಲುಬಿನ ಫ್ಲೋರೋಸಿಸ್‌ ರೋಗ ಹಬ್ಬಿದೆ.

ಫ್ಲೋರೋಸಿಸ್‌ ವ್ಯಾಧಿ ತಕ್ಷಣ ಕಾಣಿಸಿಕೊಳ್ಳುವಂತಹುದಲ್ಲ. ಕಳೆದ ಐದಾರು ವರ್ಷಗಳಲ್ಲಿ ಅತರ್ಜಲ ಮಟ್ಟ ಆಳಕ್ಕೆ ಇಳಿಯುತ್ತಿದ್ದುದರಿಂದ ಕುಡಿಯುವ ನೀರಿನಲ್ಲಿ ಫ್ಲೋರೈಡ್‌ ಅಂಶ ಹೆಚ್ಚಾಗಿದ್ದು, ಕ್ರಮೇಣ ಈ ರೋಗ ಬೇರೂರಿದೆ. ಇದು ನಿಧಾನವಾಗಿ ಪ್ರಾಣ ತೆಗೆಯುವ ಖಾಯಿಲೆ. ಅಲ್ಲದೆ ಇನ್ನೂ ಅಲ್ಲಿನ ಜನ ಫ್ಲೋರೈಡ್‌ ಅಂಶ ಜಾಸ್ತಿಯಾಗಿರುವ ನೀರನ್ನೇ ಕುಡಿಯುತ್ತಿರುವುದರಿಂದ ರೋಗಿಗಳ ಸಂಖ್ಯೆ ದಿನೇ ದಿನೇ ಹೆಚ್ಚುತ್ತಿದೆ.

ಕೋಲಾರದ ಬಾಗೇಪಲ್ಲಿ ತಾಲ್ಲೂಕಿನ ಚೇಳೂರು, ಬಾಗೇಪಲ್ಲಿ ಕಸಬಾ, ಪಾತಪಾಳ್ಯ, ಗೂಳೂರು ಮತ್ತು ಗುಡಿಬಂಡೆಯ ಮಿಟ್ಟೇಮರಿ ಪ್ರದೇಶಗಳಲ್ಲಿ ಫ್ಲೋರೋಸಿಸ್‌ ರೋಗಿಗಳ ಸಂಖ್ಯೆ ಹೆಚ್ಚಾಗಿದೆ ಎಂದು ಸಮೀಕ್ಷೆ ವಿವರಿಸಿದೆ.

(ಇನ್ಫೋ ವಾರ್ತೆ)