ಒಣಹವೆ ನಡುವೆ ಭೀಮೆಯಲ್ಲಿ ಕಾಣಿಸಿದ ತನುವು

ರಾಜ್ಯಾದ್ಯಂತ ಒಣಹವೆ ಮುಂದುವರಿದಿದ್ದ ಭಾನುವಾರ, ವಿಶೇಷ ರಾಜಕೀಯ ಚಟುವಟಿಕೆಗಳಿಲ್ಲದ ದಿನ. ಪ್ರಸ್ತುತ, ರಾಜಕೀಯ ಚಟುವಟಿಕೆಗಳೇನಿದ್ದರೂ ಕೊಲ್ಲಿಗೇ ಸೀಮಿತ. ಅಪ್ಪನಿಗೆ ತಕ್ಕ ಮಗ ಬುಷ್‌ ಅಮೆರಿಕದ ಅಧ್ಯಕ್ಷರಾಗುತ್ತಿದ್ದಂತೆಯೇ ನಿರೀಕ್ಷೆಯಂತೆ ಇರಾಕ್‌ನ ನಿದ್ದೆ ಕೆಟ್ಟಿದೆ. ಇರಾಕ್‌ ಬಾನಂಗಳದಲ್ಲಿ ಅಮೆರಿಕ, ಇಂಗ್ಲೆಂಡ್‌ನ ಫೈಟರ್‌ ವಿಮಾನಗಳು ಸುಸ್ತಿಲ್ಲದೆ ಗಸ್ತು ಸುತ್ತುತ್ತಿವೆ. ಅದೆಲ್ಲಾ ದೂರದ ವಿದ್ಯಮಾನ ಎಂದು ಇರುವಂತಿಲ್ಲ . ಮತ್ತೆ ಜಾಗತಿಕ ಶಾಂತಿ ಕದಡುತ್ತಿದೆ. ಸ್ವಾವಲಂಬಿ ಅನ್ನುವ ಪದಕ್ಕೆ ಅರ್ಥವೇ ಇಲ್ಲದ ಜಮಾನದಲ್ಲಿ ಇಂಥಾ ವಿದ್ಯಮಾನಗಳು ನೆಮ್ಮದಿ ತರುವಂಥವಲ್ಲ .

ಸದ್ಯಕ್ಕೆ, ಬಿಜಾಪುರ ಜಿಲ್ಲೆಯ ಸುತ್ತಮುತ್ತಲಿನ ಜನರ ಕುಡಿಯುವ ನೀರಿನ ಸಮಸ್ಯೆಗೆ ತಾತ್ಕಾಲಿಕ ಉತ್ತರ ಸಿಕ್ಕಿದೆ. ಮಹಾರಾಷ್ಟ್ರ ಸರ್ಕಾರ ಹಿಡಿದಿಟ್ಟಿದ್ದ ನೀರನ್ನು ಬಿಟ್ಟಿದೆ. ಇದರಿಂದಾಗಿ ಬಿರಿದಿದ್ದ ಭೀಮೆಯಲ್ಲಿ ತನುವು ಕಾಣಿಸಿದೆ. ಇನ್ನಷ್ಟು ನೀರನ್ನು ಬಿಡುವಂತೆ ಮಹಾರಾಷ್ಟ್ರ ಮುಖ್ಯಮಂತ್ರಿಗಳಿಗೆ ಮನವಿ ಮಾಡುವುದಾಗಿ ಜಿಲ್ಲಾ ಉಸ್ತುವಾರಿ ಸಚಿವರು ಹೇಳಿದ್ದಾರೆ. ಮುಂದಿನ ದಿನಗಳಲ್ಲಿ ಸಮಸ್ಯೆಯ ಶಾಶ್ವತ ಪರಿಹಾರ ಕ್ರಮಗಳತ್ತ ಸರ್ಕಾರ ಮುಂದಾಗುತ್ತದೆಂದು, ಬ್ಯಾರೇಜುಗಳನ್ನು ನಿರ್ಮಿಸುತ್ತದೆಂದು ಹಾರೈಸುವ.

ಭಾನುವಾರ ರಾಜ್ಯದ ತಾಪಮಾನದಲ್ಲಿ ಉಬ್ಬರವಿಳಿತಗಳು ಎದ್ದು ಕಾಣುವಂತಿರಲಿಲ್ಲ . ಕರಾವಳಿ ಹಾಗೂ ಉತ್ತರ ಕರ್ನಾಟಕದ ಕೆಲವು ಪ್ರದೇಶಗಳಲ್ಲಿ ಕನಿಷ್ಠ ತಾಪಮಾನ ಕುಸಿದಿತ್ತು . ಸದ್ಯಕ್ಕೆ ಇಂಥದ್ದೇ ಹವೆ ರಾಜ್ಯದಲ್ಲಿ ಮುಂದುವರಿಯಲಿದೆ. ಬೆಂಗಳೂರಿನಲ್ಲಿ ಶುಭ್ರಾಕಾಶ.