ಗಂಗೂಲಿ ನಾಗದೋಷ ಪೂಜೆಗೆ ಜೊತೆಯಾದ ಸಿನಿಮಾ ನಟಿ ನಗ್ಮಾ !

ಚೆನ್ನೈ : ಭಾರತ ಕ್ರಿಕೆಟ್‌ ತಂಡದ ನಾಯಕ ಸೌರವ್‌ ಗಂಗೂಲಿ ಕಾಳಹಸ್ತಿಗೆ ಹೋಗಿ ಪೂಜೆ ಸಲ್ಲಿಸಿದ್ದು ಬಹುಭಾಷಾ ತಾರೆ ನಗ್ಮಾ ಜೊತೆಯಲ್ಲಿ.

ಕೋಲ್ಕತ ಪ್ರಿನ್ಸ್‌ ಗಂಗೂಲಿ, ಕುಟುಂಬದವರ ವಿರೋಧದ ನಡುವೆಯೂ ಬಾಲ್ಯದ ಗೆಳತಿ ಡೋನಾ ಅವರನ್ನು ಬಾಳಸಂಗಾತಿಯಾಗಿ ಸ್ವೀಕರಿಸಿದ್ದು ನಿಮಗೆ ಗೊತ್ತೇ ಇದೆ. ಗಂಗೂಲಿ ಜೊತೆ ಗುರುವಾರದವರೆಗೂ ಚೆನ್ನೈನಲ್ಲಿದ್ದ ಡೋನಾ, ನಂತರ ಕೊಲ್ಕತಾಗೆ ತೆರಳಿದ್ದಾರೆ. ಅದರ ಮರುದಿನವೇ ನಗ್ಮಾ ಜೊತೆಯಲ್ಲಿ ಗಂಗೂಲಿ ಕಾಳಹಸ್ತಿ ಈಶ್ವರನ ದೇವಸ್ಥಾನದಲ್ಲಿ ನಾಗದೋಷ ಪರಿಹಾರ ಪೂಜೆ ಸಲ್ಲಿಸಿದ್ದಾರೆ.

ಶನಿವಾರ ಚೆನ್ನೈ ತುಂಬೆಲ್ಲಾ ಮಾಧ್ಯಮಗಳು ಎಬ್ಬಿಸಿದ ಗಂಗೂಲಿ ಧೂಳೇ ತೇಲುತ್ತಿತ್ತು. ಪ್ರಶ್ನೆಗಳನ್ನು ಕೇಳಹೊರಟ ಸುದ್ದಿಗಾರರಿಗೆ ಗಂಗೂಲಿ ಕೊಟ್ಟ ಉತ್ತರ - ನಮ್ಮ ಕೋಚ್‌ ಜಾನ್‌ರೈಟ್‌, ಮಾಧ್ಯಮದವರೊಂದಿಗೆ ದಿನಾ ಮಾತನಾಡಬೇಡ ಎಂದಿದ್ದಾರೆ. ವೈಯಕ್ತಿಕ ಪ್ರಶ್ನೆಗಳಿಗೆ ನೋ ಆನ್ಸರ್ಸ್‌. ಏನು ಕೇಳಬೇಕಿದ್ದರೂ ಕ್ರಿಕೆಟ್‌ ಬಗ್ಗೆ ಮಾತ್ರ ಕೇಳಿ.

ಕೋಲ್ಕತಾ ರಾಜಕುಮಾರ, ಭಾರತದ ಉತ್ತಮ ಬ್ಯಾಟ್ಸ್‌ಮನ್‌ ಗೊತ್ತಿದ್ದೂ ಗೊತ್ತಿದ್ದೂ ಇಂಥ ರಂಪಕ್ಕೆ ಸಿಲುಕುತ್ತಿರುವುದು ವಿಪರ್ಯಾಸವೇ ಸರಿ. ಊಹಾಪೋಹಗಳಿಗೆ ಎಡೆಮಾಡಿಕೊಡದೆ ಆದಷ್ಟು ಬೇಗ ಅವರು ಸರಿಯಾದ ಉತ್ತರ ಕಕ್ಕುವುದು ಒಳಿತು. ಅವರ ಕೆರಿಯರ್‌ ದೃಷ್ಟಿಯಿಂದಲೂ ಕೂಡಾ.

(ಇನ್ಫೋ ವಾರ್ತೆ)

ವಾರ್ತಾಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...