ಕಡಲ ತಡಿಯ ಮಂಗಳೂರು ವಿವಿಯಲ್ಲಿ ಕಪ್ಪೆ ಚಿಪ್ಪುಗಳ ಸಾಲ್ಗಳು

ಮಂಗಳೂರು : ಮಂಗಳ ಗಂಗೋತ್ರಿಯಲ್ಲಿ ಮೂರು ದಿನಗಳ ಸಮುದ್ರ ಚಿಪ್ಪುಗಳ ಪ್ರದರ್ಶನ ಶನಿವಾರ ಆರಂಭವಾಗಿದೆ. ಕಡಲ ತಡಿಯಲ್ಲೇ ಇರುವ ವಿಶ್ವ ವಿದ್ಯಾಲಯದಲ್ಲಿ ಸಾಲು ಸಾಲಾಗಿ ಇಟ್ಟಿದ್ದ ರಾಶಿ ಚಿಪ್ಪುಗಳ ಪ್ರದರ್ಶನ ಕಾರ್ಯಕ್ರಮವನ್ನು ಮೈಸೂರು ವಿಶ್ವ ವಿದ್ಯಾಲಯದ ಉಪ ಕುಲಪತಿ ಪ್ರೊ. ಎಸ್‌. ಎನ್‌. ಹೆಗ್ಡೆ ಉದ್ಘಾಟಿಸಿದರು.

ವಿಶ್ವ ವಿದ್ಯಾಲಯದಲ್ಲಿ ಉಪನ್ಯಾಸಕರು ವೇತನ , ಭತ್ಯೆಗಳ ಬಗ್ಗೆ ಮಾತ್ರ ತಲೆ ಕೆಡಿಸಿಕೊಳ್ಳಬಾರದು. ಪಾಠೇತರ ಚಟುವಟಿಕೆಗಳಲ್ಲಿ ಸ್ವತಃ ಆಸಕ್ತಿ ವಹಿಸಬೇಕು. ಅಲ್ಲದೆ ಪಶ್ಚಿಮ ಘಟ್ಟಗಳು ಮತ್ತು ಅರೇಬಿಯನ್‌ ಸಮುದ್ರದಲ್ಲಿನ ಜೀವ ವೈವಿಧ್ಯದ ಬಗ್ಗೆ ಅಧ್ಯಯನ ನಡೆಸಬೇಕಾದ ತುರ್ತು ಈಗ ಎದುರಾಗಿದೆ. ಇದು ವಿದ್ಯಾರ್ಥಿಗಳಿಗೊಂದು ಉತ್ತಮ ಅವಕಾಶ ಎಂದು ಉದ್ಘಾಟನಾ ಭಾಷಣದಲ್ಲಿ ಹೆಗ್ಡೆ ಹೇಳಿದರು.

ಚಿಪ್ಪು ಪ್ರದರ್ಶನಾ ಕಾರ್ಯಕ್ರಮ ಮೂರು ದಿನಗಳ ಕಾಲ ನಡೆಯಲಿದೆ. ಅಪರೂಪವಾಗಿ ಕಾಣ ಸಿಗುವ ಚಿಪ್ಪುಗಳ ಸಂಗ್ರಹವನ್ನೆಲ್ಲಾ ನೀವು ಇಲ್ಲಿ ನೋಡಬಹುದು. ಚಿಪ್ಪುಗಳ ವೈವಿಧ್ಯಗಳ ಬಗ್ಗೆ ಅಧ್ಯಯನ ನಡೆಸಲು ಯೋಗ್ಯವಾಗಿರುವ ಈ ಸಂಗ್ರಹವನ್ನು ಒಂದು ಕಡೆ ನೋಡಲು ಸಿಗುವುದು ಅಪರೂಪ. ಮಂಗಳೂರು ವಿಶ್ವ ವಿದ್ಯಾಲಯದಲ್ಲಿ ಆರಂಭವಾಗಿರುವ ಈ ವಸ್ತು ಪ್ರದರ್ಶನ ಈ ನಿಟ್ಟಿನಲ್ಲಿ ಶ್ಲಾಘನಾರ್ಹ.

ಈ ವಸ್ತು ಪ್ರದರ್ಶನದ ಆಯೋಜಕ ವಿವಿಯ ಪ್ರಾಣಿ ಶಾಸ್ತ್ರ ವಿಭಾಗದ ಉಪನ್ಯಾಸಕ ಮಂಜೇಶ್ವರ ಮುಕುಂದ ಪ್ರಭುಗಳು. ಸಮುದ್ರವಾಸಿಗಳ ಚಿಪ್ಪು ಸಂಗ್ರಹವನ್ನೇ ಹವ್ಯಾಸವನ್ನಾಗಿರಿಸಿಕೊಂಡವರು . ಪ್ರದರ್ಶನದಲ್ಲಿರುವ ಚಿಪ್ಪು ಸಂಗ್ರಹ ಮುಕುಂದ ಪ್ರಭುಗಳ ಸ್ವಂತ ಸಂಗ್ರಹವಾಗಿದ್ದು, ಮಂಗಳ ಗಂಗೋತ್ರಿಯ ಉಪ ಕುಲಪತಿ ಎಸ್‌. ಗೋಪಾಲ್‌ ಅವರನ್ನು ಅಭಿನಂದಿಸಿದರು. ಕಾರ್ಯಕ್ರಮದಲ್ಲಿ ಡಾ. ರಾಜಶೇಖರ್‌ ಉಪಸ್ಥಿತರಿದ್ದರು.