ಎಸ್‌ಟಿಎಫ್‌ ಯೋಧನ ಗನ್‌ನಿಂದ ಸಿಡಿದ ಗುಂಡಿಗೆ ಬಾಲಕಿ ಬಲಿ

ಚಾಮರಾಜನಗರ : ವೀರಪ್ಪನ್‌ ಶಿಕಾರಿಯಲ್ಲಿ ನಿರತವಾಗಿರುವ ಎಸ್‌.ಟಿ.ಎಫ್‌. ಸಿಬ್ಬಂದಿ ವ್ಯಾನಿನಲ್ಲಿ ಕುಳಿತು ತನ್ನ ಬಂದೂಕನ್ನು ಸ್ವಚ್ಛಗೊಳಿಸುವ ಸಂದರ್ಭದಲ್ಲಿ ಅಕಸ್ಮಾತ್‌ ಸಿಡಿದ ಗುಂಡು ಶಾಲಾ ಬಾಲಕಿಯಾಬ್ಬಳನ್ನು ಬಲಿ ತೆಗೆದುಕೊಂಡಿದೆ. ಈ ಘಟನೆ ತಾಲೂಕಿನ ರಾಮಾಪುರ ಸಮೀಪದ ಜಲ್ಲಿ ಪಾಳ್ಯದಲ್ಲಿ ಗುರುವಾರ ಸಂಭವಿಸಿದೆ.

ಘಟನೆಯಲ್ಲಿ ಮೃತಪಟ್ಟ ಶಾಲಾ ಬಾಲಕಿಯ ಸೋದರ ಕೂಡ ಗಾಯಗೊಂಡಿದ್ದಾನೆ. ಘಟನೆಯಿಂದ ಗ್ರಾಮಸ್ಥರು ಆಕ್ರೋಶಗೊಂಡ ಪರಿಣಾಮವಾಗಿ ರಾಮಾಪುರ ಹಾಗೂ ಜಲ್ಲಿಪಾಳ್ಯದಲ್ಲಿ ಕೆಲಕಾಲ ಉದ್ರಿಕ್ತ ಪರಿಸ್ಥಿತಿ ಉಂಟಾಗಿತ್ತು. ಜಲ್ಲಿಪಾಳ್ಯದಲ್ಲಿ ವೀರಪ್ಪನ್‌ ಬೇಟೆಗಾಗಿ ಶೋಧಕಾರ್ಯದಲ್ಲಿ ತೊಡಗಿರುವ ಎಸ್‌.ಟಿ.ಎಫ್‌. ಜವಾನನ ಬಂದೂಕಿನಿಂದ ಸಿಡಿದ ಗುಂಡು ಹತ್ತಿರದ ಶಾಲಾ ಆವರಣದಲ್ಲಿದ್ದ ಬಾಲಕಿ ಕೋಕಿಲಳ ಸಾವಿಗೆ ಕಾರಣವಾಗಿದ್ದಲ್ಲದೆ, ಆಕೆಯ ಸೋದರ ಸುರೇಶ ತೀವ್ರವಾಗಿ ಗಾಯಗೊಳ್ಳುವಂತೆ ಮಾಡಿತು. ಈಗ ಸುರೇಶ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾನೆ.

ತಾನು ಬಂದೂಕನ್ನು ಒರೆಸುತ್ತಿದ್ದಾಗ ಅಕಸ್ಮಾತ್‌ ಟ್ರಿಗರ್‌ ಗುಂಡಿಗೆ ಕೈ ತಗುಲಿ ಗುಂಡು ಸಿಡಿಯಿತು ಎಂದು ಯೋಧ ವಿಚಾರಣ ಸಂದರ್ಭದಲ್ಲಿ ತಿಳಿಸಿದ್ದಾರೆ. ತನಿಖೆ ನಡೆಯುತ್ತಿದೆ. ವೀರಪ್ಪನ್‌ ಹಾಗೂ ಆತನ ತಂಡದವರ ಮೇಲೆ ಗುಂಡು ಹಾರಿಸುವುದನ್ನು ಬಿಟ್ಟು ನಿರ್ಲಕ್ಷ್ಯದಿಂದ ಅಮಾಯಕರನ್ನು ಬಲಿ ತೆಗೆದುಕೊಳ್ಳುತ್ತಿರುವ ಎಸ್‌.ಟಿ.ಎಫ್‌. ಸಿಬ್ಬಂದಿ ಮೇಲೆ ಗ್ರಾಮಸ್ಥರು ರೊಚ್ಚಿಗೆದ್ದಿದ್ದರು.

ನಿರ್ಲಕ್ಷ್ಯದಿಂದ ಬಾಲಕಿಯ ಸಾವಿಗೆ ಕಾರಣನಾದ ಯೋಧನನ್ನು ಬಂಧಿಸಲಾಗಿದೆ. ಪೊಲೀಸ್‌ ವರಿಷ್ಠಾಧಿಕಾರಿ ಎಸ್‌.ಎಸ್‌. ಅಣ್ಣೇಗೌಡ ಹಾಗೂ ಮತ್ತಿತರ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ, ಗ್ರಾಮಸ್ಥರನ್ನು ಸಮಾಧಾನ ಪಡಿಸಿದರು.

ವಾರ್ತಾಸಂಚಯ
ಮುಖಪುಟ / ವೀರಪ್ಪನ್‌ ಶಿಕಾರಿ