ಬೆಂಗಳೂರಿನಲ್ಲಿ ಶೀಘ್ರದಲ್ಲೇ ಯಂತ್ರದ ಮೂಲಕ ಪಾಸ್‌ಪೋರ್ಟ್‌

ಬೆಂಗಳೂರು : ಯಂತ್ರದ ಮೂಲಕ ಪಾಸ್‌ಪೋರ್ಟ್‌ ವಿತರಿಸುವ ದೇಶದ ಪ್ರಥಮ ನಗರ ಎಂಬ ಖ್ಯಾತಿ ಸದ್ಯದಲ್ಲೇ ಬೆಂಗಳೂರಿನದಾಗಲಿದೆ ಎಂದು ವಿದೇಶಾಂಗ ಕಾರ್ಯದರ್ಶಿ ಲಲಿತ್‌ ಮಾನ್‌ ಸಿಂಗ್‌ ಹೇಳಿದ್ದಾರೆ.

ಅವರು, ಪಾಸ್‌ಪೋರ್ಟ್‌ ಮಾಹಿತಿ ಕಿಯೋಸ್ಕನ್ನು ನಗರದ ಪಾಸ್‌ಪೋರ್ಟ್‌ ಕಚೇರಿಯಲ್ಲಿ ಗುರುವಾರ ಉದ್ಘಾಟಿಸಿ ಮಾತನಾಡುತ್ತಿದ್ದರು. ಈಗಾಗಲೇ ದೆಹಲಿಯಲ್ಲಿ ಪಾಸ್‌ಪೋರ್ಟ್‌ ಕಚೇರಿಯಲ್ಲಿ ಮಾಹಿತಿ ಕಿಯೋಸ್ಕ್‌ನ್ನು ಪ್ರಾಯೋಗಿಕವಾಗಿ ಆರಂಭಿಸಲಾಗಿದೆ ಎಂದರು.

ಇತ್ತೀಚೆಗೆ ತಾನೆ ಮಂಗಳೂರಿನಲ್ಲಿ ಪಾಸ್‌ಪೋರ್ಟ್‌ ಅರ್ಜಿ ಸಲ್ಲಿಸುವ ಕೇಂದ್ರ ಸ್ಥಾಪಿಸಲಾಗಿದೆ. ಬೇಡಿಕೆಯಿದ್ದರೆ ರಾಜ್ಯದಲ್ಲಿ ಹೊಸದಾಗಿ ಪಾಸ್‌ಫೋರ್ಟ್‌ ಕಚೇರಿಗಳನ್ನು ತೆರೆಯಲಾಗುವುದು. ಅಲ್ಲದೆ ಪಾರ್ಸ್‌ಪೋರ್ಟ್‌ ಪಡೆಯುವ ಪ್ರಕ್ರಿಯೆಯನ್ನು ಸರಳಗೊಳಿಸಲಾಗಿದೆ. ಆದಷ್ಟು ಬೇಗನೇ ಅರ್ಜಿಗಳನ್ನು ವಿಲೇವಾರಿ ಮಾಡಲು ಅನುಕೂಲವಾಗುವಂತೆ ಪಾಸ್‌ಪೋರ್ಟ್‌ ಅಧಿಕಾರಿಗಳನ್ನು ನೇಮಿಸಲಾಗಿದೆ ಎಂದು ಲಲಿತ್‌ ಮಾನಸಿಂಗ್‌ ಈ ಸಂದರ್ಭದಲ್ಲಿ ಹೇಳಿದರು.

ಕಿಯೋಸ್ಕನ್ನು ಎಬಿಬಿ ಗ್ರೂಪ್‌ ನಾಲ್ಕು ಲಕ್ಷ ರೂಪಾಯಿ ವೆಚ್ಚದಲ್ಲಿ ನಿರ್ಮಿಸಿದೆ. ಇದು ಅರ್ಜಿಗಳ ನವೀಕರಣ ಮತ್ತಿತರ ವಿಷಯಗಳ ಬಗ್ಗೆ ಮಾಹಿತಿ ನೀಡಲಿದೆ. ತಮ್ಮ ಅರ್ಜಿಯು ಪರಿಶೀಲನೆಯ ಯಾವ ಹಂತದಲ್ಲಿದೆ ಎಂದೂ ಅರ್ಜಿದಾರರು ಈ ಯಂತ್ರದ ಮೂಲಕ ಪರಿಶೀಲಿಸಬಹುದು.

(ಇನ್ಫೋ ವಾರ್ತೆ)