ಭುಜ್‌ : ಪರಿಕರಗಳಲ್ಲಿ ಸಿಕ್ಕಿ ಬಿದ್ದಿದ್ದ 26 ಕೋಟಿ ರು. ಬಾಂಡ್‌ ಪತ್ತೆ

ಭುಜ್‌ : ಕಂಪನದಿಂದ ಕುಸಿದಿರುವ ಕಟ್ಟಡಗಳ ಪರಿಕರಗಳಡಿಯಲ್ಲಿ ಸಿಕ್ಕಿಬಿದ್ದಿದ್ದ 26 ಕೋಟಿ ರುಪಾಯಿ ಮೌಲ್ಯದ ಸರ್ಕಾರಿ ಬಾಂಡ್‌ಗಳನ್ನು ಸೇನಾ ಸಿಬ್ಬಂದಿ ಹುಡುಕಿ ತೆಗೆದಿದ್ದಾರೆ.

ಎಂಜಿನಿಯರ್‌ ರೆಜಿಮೆಂಟ್‌-12 ತಂಡ ಈ ಅಪಾರ ಮೊತ್ತದ ಬಾಂಡ್‌ಗಳನ್ನು ಶತಾಯಗತಾಯ ಯತ್ನಿಸಿ ಹೆಕ್ಕಿ ತೆಗೆದಿದ್ದಾರೆ. ಎಂಜಿನಿಯರ್‌ ರೆಜಿಮೆಂಟ್‌- 108 ತಂಡ ಸುಮಾರು 12 ಕೆಜಿ ತೂಕದ ತಾಮ್ರ ಹಾಗೂ ಕಂಚಿನ ಹಳೆ ಕಾಲದ ನಾಣ್ಯಗಳನ್ನು ಹುಡುಕಿದ್ದಾರೆ. ಯಾವುದೋ ಒಬ್ಬ ವ್ಯಕ್ತಿ ಸಂಗ್ರಹಿಸಿರುವ ಈ ಅಪರೂಪದ ನಾಣ್ಯಗಳು ಈಗ ಪೊಲೀಸ್‌ ವಶದಲ್ಲಿವೆ. ಈ ಮೊದಲು ಇದೇ ಸೇನಾ ತಂಡ ಸುಮಾರು 1 ಕಿಲೋ ತೂಕದ ಚಿನ್ನ ಹಾಗೂ ಬೆಳ್ಳಿ ಹೆಕ್ಕಿ ತೆಗೆದಿದ್ದರು.

ಕಛ್‌ನಲ್ಲಿ ದಾಖಲೆ ಲಘು ಭೂಕಂಪಗಳು : ಕಛ್‌ನಲ್ಲಿ ಭೂತಾಯಿ ಇನ್ನೂ ಶಾಂತಳಾಗಿಲ್ಲ. ಬುಧವಾರದಿಂದ ಈವರೆಗೆ 11 ಲಘು ಭೂಕಂಪಗಳು ಸಂಭವಿಸಿದ್ದು, ಈ ಪ್ರದೇಶದಲ್ಲಿ ಈವರೆಗೆ ಒಟ್ಟು 325 ಲಘು ಭೂಕಂಪಗಳು (ಜನವರಿ 26ರಿಂದ) ಸಂಭವಿಸಿದಂತಾಗಿದೆ. ರಿಕ್ಟಾರ್‌ ಮಾಪಕದಲ್ಲಿ ಈ ಲಘು ಕಂಪನಗಳ ತೀವ್ರತೆ 3 ರಿಂದ 3.8ರಷ್ಟು ದಾಖಲಾಗಿದೆ.

ಒಂದೇ ದಿನದಲ್ಲಿ ಎಲ್‌ಐಸಿ ಹಣ ವಿತರಣೆ : ಕಂಪನದಲ್ಲಿ ಮೃತಪಟ್ಟಿರುವ ವಿಮಾದಾರರ ಕುಟುಂಬದವರಿಗೆ ವಿಮಾ ಮೊತ್ತವನ್ನು ತ್ವರಿತವಾಗಿ ವಿತರಿಸಲು ಎಲ್‌ಐಸಿ ವಿಶೇಷ ಘಟಕಗಳನ್ನು ತೆರೆದಿದೆ. ವಿಳಂಬ ಹಣ ವಿತರಣೆಯಿಂದ ಜನ ರೋಸಿ ಹೋಗುವಂತೆ ಮಾಡಿದೆ ಎಂಬ ಆಪಾದನೆಯನ್ನೂ ಹೊತ್ತಿರುವ ಸಂಸ್ಥೆ ಈಗ ಕ್ಷಿಪ್ರ ಕಾರ್ಯಾಚರಣೆಗೆ ಹೆಸರುವಾಸಿಯಾಗಿದೆ. ಸೂರತ್ತಿನ ಘಟಕ ಒಂದೇ ದಿನದಲ್ಲಿ 8.75 ಲಕ್ಷ ರುಪಾಯಿ ವಿಮಾ ಹಣವನ್ನು ಹಕ್ಕುದಾರರಿಗೆ ನೀಡಿದೆ. ಎಲ್‌ಐಸಿಯ ಸೂರತ್‌ನ ವಿಭಾಗಾಧಿಕಾರಿ ಜಿ.ಎಂ.ಸದ್ದಳಿಗಿ ಈ ವಿಷಯ ತಿಳಿಸಿದರು.

(ಯುಎನ್‌ಐ)

ಮುಖಪುಟ