ಹುಬ್ಬಳ್ಳಿ : ಕೆಎಸ್‌ಆರ್‌ಟಿಸಿ ಚಾಲಕರಿಂದ 2 ತಾಸು ಮಿಂಚಿನ ಮುಷ್ಕರ

(ಹುಬ್ಬಳ್ಳಿ- ಧಾರವಾಡ ಪ್ರತಿನಿಧಿಯಿಂದ)

ಹುಬ್ಬಳ್ಳಿ : ಸಿಗ್ನಲ್‌ ಉಲ್ಲಂಘಿಸಿದ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ಬಸ್‌ ಚಾಲಕನೊಬ್ಬನ ಮೇಲೆ ಸಂಚಾರಿ ಪೊಲೀಸರು ಹಲ್ಲೆ ಮಾಡಿದ ಹಿನ್ನೆಲೆಯಲ್ಲಿ ಕ್ರುದ್ಧರಾದ ಬಸ್‌ ಚಾಲಕರು ಗುರುವಾರ ಎರಡು ತಾಸುಗಳ ಕಾಲ ರಸ್ತೆ ತಡೆ ನಡೆಸಿದರು. ಇದರಿಂದಾಗಿ ಸಾರಿಗೆ ವ್ಯವಸ್ಥೆ ಅಸ್ತವ್ಯಸ್ತಗೊಂಡು ಪ್ರಯಾಣಿಕರು ತೊಂದರೆ ಅನುಭವಿಸಿದರು.

ಬೆಳಗ್ಗೆ ಸರಿ ಸುಮಾರು 10 ಗಂಟೆಯ ವೇಳೆ ಸಿಗ್ನಲ್‌ ತಡೆಯನ್ನು ತಪ್ಪಿಸಿ ಮುನ್ನಡೆದ ಕೆಎಸ್‌ಆರ್‌ಟಿಸಿ ಬಸ್‌ ಚಾಲಕನನ್ನು ಹಿಂಬಾಲಿಸಿದ ಪೊಲೀಸರು ತರಾಟೆಗೆ ತೆಗೆದುಕೊಂಡರು. ಆತನ ಮೇಲೆ ಪೊಲೀಸರು ಹಲ್ಲೆ ನಡೆಸಿದರೆಂಬ ಕಾರಣಕ್ಕೆ ಚಾಲಕರು ಹಾಗೂ ನಿರ್ವಾಹಕರು ಮಿಂಚಿನ ಮುಷ್ಕರ ಪ್ರಾರಂಭಿಸಿದರು. ವಾಹನಗಳು ಇದ್ದಕ್ಕಿದ್ದಂತೆ ನಿಂತಲ್ಲೇ ನಿಂತು ಬಿಟ್ಟವು. ನಗರದ ಕಿತ್ತೂರು ಚೆನ್ನಮ್ಮ ವೃತ್ತದ ಬಳಿ ಚಾಲಕರು ಹಾಗೂ ನಿರ್ವಾಹಕರು ಜಮಾಯಿಸಿದರು.

ಎರಡು ತಾಸುಗಳ ನಂತರ ನಗರ ಪೊಲೀಸ್‌ ಆಯುಕ್ತರು ಬಂದು, ಹಲ್ಲೆ ಮಾಡಿರುವ ಪೊಲೀಸ್‌ ಅಧಿಕಾರಿ ವಿರುದ್ಧ ಸೂಕ್ತ ಕ್ರಮ ಜರುಗಿಸುವ ಭರವಸೆ ಕೊಟ್ಟ ನಂತರ ಮಧ್ಯಾಹ್ನ 12.30 ಗಂಟೆ ಹೊತ್ತಿಗೆ ಮುಷ್ಕರ ನಿಂತಿತು.

ಇದು ಹೊಸದೇನಲ್ಲ. ಇತ್ತೀಚೆಗೆ ರಸ್ತೆ ಸಾರಿಗೆ ಸಂಸ್ಥೆ ಚಾಲಕರನ್ನು ಪೊಲೀಸರು ಗೋಳು ಹೊಯ್ದುಕೊಳ್ಳುವುದು ಹೆಚ್ಚುತ್ತಿದೆ. ಇದು ಹೀಗೇ ಮುಂದುವರೆದರೆ ಪರಿಸ್ಥಿತಿ ನೆಟ್ಟಗಿರದು ಎಂದು ಸಾರಿಗೆ ಸಂಸ್ಥೆ ನೌಕರರ ಸಂಘದ ಅಧ್ಯಕ್ಷ ಆರ್‌.ಎಫ್‌.ಕವಳಿಕಾಯಿ ಎಚ್ಚರಿಕೆ ಕೊಟ್ಟರು.