ಹನ್ನೆರಡು ತಿಂಗಳಲ್ಲಿ 20 ಸಾವಿರ ಬಿಡಿಎ ಸೈಟು ವಿತರಣೆ - ಕೃಷ್ಣ

ಬೆಂಗಳೂರು : ಜನ ಸಾಮಾನ್ಯರು ಮಹಾನಗರದಲ್ಲಿ ನಿವೇಶನ ಖರೀದಿಸುವುದು ಕಷ್ಟ ಸಾಧ್ಯವಾದುದರಿಂದ ನಿವೇಶನ ವಿತರಿಸುವ ವೇಗವನ್ನು ಬೆಂಗಳೂರು ಮಹಾ ನಗರ ಪಾಲಿಕೆ ವೃದ್ಧಿಸಿಕೊಳ್ಳಲಿದೆ ಎಂದು ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ಹೇಳಿದ್ದಾರೆ.

ಕೃಷ್ಣ ಅವರ ಮಾತನ್ನು ನಂಬುವುದಾದರೆ, ಕಳೆದ 14 ತಿಂಗಳಲ್ಲಿ ಕೇವಲ 10 ಸಾವಿರ ನಿವೇಶನಗಳನ್ನು ವಿತರಿಸುವಲ್ಲಿ ಮಾತ್ರ ಯಶಸ್ವಿಯಾಗಿರುವ ಬಿಡಿಎ, ಪ್ರಸಕ್ತ ಸಾಲಿನಲ್ಲಿ 20 ಸಾವಿರ ನಿವೇಶನಗಳನ್ನು ವಿತರಿಸಲಿದೆ. ಆದರೆ, ಈ ಹಿಂದಿನ 14 ವರ್ಷಗಳಲ್ಲಿ ಬಿಡಿಎ ಕೇವಲ 4 ಸಾವಿರ ನಿವೇಶನಗಳನ್ನು ವಿತರಿಸಿತ್ತು .

ನಿಮ್ಹಾನ್ಸ್‌ ಅವರಣದಲ್ಲಿ ಕೊಳಗೇರಿ ವಾಸಿಗಳಿಗೆ ನಿರ್ಮಿಸಲು ಉದ್ದೇಶಿಸಿರುವ 277 ಮನೆಗಳ ಶಂಕುಸ್ಥಾಪನೆಯನ್ನು ಗುರುವಾರ ನೆರವೇರಿಸಿ ಮುಖ್ಯಮಂತ್ರಿ ಮಾತನಾಡುತ್ತಿದ್ದರು. ಬಿಡಿಎ ಸೈಟಿಗಾಗಿ ಏಳೆಂಟು ಅರ್ಜಿ ಹಾಕಿ, ವರ್ಷಗಳಿಂದ ಚಪ್ಪಲಿ ಸವೆಸುತ್ತಿರುವವರು ನಿರಾಶರಾಗಬೇಕಿಲ್ಲ . ಅವರಿಗೆಲ್ಲ ನಿವೇಶನ ದೊರೆಯಲಿದೆ ಎಂದು ಕೃಷ್ಣ ಹೇಳಿದರು. ಅಂದಹಾಗೆ, ನಿವೇಶನಕ್ಕಾಗಿ ಸರತಿಯಲ್ಲಿರುವವರ ಸಾಲಿನಲ್ಲಿ ನೀವಿದ್ದೀರಾ ?

(ಇನ್ಫೋ ವಾರ್ತೆ)