ಏನೂ ವಿಶೇಷವಿಲ್ಲ ಎಂದರೆ ನಂಬುವಿರಾ ?

ವಿಶೇಷಗಳಿಲ್ಲದ ದಿನ ಯಾವುದು ? ಅಂಥಾ ಒಂದು ದಿನಕ್ಕಾಗಿ ಬೆಂಗಳೂರು ಸೇರಿದ ಜಗತ್ತು ಎದುರು ನೋಡುತ್ತಿದೆ. ಕಳೆದೊಂದು ವಾರವಿಡೀ ಬೆಂಗಳೂರು ಬಾನಿನಲ್ಲಿ ಧೂಳೆಬ್ಬಿಸಿದ್ದ ಏರೋ ಇಂಡಿಯಾ- 2001, ಇತಿಹಾಸದ ಪುಟಗಳಲ್ಲಿ ಸಂದು, ನಾಳೆಯ ವಿಶೇಷವೇನು ಅನ್ನುತ್ತಿದ್ದಂತೆ ಎದುರಾದುದು ಪ್ರೇಮಿಗಳ ದಿನ.

ಪ್ರೇಮಿಗಳ ಉತ್ಸಾಹಕ್ಕಿಂತ, ಆಚರಣೆಗೆ ಕೆಲವರು ವ್ಯಕ್ತ ಪಡಿಸಿದ ವಿರೋಧವೇ ಹೆಚ್ಚು ಪ್ರಚಾರ ಪಡೆದಿದೆ. ಆದರೆ, ಪ್ರೇಮಿಗಳ ಪಾಲಿಗೆ ಈ ವಿರೋಧಕ್ಕೆ ಯಾವ ಕಿಮ್ಮತ್ತೂ ಇಲ್ಲ . ಅವರ ಪ್ರೇಮ ಅವರದು. ಬೆಳಿಗ್ಗೆ 11 ರ ಹೊತ್ತಿಗಾಗಲೇ ಮಾರುಕಟ್ಟೆಯಲ್ಲಿ ಕೆಂಪು ಗುಲಾಬಿಗಳ ಸರಕು ಮುಗಿದಿತ್ತು . ಬೆಂಗಳೂರಿನಿಂದ, ಭಾರತದ ಪ್ರಮುಖ ನಗರಗಳಿಗೆ ಮಾತ್ರವಲ್ಲದೆ ವಿಶ್ವದ ಅನೇಕ ಮೂಲೆಗಳಿಗೂ ಗುಲಾಬಿಗಳು ರಫ್ತಾಗಿವೆಯಂತೆ. ಅಲ್ಲಿಗೆ, ವಿಶ್ವದ ಎಲ್ಲೆಡೆಗೂ ರಾಜ್ಯದಿಂದ ಪ್ರೀತಿಯ ರವಾನೆ ಆದಂತಾಯಿತು.

ಏನೂ ವ್ಯತ್ಯಾಸವಿಲ್ಲದಂತೆ ಸಾಗುತ್ತಿರುವುದು ರಾಜ್ಯದ ಹವೆ ಮಾತ್ರ. ಬುಧವಾರ, ಒಣಹವೆಯಲ್ಲಿ ವ್ಯತ್ಯಾಸವೇನೂ ಇರಲಿಲ್ಲ . ಕರಾವಳಿ ಸೇರಿದಂತೆ ರಾಜ್ಯದ ಹಲವು ಭಾಗಗಳ ಕನಿಷ್ಠ ತಾಪಮಾನದಲ್ಲಿ ಕೊಂಚ ವ್ಯತ್ಯಾಸವಿತ್ತು . ಬೆಳಗಾವಿ ವಿಮಾನ ನಿಲ್ದಾಣದಲ್ಲಿ ದಿನದ ಕನಿಷ್ಠ ಉಷ್ಣಾಂಶ 11.9 ಡಿಗ್ರಿ ಸೆಲ್ಷಿಯಸ್‌ ದಾಖಲಾಗಿತ್ತು . ಹವಾಮಾನ ಇಲಾಖೆಯ ಮುನ್ಸೂಚನೆಯಂತೆ, ನಾಳೆ ನಾಳಿದ್ದೂ ಒಣಹವೆ ಮುಂದುವರಿಯಲಿದೆ. ಬೆಂಗಳೂರಿನಲ್ಲಿ ಶುಭ್ರಾಕಾಶ. ಗುರುವಾರ 17 ಡಿಗ್ರಿ ಸೆಲ್ಷಿಯಸ್‌ ಆಸುಪಾಸಿನಲ್ಲಿ ಉಷ್ಣಾಂಶ ಸುಳಿದಾಡುತ್ತಿರುತ್ತದೆ.