ಜರ್ಮನಿ ಮಾರುಕಟ್ಟೆಗೆ ಕಿರ್ಲೋಸ್ಕರ್‌ ಮಲ್ಟಿ ಮೀಡಿಯಾ

ಬರ್ಲಿನ್‌ : ಭಾರತದ ಕಂಪ್ಯೂಟರ್‌ ತಂತ್ರಜ್ಞಾನ ಕಂಪನಿಗಳಲ್ಲಿ ಒಂದಾದ ಕಿರ್ಲೋಸ್ಕರ್‌ ಮಲ್ಟಿ ಮೀಡಿಯಾ ಗ್ರೂಪ್‌ ಜರ್ಮನ್‌ ಭಾಷೆಯಲ್ಲೇ ಮಕ್ಕಳ ಶಿಕ್ಷಣ ಸಾಫ್ಟ್‌ವೇರ್‌ ಸಿದ್ಧಪಡಿಸಿದ್ದು, ಅದನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡುವ ಸಿದ್ಧತೆಯಲ್ಲಿದೆ.

ಬೆಂಗಳೂರು ಮೂಲದ ಕಿರ್ಲೋಸ್ಕರ್‌ ಮಲ್ಟಿ ಮೀಡಿಯಾ ಸಂಸ್ಥೆಯು ಮೇ ಅಥವಾ ಜೂನ್‌ ತಿಂಗಳೊಳಗೆ ಬರ್ಲಿನ್‌ನಲ್ಲಿಯೇ ತನ್ನ ಸಂಸ್ಥೆಯ ಕಚೇರಿಯಾಂದನ್ನು ಸಹ ತೆರೆಯುವ ತಯಾರಿಯಲ್ಲಿದೆ. ಅಮೆರಿಕದಲ್ಲಿ ಇತ್ತೀಚೆಗಷ್ಟೇ ತೆರೆಯಲಾದ ಕಂಪನಿ ಕಚೇರಿಗೆ ಉತ್ತಮ ಪ್ರತಿಕ್ರಿಯೆ ದೊರೆತಿರುವ ಹಿನ್ನೆಲೆಯಲ್ಲಿ ತನ್ನ ಕಾರ್ಯ ವಾಪ್ತಿಯನ್ನು ವಿಸ್ತರಿಸುವ ನಿಟ್ಟಿನಲ್ಲಿ ಕಿರ್ಲೋಸ್ಕರ್‌ ಮಲ್ಟಿ ಮೀಡಿಯಾ ಗ್ರೂಪ್‌ ಯೋಜಿಸಿದೆ.

ಈ ಉತ್ತೇಜನದಿಂದ ಪ್ರೇರಿತವಾಗಿರುವ ಸಂಸ್ಥೆ ಯುರೋಪ್‌ ಮಾರುಕಟ್ಟೆಯನ್ನು ಪ್ರವೇಶಿಸುವ ಇರಾದೆಯನ್ನೂ ಹೊಂದಿದೆ. ಈ ವಿಷಯವನ್ನು ಕಿರ್ಲೋಸ್ಕರ್‌ನ ವ್ಯವಸ್ಥಾಪಕ ನಿರ್ದೇಶಕ ಅಜಯ್‌ ಕಿರ್ಲೋಸ್ಕರ್‌ ಇಲ್ಲಿ ತಿಳಿಸಿದ್ದಾರೆ. ಜರ್ಮನಿಯಲ್ಲಿ ತಮ್ಮ ವಹಿವಾಟು ವಿಸ್ತರಿಸುವ ಬಗ್ಗೆ ಮೊದಲಿನಿಂದಲೂ ತಮಗೆ ಆಸಕ್ತಿ ಇತ್ತು ಎಂದು ಹೇಳಿರುವ ಅವರು, ಬರ್ಲಿನ್‌ನಲ್ಲಿ ಕಾರ್ಯಾರಂಭ ಮಾಡುವ ಕಚೇರಿಯು ಜರ್ಮನಿ, ಆಸ್ಟ್ರೇಲಿಯಾ ಹಾಗೂ ಸಿಟ್ಜರ್‌ಲೆಂಡ್‌ ರಾಷ್ಟ್ರಗಳ ಜತೆಗಿನ ವಹಿವಾಟಿಗೆ ಹೆಚ್ಚಿನ ಆದ್ಯತೆ ನೀಡಲಿದೆ ಎಂದೂ ತಿಳಿಸಿದ್ದಾರೆ.

ನಾಲ್ಕರಿಂದ ಹನ್ನೆರಡು ವರ್ಷಗಳ ವಯೋಮಿತಿಯ ಮಕ್ಕಳಿಗಾಗಿ ಸಂಸ್ಥೆ ಜರ್ಮನ್‌ ಭಾಷೆಯಲ್ಲಿ ಶೈಕ್ಷಣಿಕ ಸಿಡಿ ರೋಮ್‌ಗಳನ್ನು ತಯಾರಿಸಿ, ಮಾರುಕಟ್ಟೆಗೆ ಬಿಡುಗಡೆ ಮಾಡುತ್ತಿದೆ.