ಫೆಬ್ರವರಿ 17ರ ಸಂಜೆ ಗಾನವಿನೋದಿನಿ ನಗಿಸಲಿದೆ, ನಕ್ಕುಬಿಡಿ

ಬೆಂಗಳೂರು : ಮಿಮಿಕ್ರಿ ಕಲಾವಿದ ದಯಾನಂದ್‌, ಗಾಯಕ ಸತ್ಯನಾರಾಯಣ, ಅಶ್ವಥ್‌ ನಾರಾಯಣ, ವೆಂಕಟಾದ್ರಿ ಮೊದಲಾದ ಸುಮಾರು 20 ಕಲಾವಿದರು ಫೆಬ್ರವರಿ 17ರ ಸಂಜೆ ರವೀಂದ್ರ ಕಲಾಕ್ಷೇತ್ರದಲ್ಲಿ ಸಹೃದಯರನ್ನು ಹೊಟ್ಟೆ ಹುಣ್ಣಾಗುವಂತೆ ನಗಿಸಲಿದ್ದಾರೆ.

ಗಾನವಿನೋದಿನಿ ತಂಡ ತನ್ನ ದ್ವಿತೀಯ ದಶಮಾನೋತ್ಸವದ ಅಂಗವಾಗಿ ಮಿಮಿಕ್ರಿ, ನಾಯಕ, ಮೈಮ್‌, ಹಾಡು, ಸಂಗೀತ ಮೊದಲಾದ ಸ್ಪಾಂಟೇನಿಯಸ್‌ ಮನೋರಂಜನೆ ‘ನಗೆ ಮಲ್ಲಿಗೆ- 2001’ರಲ್ಲಿ ಬಿಚ್ಚಿಕೊಳ್ಳಲಿದೆ. ಆ ಮೂಲಕ ತನ್ನ 1035ನೇ ಪ್ರಯೋಗ ಹೊಮ್ಮಿಸಲಿದೆ. ಹಾಸ್ಯಪ್ರಜ್ಞಾ ಮನಸ್ಕರು ಒಂದೆಡೆ ಸೇರಿ, ತಾವೂ ನಕ್ಕು ಸಹೃದಯರನ್ನೂ ನಗಿಸಲು ಸಜ್ಜಾಗಿದ್ದಾರೆ. ಇವರಿಗೆ ಅ.ರಾ.ಮಿತ್ರ, ಬೀಚಿ, ರಾ.ಶಿ., ನಾ.ಕಸ್ತೂರಿ, ದಾಶರಥಿ ದೀಕ್ಷಿತ್‌, ಜಿ.ಪಿ.ರಾಜರತ್ನಂ, ಪರ್ವತವಾಣಿ ಮೊದಲಾದವರ ಬರಹಗಳು ನಗಿಸುವ ಸರಕುಗಳಾಗಲಿವೆ.

ಗಾನವಿನೋದಿನಿ ಕಾರ್ಯದರ್ಶಿ ಎಂ.ಆರ್‌.ಸುಬ್ಬರಾಜು ಸೋಮವಾರ ಸುದ್ದಿಗೋಷ್ಠಿಯಲ್ಲಿ ಈ ನಗೆ ಹಂಚುವ ಸುದ್ದಿಯನ್ನು ಕೊಟ್ಟರು. ನೀವೂ ಹಾಸ್ಯಪ್ರಾಜ್ಞಿಗಳಾಗಿದ್ದಲ್ಲಿ ಕಾರ್ಯಕ್ರಮ ನೋಡಿ ಹೊಟ್ಟೆ ತುಂಬಾ ನಗಬಹುದು. ಟಿಕೆಟ್ಟಿನ ಬೆಲೆ ಬರೇ 20 ರುಪಾಯಿ.

(ಇನ್ಫೋ ವಾರ್ತೆ)