ಮೈಸೂರು ಚಾಮುಂಡೇಶ್ವರಿ ಸನ್ನಿಧಿಯಲ್ಲಿ ಜಯಲಲಿತಾ

ಮೈಸೂರು : ತಮಿಳುನಾಡಿನ ಮಾಜಿ ಮುಖ್ಯಮಂತ್ರಿ ಜಯಲಲಿತಾ ತಮ್ಮ ಗೆಳತಿ ಶಶಿಕಲಾ ನಟರಾಜ್‌ ಅವರೊಂದಿಗೆ ಮೈಸೂರಿನಲ್ಲಿ ಪ್ರತ್ಯಕ್ಷರಾದರು. ಮೈಸೂರು ಒಡೆಯರ ಕುಲದೇವತೆ ಶ್ರೀಚಾಮುಂಡೇಶ್ವರಿ ಸನ್ನಿಧಿಗೆ ಭೇಟಿ ನೀಡಿ, ವಿಶೇಷ ಪೂಜೆ ಸಲ್ಲಿಸಿದರು.

ಭಾನುವಾರ ಬೆಳಗ್ಗೆ 7 ಗಂಟೆಯ ಸಮಯದಲ್ಲಿ ಬೆಟ್ಟಕ್ಕೆ ಬಂದ ಜಯಲಲಿತಾ ಸುಮಾರು 4 ಲಕ್ಷ ರುಪಾಯಿ ಮೌಲ್ಯದ ಚಿನ್ನಾಭರಣಗಳನ್ನು ದೇವಿಗೆ ಕಾಣಿಕೆಯಾಗಿ ನೀಡಿದರು. ಹತ್ತು ಸಾವಿರ ರುಪಾಯಿಗಳನ್ನು ಹುಂಡಿಗೆ ಹಾಕಿದರು. 25 ವರ್ಷಗಳಿಂದ ತಾವು ಬಾಕಿ ಉಳಿಸಿಕೊಂಡಿದ್ದ ಹಲವು ಹರಕೆಗಳನ್ನು ಜಯಲಲಿತಾ ತೀರಿಸಿದರು.

ಇದು ಸಂಪೂರ್ಣ ತಮ್ಮ ಖಾಸಗಿ ಭೇಟಿ, ನಾನು ಈ ಸಂದರ್ಭದಲ್ಲಿ ಮತ್ತೇನೂ ಹೇಳಲು ಇಚ್ಛಿಸುವುದಿಲ್ಲ. ದೇವರ ದರ್ಶನಕ್ಕೆ ಬಂದಿದ್ದೇನೆ. ಸೂಕ್ತ ವೇದಿಕೆಯಲ್ಲಿ , ಸಮಯ ಬಂದಾಗ ಮಾತನಾಡುವೆ, ಕ್ಷಮಿಸಿ ಎಂದು ಕನ್ನಡದಲ್ಲೇ ಹೇಳಿ ಕಾರು ಹತ್ತಿದರು.

ಜಯಲಲಿತಾ ಅವರ ಅನಿರೀಕ್ಷಿತ ಭೇಟಿಯ ಹಿನ್ನೆಲೆಯಲ್ಲಿ ವಿಶೇಷ ಸುದ್ದಿಯನ್ನು ಅರಸಿ ಬೆಟ್ಟ ಹತ್ತಿದ ಪತ್ರಕರ್ತರಿಗೆ ಮತ್ತಾವುದೇ ವಿಶೇಷ ಸಮಾಚಾರ ಸಿಗಲೇ ಇಲ್ಲ. ಮುಂಬರುವ ತಮಿಳುನಾಡು ಚುನಾವಣೆಯ ಬಗ್ಗೆಯೂ ಅವರು ಚಕಾರ ಎತ್ತಲಿಲ್ಲ.

ಬರಲಿರುವ ಚುನಾವಣೆ ಎದುರಿಸುವ ಮುನ್ನ ಜಯಲಲಿತಾ ಚಾಮುಂಡೇಶ್ವರಿಯವರ ಆಶೀರ್ವಾದಕ್ಕಾಗಿ ಇಲ್ಲಿಗೆ ಬಂದಿದ್ದರು ಎಂಬುದಷೇ ಸುದ್ದಿ. ಜಯಲಲಿತಾ ಅವರಿಗೆ ಬಿಗಿ ಬಂದೋಬಸ್ತ್‌ ನೀಡಲಾಗಿತ್ತು. ಜಯಲಲಿತಾ ಅವರ ಭೇಟಿಯ ವಿಷಯವನ್ನು ಅತ್ಯಂತ ಗೌಪ್ಯವಾಗಿ ಇಡಲಾಗಿತ್ತು.