ಏ.15ರಿಂದ ಬೆಂಗಳೂರಲ್ಲಿ ಬಯೋ ಡಾಟ್‌ ಕಾಂ 2001

ಬೆಂಗಳೂರು : ವಿಜ್ಞಾನ ಮತ್ತು ವಾಣಿಜ್ಯದ ನಡುವೆ ಸ್ನೇಹಸೇತುವಾಗಿ ಕ್ರಾಂತಿಯನ್ನೇ ಸೃಷ್ಟಿಸುವುದೆಂದು ನಿರೀಕ್ಷಿಸಲಾಗಿರುವ ಬಯೋ ಡಾಟ್‌ ಕಾಂ 2001 ಏಪ್ರಿಲ್‌ 15ರಿಂದ 17ರವರೆಗೆ ಬೆಂಗಳೂರಿನಲ್ಲಿ ಜರುಗಲಿದೆ. ಈ ವಿಷಯವನ್ನು ಕರ್ನಾಟಕದ ಮಾಹಿತಿ ತಂತ್ರಜ್ಞಾನ ಕಾರ್ಯದರ್ಶಿ ವಿವೇಕ್‌ ಕುಲಕರ್ಣಿ ಅವರು ಸುದ್ದಿಗೋಷ್ಠಿಯಲ್ಲಿ ಸೋಮವಾರ ಪ್ರಕಟಿಸಿದರು.

ಭಾರತದ ಜೀವತಂತ್ರಜ್ಞಾನ ಕ್ಷೇತ್ರದಲ್ಲಿ ಆಗಿರುವ ಅತ್ಯಾಧುನಿಕ ಆವಿಷ್ಕಾರಗಳ ಬಗ್ಗೆ ಈ ಕಾರ್ಯಕ್ರಮ ಬೆಳಕು ಚೆಲ್ಲಲಿದ್ದು, ಆಸಕ್ತರಿಗೆ ಅರಿವು ಮೂಡಿಸಲಿದೆ ಎಂದರು. 2001ನೇ ಸಾಲಿನಲ್ಲಿ ಅಂದಾಜು 2.5 ಬಿಲಿಯನ್‌ ಅಮೆರಿಕನ್‌ ಡಾಲರ್‌ ಹಾಗೂ 2010ನೇ ಸಾಲಿನ ಹೊತ್ತಿಗೆ 4.5 ಬಿಲಿಯನ್‌ ಅಮೆರಿಕನ್‌ ಡಾಲರ್‌ಗಳ ಮಾರುಕಟ್ಟೆ ವ್ಯಾಪ್ತಿಯನ್ನು ಗಳಿಸಲಿದ್ದು, ಸ್ಪರ್ಧಾತ್ಮಕ ಯುಗದಲ್ಲಿ ಜೈವಿಕ ತಂತ್ರಜ್ಞಾನ ಮಾರುಕಟ್ಟೆ, ಸವಾಲು ಎದುರಿಸಲು ಸಜ್ಜಾಗಿದೆ ಎಂದರು.

ಕರ್ನಾಟಕ ಸರಕಾರ ನೇಮಕ ಮಾಡಿರುವ ಜೈವಿಕ ತಂತ್ರಜ್ಞಾನ ವಿಭಾಗದ ವಿಷನ್‌ ಗ್ರೂಪ್‌ ಈ ಕಾರ್ಯಕ್ರಮವನ್ನು ಸಂಘಟಿಸಿದೆ. ಈ ಸಂದರ್ಭದಲ್ಲಿ ಜೈವಿಕ ತಂತ್ರಜ್ಞಾನ ಕ್ಷೇತ್ರದ ಇತ್ತೀಚಿನ ಆವಿಷ್ಕಾರಗಳ ಹಾಗೂ ಉತ್ಪನ್ನಗಳ ಪ್ರದರ್ಶನ ಹಾಗೂ ಮಾರಾಟ ಸಹ ಏರ್ಪಡಿಸಲಾಗಿದೆ.

(ಯು.ಎನ್‌.ಐ)