ಮಾಜಿ ಸಚಿವ ಜೀವರಾಜ ಆಳ್ವ ದೇಹಸ್ಥಿತಿ ಗಂಭೀರ

ಬೆಂಗಳೂರು : ಮಾಜಿ ಶಿಕ್ಷಣ ಸಚಿವ ಡಾ. ಜೀವರಾಜ ಆಳ್ವ ಶ್ವಾಸಕೋಶದ ತೊಂದರೆಯಿಂದ ಬಳಲುತ್ತಿದ್ದು ಅವರನ್ನು ಬೆಂಗಳೂರಿನ ಮಣಿಪಾಲ್‌ ಆಸ್ಪತ್ರೆಗೆ ಸೇರಿಸಲಾಗಿದೆ. ಬಹು ದಿನಗಳಿಂದ ಅನಾರೋಗ್ಯದಿಂದ ಬಳಲುತ್ತಿರುವ ಆಳ್ವರ ದೇಹಸ್ಥಿತಿ ಭಾನುವಾರದಿಂದ ಗಂಭೀರವಾಗಿದೆ ಎಂದು ಆಸ್ಪತ್ರೆ ಮೂಲಗಳು ತಿಳಿಸಿವೆ.

ಇತ್ತೀಚೆಗಷ್ಟೇ ವಿದೇಶದಿಂದ ಆಗಮಿಸಿದ್ದ ಆಳ್ವ ಅವರು ಕಳೆದ ಕೆಲವು ತಿಂಗಳುಗಳಿಂದ ಮೆದುಳು ಸಂಬಂಧಿ ವ್ಯಾಧಿಯಿಂದ ಬಳಲುತ್ತಿದ್ದರು. ಮಲ್ಯ ಹಾಗೂ ಮಣಿಪಾಲ ಆಸ್ಪತ್ರೆಯಲ್ಲಿ ಚಿಕಿತ್ಸೆಯನ್ನೂ ಪಡೆಯುತ್ತಿದ್ದರು. ಆದರೆ, ಭಾನುವಾರ ಮಧ್ನಾಹ್ನ ಆಳ್ವ ಉಸಿರಾಟದ ತೊಂದರೆಯಿಂದ ನರಳಿದಾಗ ಅವರನ್ನು ಆಸ್ಪತ್ರೆಗೆ ಸೇರಿಸಲಾಯಿತು.

ಆಳ್ವ ಅವರನ್ನು ತೀವ್ರ ನಿಗಾ ಘಟಕದಲ್ಲಿ ಇಡಲಾಗಿದ್ದು, ಕೃತಕ ಉಸಿರಾಟ ಸಾಧನ ಅಳವಡಿಸಲಾಗಿದೆ. ಡಾ. ಸುಭಾಷ್‌ಚಂದ್ರ ಅವರು ಆಳ್ವರನ್ನು ಉಪಚರಿಸುತ್ತಿದ್ದಾರೆ ಎಂದು ಆಳ್ವರ ಆಪ್ತ ಸಹಾಯಕ ಮೋವಿನ್‌ ತಿಳಿಸಿದ್ದಾರೆ.

ಹೆಗಡೆ ಭೇಟಿ : ತಮ್ಮ ಆತ್ಮೀಯ ಹಾಗೂ ಕಟ್ಟಾ ಬೆಂಬಲಿಗ ಡಾ. ಆಳ್ವ ಅನಾರೋಗ್ಯದ ವಿಷಯ ತಿಳಿದು ಆಸ್ಪತ್ರೆಗೆ ಭೇಟಿ ನೀಡಿದ ಮಾಜಿ ಮುಖ್ಯಮಂತ್ರಿ ರಾಮಕೃಷ್ಣ ಹೆಗಡೆ ಅವರು ತಮ್ಮ ಗೆಳೆಯನ ಯೋಗಕ್ಷೇಮದ ಬಗ್ಗೆ ವಿಚಾರಿಸಿದರು. ಹುಟ್ಟು ಹೋರಾಟಗಾರರಾದ ಆಳ್ವ ಶೀಘ್ರ ಗುಣಮುಖರಾಗುತ್ತಾರೆ ಎಂಬ ನಂಬಿಕೆ ತಮಗಿದೆ ಎಂದರು.