ಏರುತ್ತಿರುವ ಬಿಸಿಲು, ಗಿರಿಧಾಮದ ಅನ್ವೇಷಣೆ...

ಬೆಂಗಳೂರು :ಮೊನ್ನೆ ಮೊನ್ನೆಯವರೆಗೆ ಕುಲಾವಿ ತೊಟ್ಟು, ಶಾಲು ಹೊದ್ದು ಚಳಿಯಪ್ಪ ಚಳಿ, ಯಾವಾಗ ಬಿಸಿಲು ಕಂಡೇವೋ ಎನ್ನಿಸಿಬಿಟ್ಟಿದೆ ಎನ್ನುತ್ತಿದ್ದವರೆಲ್ಲಾ ಕಳೆದೆರಡು ಮೂರು ದಿನದಿಂದ ಅದೇನು ಬಿಸಿಲಪ್ಪ, ಫೆಬ್ರವರೀಲೇ ಹೀಗಾದ್ರೆ, ಇನ್ನು ಮೇ, ಜೂನ್‌ನಲ್ಲಿ ಕತೆ ಏನು?

ನಾವು ಬದುಕಕ್ಕೆ ಆಗತ್ಯೆ? ಏರ್‌ ಕಂಡೀಷನ್‌ ಸಿಟಿ ಬೆಂಗಳೂರಲ್ಲೇ ಈ ಪಾಟಿ ಬಿಸಿಲಾದ್ರೆ, ಇನ್ನು ಬೇರೆ ಕಡೆ ಮಾತೇನು ಎಂದು ಪ್ರಶ್ನಿಸುತ್ತಿದ್ದಾರೆ. ಕೆಲವರು ಆಗಲೇ, ಬರಲಿರುವ ಬೇಸಿಗೆಗೆ ಹೆದರಿ, ಊಟಿ, ಕೊಡೈಕೆನಾಲ್‌, ಶಿಮ್ಲಾದತ್ತ ಪ್ರಯಾಣ ಬೆಳೆಸುವ ತರಾತುರಿಯಲ್ಲಿದ್ದಾರೆ. ಇನ್ನು ಕೆಲವರು ಹೊಸ ಗಿರಿಧಾಮಗಳ ಅನ್ವೇಷಣೆಯಲ್ಲಿ ತೊಡಗಿದ್ದಾರೆ.

ಈ ಮಧ್ಯೆ ರಾಜ್ಯದಲ್ಲಿ ಒಣಹವೆ ಮುಂದುವರಿದಿದೆ. ಕರಾವಳಿ ಹಾಗೂ ಉತ್ತರ ಒಳನಾಡಿನಲ್ಲಿ ತಾಪಮಾನದಲ್ಲಿ ಅಲ್ಪ ಬದಲಾವಣೆ ಆಗಿದ್ದರೆ, ದಕ್ಷಿಣ ಒಳನಾಡಿನಲ್ಲಿ ಕನಿಷ್ಠ ತಾಪಮಾನದಲ್ಲಿ ಏರಿಕೆ ದಾಖಲಾಗಿದೆ. ಉಳಿದಂತೆ ರಾಜ್ಯದ ಹವಾಮಾನದಲ್ಲಿ ಹೆಚ್ಚಿನ ಬದಲಾವಣೆಗಳೇನೂ ಕಂಡುಬಂದಿಲ್ಲ.

ರಾಜ್ಯದ ಅತಿ ಕನಿಷ್ಠ ಉಷ್ಣಾಂಶ ಗುಲ್ಬರ್ಗಾದಲ್ಲಿ 12.4 ಡಿಗ್ರಿ ಸೆಲ್ಸಿಯಸ್‌ ಇತ್ತು. ಮುನ್ಸೂಚನೆಯ ರೀತ್ಯ ರಾಜ್ಯಾದ್ಯಂತ ಒಣಹವೆ ಮುಂದುವರಿಯಲಿದೆ. ಸ್ಥಳೀಯ ಹವಾಮಾನ - ಶುಭ್ರ ಆಕಾಶ. ಕನಿಷ್ಠ ತಾಪಮಾನ 17ಡಿಗ್ರಿ ಆಸುಪಾಸಿನಲ್ಲಿರುತ್ತದೆ ಎನ್ನುತ್ತದೆ.