ರಾಜ್ಯದ ಹೊಸ ರೈಲ್ವೇ ಯೋಜನೆಗಳು ಸದ್ಯದಲ್ಲಿಯೇ ಸಂಪೂರ್ಣ

ಮಂಗಳೂರು : ಹಾಸನ- ಮಂಗಳೂರು ಗೇಜ್‌ ಬದಲಾವಣೆ ಮತ್ತು ಹುಬ್ಬಳ್ಳಿ- ಅಂಕೋಲಾ ಹೊಸ ರೈಲು ಮಾರ್ಗ ಯೋಜನೆ ಸೇರಿದಂತೆ ಶೀಘ್ರದಲ್ಲಿಯೇ ಆಗಬೇಕಾಗಿರುವ ರೈಲ್ವೇ ಕಾಮಗಾರಿಗಳ ಅಗತ್ಯವನ್ನು ಕೇಂದ್ರ ಮತ್ತು ರಾಜ್ಯ ಸರಕಾರಗಳು ಪೂರೈಸಲಿವೆ ಎಂದು ಕೇಂದ್ರ ಮಂತ್ರಿ ವಿ.ಧನಂಜಯ್‌ ಕುಮಾರ್‌ ಹೇಳಿದ್ದಾರೆ.

ಶುಕ್ರವಾರ ಪುತ್ತೂರಿನಲ್ಲಿ ಸುದ್ದಿಗಾರರೊಡನೆ ಮಾತನಾಡುತ್ತಿದ್ದ ಅವರು ರಾಜ್ಯ ರೈಲ್ವೇ ಅಭಿವೃದ್ಧಿ ನಿಗಮವು ಈ ಯೋಜನೆಗಳಿಗೆ ಹಣ ಒದಗಿಸಲು ಪ್ರಯತ್ನಿಸುತ್ತಿದೆ. ರಾಜ್ಯ ಸರಕಾರದ ಮನವಿಯನ್ನು ಕೇಂದ್ರ ಅರ್ಥ ಮಂತ್ರಿ ಶೀಘ್ರವೇ ಪರಿಶೀಲಿಸಿ ಪರಿಗಣಿಸುವರು ಎಂದು ಅವರು ಹೇಳಿದರು.

70 ಕೋಟಿ ರೂಪಾಯಿ ವೆಚ್ಚದ ಮಂಗಳೂರು -ಬೆಂಗಳೂರು ರೈಲು ಮಾರ್ಗದ ಗೇಜ್‌ ಪರಿವರ್ತನ ಕಾರ್ಯ 2002ನೇ ಇಸವಿಯ ವೇಳೆಗೆ ಮುಗಿಯಲಿದೆ ಎಂದ ಸಚಿವರು ರಾಜ್ಯ ಸರಕಾರವು ಇತ್ತೀಚೆಗೆ ವಿದ್ಯುತ್‌ ದರ ಏರಿಸಿರುವುದರ ಬಗ್ಗೆ ಮಾತನಾಡುತ್ತಾ ವಿದ್ಯುತ್‌ ಪೂರೈಕೆಯ ಅಭಾವವನ್ನು ತಪ್ಪಿಸುವುದೇ ರಾಜ್ಯಸರಕಾರದ ಉದ್ದೇಶವಾಗಿದೆ. ರಾಜ್ಯ ವಿದ್ಯುತ್‌ ಪ್ರಸರಣ ನಿಗಮ ತನ್ನ ನಷ್ಟವನ್ನು ತುಂಬಲು ಪ್ರಯತ್ನಿಸುತ್ತಿದೆ ಎಂದೂ ಅವರು ಹೇಳಿದರು.

(ಯುಎನ್‌ಐ)

ಮುಖಪುಟ / ಇವತ್ತು... ಈ ಹೊತ್ತು...