ಮಂಗಳೂರು ಜೋಡಿ ರೈಲು ಮಾರ್ಗ 2002 ಮಾರ್ಚ್‌ಗೆ ಪೂರ್ಣ

ಕೊಳಿಕ್ಕೋಡ್‌ : ಮಂಗಳೂರು ಹಾಗೂ ಕೋಳಿಕ್ಕೋಡ್‌ ನಡುವಣ ಜೋಡಿ ರೈಲು ಮಾರ್ಗದ ಕಾಮಗಾರಿ 2002ನೇ ಇಸವಿ ಮಾರ್ಚ್‌ ಒಳಗೆ ಪೂರ್ಣಗೊಳ್ಳಲಿದೆ ಎಂದು ಕೇಂದ್ರ ರೈಲ್ವೆ ಖಾತೆ ರಾಜ್ಯ ಸಚಿವ ಓ . ರಾಜಗೋಪಾಲ್‌ ಶನಿವಾರ ಇಲ್ಲಿ ತಿಳಿಸಿದ್ದಾರೆ.

ಈ ಯೋಜನೆಗೆ ಕೇಂದ್ರ ಸರಕಾರ ಕಳೆದ ಮುಂಗಡಪತ್ರದಲ್ಲಿ 105 ಕೋಟಿ ರುಪಾಯಿ ಒದಗಿಸಿತ್ತು. ಈಗ ಈ ಮಾರ್ಗದ ಕಾಮಗಾರಿಗೆ ಹೆಚ್ಚುವರಿಯಾಗಿ 43 ಕೋಟಿ ರುಪಾಯಿ ಬಿಡುಗಡೆ ಮಾಡಲಾಗುತ್ತಿದೆ. ಕಾಮಗಾರಿ ಭರದಿಂದ ಸಾಗಿದ್ದು ಇನ್ನು 14 ತಿಂಗಳಲ್ಲಿ ಪೂರ್ಣವಾಗಲಿದೆ ಎಂದು ಅವರು ಹೇಳಿದರು.

ಮಂಗಳೂರು ಹಾಗೂ ಕೋಳಿಕ್ಕೋಡ್‌ ನಡುವಣ ರೈಲು ಮಾರ್ಗದಲ್ಲಿ ಬರುವ 10 ರೈಲ್ವೆ ಮೇಲು ಸೇತುವೆಗಳ ಕಾಮಗಾರಿ ಶನಿವಾರದಿಂದ ಆರಂಭಗೊಂಡಿದೆ. ರಾಜ್ಯ ಸರ್ಕಾರದ ಅಧೀನದಲ್ಲಿರುವ ರಸ್ತೆ ಮತ್ತು ಸೇತುವೆ ನಿಗಮವು ಹುಡ್ಕೋದ ಸಾಲನೆರವಿನಿಂದ ಕಾಮಗಾರಿಗೆ ಶೇ.50ರಷ್ಟು ಹಣ ನೀಡಲಿದೆ ಎಂದೂ ಅವರು ತಿಳಿಸಿದರು. ರೈಲ್ವೆ ಇಲಾಖೆಯು ಈ ಹಣವನ್ನು ಕಂತಿನ ರೂಪದಲ್ಲಿ ರಾಜ್ಯಗಳಿಗೆ ಮರುಪಾವತಿಸಲಿದೆ ಎಂದೂ ಅವರು ತಿಳಿಸಿದರು.