ಭೂಕಂಪ ಮುನ್ಸೂಚನೆ ನೀಡುವ ಉಪಗ್ರಹ ಶೀಘ್ರವೇ ಅಂತರಿಕ್ಷಕ್ಕೆ

ಬೆಂಗಳೂರು : ಭೀಕರ ಭೂಕಂಪಗಳ ಭವಿಷ್ಯ ನುಡಿಯುವ ಮೈಕ್ರೋ ಸ್ಯಾಟಲೈಟನ್ನು ಈ ವರ್ಷಾಂತ್ಯದೊಳಗೆ ರಷ್ಯಾವು ಅಂತರಿಕ್ಷಕ್ಕೆ ಹಾರಿಸಲಿದೆ.

ರಷ್ಯದ ಇಜ್ಮಿರಾನ್‌ (IZMIRAN) ಏಜೆನ್ಸಿಯು 100 ಕೆಜಿಗೂ ಕಡಿಮೆ ತೂಕದ ಈ ಉಪಗ್ರಹ ಉಡಾವಣೆಯ ಬಗ್ಗೆ ಅಧ್ಯಯನದಲ್ಲಿ ತೊಡಗಿದೆ. ಗುಜರಾತ್‌ನಲ್ಲಿ ಘಟಿಸಿದಂತಹ ಭೀಕರ ಭೂಕಂಪಗಳ ಬಗ್ಗೆ ಈ ಉಪಗ್ರಹ ಮುನ್ಸೂಚನೆ ನೀಡಲಿದೆ ಎಂದು ರಷ್ಯಾದ ಏರ್‌ ಫ್ಲೀಟ್‌ ಮ್ಯಾಗಜೀನ್‌ ವರದಿ ಮಾಡಿದೆ.

1999ರ ಆಗಸ್ಟ್‌ನಲ್ಲಿ ಘಟಿಸಿದ ಟರ್ಕಿಯ ಭೂಕಂಪ ಮತ್ತು ಅದೇ ವರ್ಷ ಸೆಪ್ಟೆಂಬರ್‌ನಲ್ಲಿ ಥೈವಾನ್‌ನಲ್ಲಿ ನಡೆದ ಭೂಕಂಪಗಳಿಂದ ಪಡೆದುಕೊಂಡ ಅಂಕಿ ಅಂಶಗಳನ್ನು ಆಧರಿಸಿ ನಡೆಸಿದ ಅಧ್ಯಯನದಿಂದ ಈ ಹೊಸ ಉಪಗ್ರಹವನ್ನು ಅಭಿವೃದ್ಧಿ ಪಡಿಸಲಾಗುತ್ತಿದೆ. ಐಯನೋ ಸ್ಫಿಯರಿಕ್‌ ಡೇಟಾಗಳ ಸಹಾಯದಿಂದ ಈ ಮೈಕ್ರೋ ಸ್ಯಾಟಲೈಟ್‌ ಭೀಕರ ಭೂಕಂಪಗಳ ಬಗ್ಗೆ ಮುನ್ಸೂಚನೆ ನೀಡಬಲ್ಲುದು.

ಭೂಕಂಪ ಭವಿಷ್ಯ ನುಡಿಯುವ ಮೈಕ್ರೋ ಸ್ಯಾಟಲೈಟಿನ ತೂಕ 100 ಕೆ.ಜಿಯಷ್ಟೇ ಇರುವುದರಿಂದ ಉಡಾವಣೆಗೆ ಯಾವುದೇ ಸಮಸ್ಯೆಯಾಗುವುದಿಲ್ಲ. ಅಲ್ಲದೆ, ಭೂಮಿಯಡಿಯಲ್ಲಿ ಅಣುಬಾಂಬ್‌ ಹೂತಿಟ್ಟಿದ್ದರೆ, ಅಥವಾ ಅಣು ಸ್ಥಾವರಗಳಲ್ಲಿ ಸ್ಫೋಟವಾಗುವ ಸಂಭವವಿದ್ದರೆ ಮೈಕ್ರೋ ಸ್ಯಾಟಲೈಟ್‌ ಮುಂಚಿತವಾಗಿ ಸೂಚನೆ ನೀಡುತ್ತದೆ ಎಂದು ಇಜ್ಮಿರಾನ್‌ ಗುಂಪು ರಷ್ಯನ್‌ ಪತ್ರಿಕೆಗೆ ತಿಳಿಸಿದೆ.

(ಯುಎನ್‌ಐ)