ಬತ್ತಿದ ಭೀಮೆಗೆ ನೀರು ಬಿಡುವ ತನಕ ಹೋರಾಟದ ನಿರ್ಧಾರ

ಬಿಜಾಪುರ : ಬತ್ತಿಹೋಗಿರುವ ಭೀಮಾ ನದಿಗೆ ಮಹಾರಾಷ್ಟ್ರದ ಉಜ್ಜನಿ ಜಲಾಶಯದಿಂದ ನೀರು ಬಿಡಬೇಕು ಎಂದು ಆಗ್ರಹಿಸಿ ಹೆದ್ದಾರಿ ಬಂದ್‌, ಆಮರಣ ಉಪವಾಸವೇ ಮೊದಲಾದ ಪ್ರತಿಭಟನೆಯನ್ನು ಆರಂಭಿಸಲಾಗಿದೆ. ಭೀಮಾ ನದಿ ನೀರು ರಕ್ಷಣಾ ಸಮಿತಿ ಈ ಪ್ರತಿಭಟನೆಯ ನೇತೃತ್ವ ವಹಿಸಿದೆ.

ರಾಷ್ಟ್ರೀಯ ಹೆದ್ದಾರಿ 13ರ ಟಾಕಳಿ ಸೇತುವೆ ಬಳಿಯಲ್ಲಿ ಶನಿವಾರ ನಾಲ್ಕು ಗಂಟೆಗೂ ಹೆಚ್ಚು ಕಾಲ ರೈತರು ರಸ್ತೆ ತಡೆ ನಡೆಸಿದರು. 33 ಮಂದಿ ಸರದಿ ಉಪವಾಸದಲ್ಲಿ ಪಾಲ್ಗೊಂಡರು. ಇಂಡಿ, ಚಡಚಣಗಳಲ್ಲಿ ಬಂದ್‌ ಆಚರಿಸಲಾಯಿತು.

ಧೂಳಖೇಡ್‌ನಿಂದ ಟಾಕಳಿ ಸೇತುವೆವರೆಗೆ ಪಾದಯಾತ್ರೆ ನಡೆಸಿದ ಸಮಿತಿಯ ಸದಸ್ಯರು ಹಾಗೂ ರೈತರು ನೀರು ಬಿಡುವವರೆಗೆ ಪ್ರತಿಭಟನೆ ಕೈಬಿಡುವುದಿಲ್ಲ ಎಂಬ ಪ್ರತಿಜ್ಞೆ ಮಾಡಿ ಹೋರಾಟದ ಪ್ರಥಮ ಹಂತದ ಕಾರ್ಯಕ್ರಮಗಳನ್ನು ಕೈಗೊಂಡರು. ರಾಷ್ಟ್ರೀಯ ಹೆದ್ದಾರಿ ತಡೆಯಿಂದಾಗಿ ಸುಮಾರು 3 ಕಿ.ಮೀಟರ್‌ಗೂ ಹೆಚ್ಚು ಉದ್ದದವರೆಗೂ ಎರಡೂ ಕಡೆಗಳಲ್ಲಿ ವಾಹನಗಳು ಗಂಟೆಗಟ್ಟೆಲೆ ಸಾಲುಗಟ್ಟಿ ನಿಲ್ಲುವಂತಹ ಪರಿಸ್ಥಿತಿ ನಿರ್ಮಾಣವಾಯಿತು.

ಎತ್ತಿನಗಾಡಿಗಳನ್ನು ರಸ್ತೆಯ ಮಧ್ಯೆ ನಿಲ್ಲಿಸಿ ಪ್ರತಿಭಟಿಸಿದ ರೈತರನ್ನುದ್ದೇಶಿಸಿ ಈ ಸಂದರ್ಭದಲ್ಲಿ ಮಾತನಾಡಿದ ಪಂಚಪ್ಪ ಕಲಬುರ್ಗಿ ಅವರು, ಈ ಬಾರಿ ನವೆಂಬರ್‌ನಿಂದಲೇ ನದಿ ಒಣಗಿದ್ದು, ರೈತರು ಹಾಗೂ ನಾಗರಿಕರು ನೀರಿಗೆ ತೀವ್ರ ಬವಣೆ ಅನುಭವಿಸುತ್ತಿದ್ದಾರೆ. ಮುಖ್ಯಮಂತ್ರಿಗಳ ನೇತೃತ್ವದಲ್ಲಿ ಮಹಾರಾಷ್ಟ್ರಕ್ಕೆ ತೆರಳಿದ್ದ ನಿಯೋಗಕ್ಕೆ ನೀರು ಬಿಡುವ ಭರವಸೆ ದೊರೆತಿತ್ತು. ಆದರೆ, 15 ದಿನ ಕಳೆದರೂ ಒಂದು ಹನಿಯೂ ನೀರು ನದಿಗೆ ಬಂದಿಲ್ಲ ಎಂದು ಆರೋಪಿಸಿದರು.

ಜಿಲ್ಲೆಯ ನಾನಾ ಭಾಗಗಳಿಂದ ಆಗಮಿಸಿದ್ದ ರೈತರು ಪಾದಯಾತ್ರೆಯಲ್ಲಿ ಹಾಗೂ ಪ್ರತಿಭಟನಾ ಕಾರ್ಯಕ್ರಮಗಳಲ್ಲಿ ಭಾಗವಹಿಸಿದ್ದರು. ಭೀಮಾ ನದಿಗೆ ಕೂಡಲೇ ನೀರು ಬಿಡಲು ಕ್ರಮ ಕೈಗೊಳ್ಳುವಂತೆ ಸರಕಾರವನ್ನು ಒತ್ತಾಯಿಸಲಾಯಿತು.

ವಾರ್ತಾಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...