ಲೋಕದ ಮಳೆ ಬೆಳೆ ಮನಸ್ಸಿಗೆ ಬರುತ್ತದಾ ?

ಮಾವು ಚಿಗುರಿದೆ. ಮೈ ತುಂಬ. ಏಪ್ರಿಲ್‌ನ ಸುಡು ಬಿಸಿಲಿನಲ್ಲಿ ಒಣಗಿ ಬಿರುಕು ಬಿಚ್ಚುತ್ತಿರುವ ನೆಲ ತುಂಬಾ ಹಣ್ಣು ಮಾವು ತರಗೆಲೆಯಂತೆ ಹರಡಬಹುದು ಎಂಬ ಕನಸು ಚಿಗುರೊಡೆಯುತ್ತಿದೆ.

ಮಾವು ಬೆಳೆದವರ ಮನದಲ್ಲಿ ಈ ಸಮೃದ್ಧಿಯ ಖುಷಿಯ ಹಿಂದೆಯೇ ಭಾರ ಯೋಚನೆಯ ಸೆಳಕು. ಜೋಳ, ತೊಗರಿ, ಭತ್ತ ಬೀದಿಯಲ್ಲಿ ಚೆಲ್ಲಿದ ಸುದ್ದಿ ಎದೆ ಮೇಲೆ ಬಂಡೆ ಕಲ್ಲಿನಂತೆ ಇನ್ನೂ ಕುಳಿತಿರುವಾಗ ಈ ಚಿಗುರು ಹೂವುಗಳ ಕಂಡು ನಿರಾಳವಾಗಿ ಆನಂದಿಸುವುದು ಹೇಗೆ ? ಮಾವಿನ ಉಪ್ಪಿನಕಾಯಿ, ಹಣ್ಣಿನ ಜ್ಯೂಸ್‌... ತಿಂಡಿ... ಸುದ್ದಿಗಳ ಆಚೆಗೆ ಮತ್ತೇನೂ ಆಗದಿರಲಪ್ಪಾ ...

ಚಳಿ ಮಾಯವಾಗಿದ್ದರೂ, ಚರ್ಮ ಒಡೆದು ಹೋಗುವಷ್ಟು ಹವೆ ಒಣಗಿದೆ. ಕರಾವಳಿಯಲ್ಲಿ ಆಗಲೆ ಸೆಕೆ ದರಬಾರು ನಡೆಸಿದೆ. ಉತ್ತರ ಕರ್ನಾಟಕದತ್ತ ಇಣುಕಿದರೆ ಗುಲ್ಬರ್ಗಾದಲ್ಲಿ ಉಷ್ಣಾಂಶ ಹತ್ತಕ್ಕಿಳಿದು ಕನಿಷ್ಠ ಉಷ್ಣಾಂಶದ ಕಿರೀಟ ಹೊತ್ತಿದೆ. ಇದೇ ಗುಲ್ಬರ್ಗಾ ಅಲ್ಲವೇ ಕಳೆದ ಏಪ್ರಿಲ್‌ನಲ್ಲಿ 40 ಡಿಗ್ರಿ ದಾಟಿ ಅಲ್ಲಿನ ಮಂದಿಯ ಉಸಿರುಗಟ್ಟಿಸಿ ಬಿಟ್ಟದ್ದು?

ಈ ಬಾರಿ ಏನಾಗಲಿದೆಯೋ... ಯಾರದಾದರೂ ಪುಣ್ಯ, ಯಾವ ಪುಣ್ಯಾತ್ಮನದ್ದೋ ಧರ್ಮ, ರಾಜ್ಯದಲ್ಲಿ ಮಳೆ ಬೆಳೆ ತರಲಿ, ಗುಟುಕು ನೀರ ಆರಿಸದಿರಲಿ.. ಎಂದು ಮನೆಯಲ್ಲಿ ಅಜ್ಜಿ ದಿನವೂ ಹಾರೈಸುತ್ತಾರೆ. ನೀವು ಸ್ನಾನ ಮಾಡಿ ದೇವರಿಗೆ ಕೈ ಮುಗಿಯುವಾಗ ಲೋಕದ ಮಳೆ ಬೆಳೆ ಮನಸ್ಸಿಗೆ ಬರುತ್ತದಾ?