ವೀರಪ್ಪನ್‌ ಬಗ್ಗೆ ಪೊಲೀಸರಿಗೆ ಸುಳಿವು ನೀಡಿದ್ದ ಅಯ್ಯಪ್ಪನ್‌ ನಾಪತ್ತೆ

(ಕೊಯಮತ್ತೂರು ಬಾತ್ಮೀದಾರರಿಂದ)

ಕೊಯಮತ್ತೂರು : ಇನ್ನೇನು ಈಗಲೋ ಆಗಲೋ ವೀರಪ್ಪನ್‌ನನ್ನು ಹಿಡಿದೇ ತೀರುತ್ತೇವೆಂದು ಪಣ ತೊಟ್ಟಿರುವ ಎಸ್‌ಟಿಎಫ್‌ ಪೊಲೀಸರ ತೀವ್ರ ಕಾರ್ಯಾಚರಣೆ ನಡೆದಿರುವಂತೆಯೇ, ಈ ಕಾರ್ಯಾಚರಣೆಗೆ ಕಾರಣವಾಗಿರುವ ಪೊಲೀಸರ ಆಸಾಮಿ ನಾಪತ್ತೆಯಾಗಿದ್ದಾನೆ.

ಹೆಸರು ಅಯ್ಯಪ್ಪನ್‌. ವೀರಪ್ಪನ್‌ ಚಲನವಲನಗಳ ಬಗ್ಗೆ ಪತ್ತೆ ಮಾಡಲು ಈ ವ್ಯಕ್ತಿಯನ್ನು ಪೊಲೀಸರು ನಿಯೋಜಿಸಿದ್ದರು. ತಮಿಳುನಾಡು- ಕೇರಳ ಗಡಿಭಾಗದ ಸಾವಂತಿ ಅರಣ್ಯ ಪ್ರದೇಶದಲ್ಲಿ ವೀರಪ್ಪನ್‌ ಹಾಗೂ ಸಹಚರರು ಇದ್ದಾರೆ ಎಂಬುದನ್ನು ಪತ್ತೆ ಮಾಡಿದ್ದೇ ಅಯ್ಯಪ್ಪನ್‌. ಇದಕ್ಕಾಗಿ ಈತನಿಗೆ ಪೊಲೀಸರು 10 ಸಾವಿರ ರುಪಾಯಿ ಬಹುಮಾನವನ್ನೂ ಕೊಟ್ಟಿದ್ದಾರೆ.

ಆದರೆ ಬುಧವಾರದಿಂದ ಈತ ನಾಪತ್ತೆಯಾಗಿದ್ದು, ಈ ಬಗ್ಗೆ ಯಾವುದೇ ಸುಳಿವು ಸಿಕ್ಕಿಲ್ಲ. ಪೊಲೀಸರು ದೂರು ದಾಖಲಿಸಿಕೊಂಡು ತಲಾಷು ನಡೆಸುತ್ತಿದ್ದಾರೆ.

ವೀರಪ್ಪನ್‌ ತಂಡವೇ ಈತನನ್ನು ಅಪಹರಿಸಿದೆ ಎಂಬ ಬಲವಾದ ಗುಮಾನಿಗಳಿದ್ದು, ಪ್ರಕರಣಕ್ಕೆ ಹೊಸ ತಿರುವು ಬಂದಿದೆ. ಅಷ್ಟೊಂದು ಬಿಗಿ ಪೊಲೀಸ್‌ ಪಹರೆಯ ನಡುವೆಯೂ ಅಯ್ಯಪ್ಪನ್‌ ಕಾಣೆಯಾಗಿರುವುದು ಪೊಲೀಸರ ಮಾನಸಿಕ ಸ್ಥೈರ್ಯಕ್ಕೆ ಮತ್ತೊಂದು ಸವಾಲೆಸೆದಿದೆ. ಕೊಯಮತ್ತೂರಿನ ನಮ್ಮ ಬಾತ್ಮೀದಾರ ಪೊಲೀಸರಿಂದ ಈ ಮಾಹಿತಿಯನ್ನು ಸಂಗ್ರಹಿಸಿ ತಂದಿದ್ದಾರೆ.

ವಾರ್ತಾಸಂಚಯ
ಮುಖಪುಟ / ವೀರಪ್ಪನ್‌ ಶಿಕಾರಿ