ಟಿ. ನರಸೀಪುರ ಕುಂಭಮೇಳದಲ್ಲಿ ಸಾವಿರಾರುಭಕ್ತರಿಂದ ಪುಣ್ಯಸ್ನಾನ

* ನಾಗೇಂದ್ರ ಪ್ರಸಾದ್‌, ನಂಜನಗೂಡು

ತಿರಮಕೂಡಲು ನರಸೀಪುರ: ಮಂಗಳವಾರ ಇಲ್ಲಿ ವಿಧ್ಯುಕ್ತವಾಗಿ ಆರಂಭವಾದ ಮೂರು ದಿನಗಳ ದಕ್ಷಿಣ ಭಾರತದ ಮಹಾಕುಂಭಮೇಳದ ಕೊನೆಯ ದಿನವಾದ ಗುರುವಾರ ಸಾವಿರಾರು ಭಕ್ತಾದಿಗಳು ಶುಭಗಳಿಗೆಯಲ್ಲಿ ಪುಣ್ಯ ಸ್ನಾನ ಮಾಡಿದರು.

ಮಂಗಳವಾರ ಸುತ್ತೂರು ಸಂಸ್ಥಾನದ ಶ್ರೀ ಶಿವರಾತ್ರಿ ದೇಶಿಕೇಂದ್ರ ಮಹಾಸ್ವಾಮಿಗಳು, ಆದಿಚುಂಚನಗಿರಿ ಮಠದ ಶ್ರೀ ಬಾಲಗಂಗಾಧರನಾಥ ಸ್ವಾಮಿಗಳು, ಶ್ರೀ ಬೀರೇಂದ್ರ ಕೇಶವ ತಾರಾನಂದಪುರಿ ಸ್ವಾಮಿಗಳು, ಓಂಕಾರ ಆಶ್ರಮದ ಶಿವಪುರಿ ಸ್ವಾಮಿಗಳ ದಿವ್ಯ ಸಾನ್ನಿಧ್ಯದಲ್ಲಿ ಮಂಗಳವಾರ ಸಂಗಮ ಸ್ಥಳದಲ್ಲಿ ಆರಂಭವಾದ ಕುಂಭಮೇಳದ ಅಂತಿಮ ದಿನವಾದ ಇಂದು ಸಂಜೆಯವರೆಗೂ ಸಾವಿರಾರು ಸಂಖ್ಯೆಯಲ್ಲಿ ಭಕ್ತರು ಆಗಮಿಸುವ ನಿರೀಕ್ಷೆ ಇದೆ.

ಶುಭಗಳಿಗೆ ಎಂದು ನಿಗದಿಪಡಿಸಲಾಗಿದ್ದ ಸಮಯ (ಗುರುವಾರ ಬೆಳಗ್ಗೆ 7ರಿಂದ 8-15 ಮತ್ತು ಮಧ್ನಾಹ್ನ 11-30ರಿಂದ 12-45)ದಲ್ಲಿ ಬೆಳಗ್ಗೆ ಪುಣ್ಯಸ್ನಾನ ಮಾಡಿದ ಸಾವಿರಾರು ಭಕ್ತಾದಿಗಳ ಮುಖದಲ್ಲಿ ಧನ್ಯತೆಯ ಭಾವ ಮೂಡಿತ್ತು.

ವಿಶ್ವಶಾಂತಿ : ಮಂಗಳವಾರದಿಂದಲೂ ಕಾವೇರಿ, ಕಪಿಲೆ ಹಾಗೂ ಗುಪ್ತಗಾಮಿನಿ ಸ್ಪಟಿಕಾ ಸರೋವರ ಸೇರುವ ತ್ರಿವೇಣಿ ಸಂಗಮದಲ್ಲಿ ಕುಂಭಮೇಳದ ನಿಮಿತ್ತ ಹಲವು ಧಾರ್ಮಿಕ ವಿಧಿಗಳು ಭಕ್ತಿ ಭಾವದಿಂದ ಜರುಗುತ್ತಿವೆ. ಬುಧವಾರ ಇಲ್ಲಿ ಮಹೋದಯ ಮಾಘಸ್ನಾನದ ಮುನ್ನ ವಿಶ್ವಶಾಂತಿಗಾಗಿ ಪ್ರಾರ್ಥನೆಯೂ ನಡೆಯಿತು.

ಅಗಸ್ತ್ಯೇಶ್ವರ ಸ್ವಾಮಿ ದೇವಸ್ಥಾನದ ಬಳಿ ನಿರ್ಮಿಸಲಾಗಿರುವ ಯಾಗ ಮಂಟಪದಲ್ಲಿ ಯಜ್ಞಯಾಗಾದಿಗಳೂ ನಡೆದವು. ಧರ್ಮ ಸಭೆಯೂ ನಡೆಯಿತು. ವಿವಿಧ ಮಠಗಳ ಪೀಠಾಧಿಪತಿಗಳು, ಧರ್ಮಗುರುಗಳು, ರಾಜಕಾರಣಿಗಳು, ಮಂತ್ರಿಗಳು, ಶಾಸಕರು, ಗಣ್ಯವ್ಯಕ್ತಿಗಳೇ ಅಲ್ಲದೆ ಸಾವಿರಾರು ಸಂಖ್ಯೆಯಲ್ಲಿ ಭಕ್ತಾದಿಗಳು ಈ ಸಂದರ್ಭದಲ್ಲಿ ಹಾಜರಿದ್ದರು.

ಇಂದು ನಡೆಯಲಿರುವ ಧರ್ಮಸಭೆಯ ಅಧ್ಯಕ್ಷತೆಯನ್ನು ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ಅವರು ವಹಿಸಲಿದ್ದಾರೆ. ಸಚಿವರುಗಳಾದ ಎಚ್‌. ವಿಶ್ವನಾಥ್‌, ಎಂ. ಮಹಾದೇವ್‌, ರಾಣಿ ಸತೀಶ್‌, ಮೈಸೂರು ರಾಜವಂಶಸ್ಥರಾದ ಶ್ರೀಕಂಠದತ್ತ ನರಸಿಂಹರಾಜ ಒಡೆಯರ್‌ ಮೊದಲಾದವರು ಪಾಲ್ಗೊಳ್ಳುವ ಕಾರ್ಯಕ್ರಮ ಇದೆ.

ವಾರ್ತಾಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...