ಫೆ. 14 ರಿಂದ 24 : ಸಿದ್ಧಗಂಗೆ ಸಿದ್ಧಲಿಂಗೇಶ್ವರನ ಜಾತ್ರೆಗೆ ಬನ್ನಿ

ತುಮಕೂರು : ಶಿಕ್ಷಣ ದಾಸೋಹದ ಮೂಲಕ ರಾಜ್ಯಾದ್ಯಂತ ಮನೆ ಮಾತಾಗಿರುವ ಜಿಲ್ಲೆಯ ಸಿದ್ಧಗಂಗಾ ಮಠದ ಸಿದ್ಧಲಿಂಗೇಶ್ವರ ಸ್ವಾಮಿಯ ಜಾತ್ರಾ ಮಹೋತ್ಸವ ಫೆ.14 ರಿಂದ 24 ರವರೆಗೆ ನಡೆಯಲಿದೆ.

ಜಾತ್ರೆಯ ಅಂಗವಾಗಿ ಕೃಷಿ - ಕೈಗಾರಿಕಾ ವಸ್ತು ಪ್ರದರ್ಶನ ಹಾಗೂ ಜಾನುವಾರುಗಳ ಪ್ರದರ್ಶನ ಏರ್ಪಡಿಸಿದ್ದು , ಜಾತ್ರೆಯಲ್ಲಿ ಭಾಗವಹಿಸುವ ಉತ್ತಮ ರಾಸುಗಳಿಗೆ ಪ್ರಶಸ್ತಿ ವಿತರಿಸಲಾಗುವುದು. ಫೆ.14 ರಂದು ಶ್ರೀ ಗೋಸಲ ಸಿದ್ಧೇಶ್ವರಸ್ವಾಮಿ ಉತ್ಸವದೊಂದಿಗೆ ಜಾತ್ರೆ ಆರಂಭವಾಗುವುದು. ಜಾತ್ರೆಯ ಅಂಗವಾಗಿ ದಿನನಿತ್ಯ ವಿವಿಧ ಉತ್ಸವಗಳು ನಡೆಯಲಿವೆ. ವಿವಿಧ ದಿನಗಳಂದು ನಡೆಯುವ ಉತ್ಸವದ ವಿವರಗಳು -

• ಫೆ.21 - ಮಹಾಶಿವರಾತ್ರಿ ಅಂಗವಾಗಿ ರಾತ್ರಿ 9.30 ಕ್ಕೆ ಮುತ್ತಿನ ಪಲ್ಲಕಿ ಉತ್ಸವ
• ಫೆ.22 - ಬೆಳಿಗ್ಗೆ 11 ಗಂಟೆಗೆ ಸಿದ್ಧಲಿಂಗಸ್ವಾಮಿ ರಥೋತ್ಸವ
• ಫೆ.23 - ರಾತ್ರಿ 11 ಗಂಟೆಗೆ ಬೆಳ್ಳಿ ಪಲ್ಲಕಿ ಉತ್ಸವ
• ಫೆ. 24 - ರಾತ್ರಿ 8.30 ಕ್ಕೆ ತೆಪ್ಪೋತ್ಸವ

ಕೃಷಿ ಮತ್ತು ಕೈಗಾರಿಕಾ ವಸ್ತು ಪ್ರದರ್ಶನವನ್ನು ಫೆ. 12 ರ ಸಂಜೆ 6.30 ಕ್ಕೆ ಕಂದಾಯ ಖಾತೆ ಸಚಿವ ಎಚ್‌.ಸಿ. ಶ್ರೀಕಂಠಯ್ಯ ಉದ್ಘಾಟಿಸುವರು. ಈ ಸಂದರ್ಭದಲ್ಲಿ ಸಿದ್ಧಗಂಗಾ ಕ್ಷೇತ್ರದ ಹಿರಿಯ ಪೀಠಾಧೀಶ ಡಾ. ಶಿವಕುಮಾರ ಸ್ವಾಮಿಗಳು ಹಾಜರಿರುವರು. ಸಭೆಯ ಅಧ್ಯಕ್ಷತೆಯನ್ನು ಕೃಷಿ ಖಾತೆ ಸಚಿವ ಟಿ.ಬಿ. ಜಯಚಂದ್ರ ವಹಿಸುವರು. ಮುಖ್ಯ ಅತಿಥಿಗಳಾಗಿ ನೀರಾವರಿ ಖಾತೆ ಸಚಿವ ಎಚ್‌.ಕೆ. ಪಾಟೀಲ್‌ ಹಾಜರಿರುವರು. ಕಾರ್ಯಕ್ರಮದಲ್ಲಿ ಸಂಸದರು, ಶಾಸಕರು ಹಾಗೂ ಇನ್ನಿತರೆ ಗಣ್ಯರು ಭಾಗವಹಿಸುವರು.

(ಇನ್ಫೋ ವಾರ್ತೆ)