ಬಳ್ಳಾರಿ ದುರ್ಗದ ವೀಕ್ಷಣೆಗೆ ಶುಲ್ಕ : ನಾಗರಿಕರ ಪ್ರತಿಭಟನೆ

ಬಳ್ಳಾರಿ : ರಾಜ್ಯದ ಪ್ರಮುಖ 52 ಕೋಟೆಗಳಲ್ಲಿ ಒಂದಾದ ಬಳ್ಳಾರಿ ದುರ್ಗ ಹಾಗೂ ಬೆಟ್ಟದ ವೀಕ್ಷಣೆಗೆ ಪ್ರಾಚ್ಯವಸ್ತು ಇಲಾಖೆ 5 ರುಪಾಯಿ ಪ್ರವೇಶ ಶುಲ್ಕ ವಿಧಿಸಿದೆ. ಕೋಟೆ ಹಾಗೂ ಬೆಟ್ಟ ನೋಡಲು ಬರುವವರು ಈಗ ಕಡ್ಡಾಯವಾಗಿ 5 ರು. ಪ್ರವೇಶ ಶುಲ್ಕ ತೆರಲೇ ಬೇಕು.

ಇಲಾಖೆಯ ಈ ನಿರ್ಧಾರವನ್ನು ಸ್ಥಳೀಯ ನಾಗರಿಕರು ಹಾಗೂ ಪ್ರವಾಸಿಗರು ತೀವ್ರವಾಗಿ ಖಂಡಿಸಿದ್ದಾರೆ. ಈ ಕೋಟೆಯ ಪ್ರದೇಶದಲ್ಲಿ ಉತ್ತಮ ಸೌಲಭ್ಯಗಳ ಮಾತಿರಲಿ ಕನಿಷ್ಠ ಸೌಲಭ್ಯಗಳೂ ಇಲ್ಲ. ಕುಡಿಯುವ ನೀರಿಗೂ ಇಲ್ಲಿ ತೊಂದರೆ, ಇತಿಹಾಸ ವರ್ಣಿಸಲು ಸರಿಯಾದ ಗೈಡ್‌ ಕೂಡ ಇಲ್ಲ. ಪರಿಸ್ಥಿತಿ ಹೀಗಿರುವಾಗ ಪ್ರವೇಶ ಶುಲ್ಕ ವಿಧಿಸುವುದು ಯಾವ ನ್ಯಾಯ ಎಂಬುದು ಸ್ಥಳೀಯರ ಪ್ರಶ್ನೆ.

ಪ್ರಾಚ್ಯವಸ್ತು ಇಲಾಖೆಯ ನಿರ್ದೇಶನದ ಮೇರೆಗೆ ನಾವು ಶುಲ್ಕ ವಿಧಿಸಿದ್ದೇವೆ. ನಾವು ಅಸಹಾಯಕರು ಎಂಬುದು ಸ್ಥಳೀಯ ಅಧಿಕಾರಿಗಳ ಅಳಲು. ಶುಲ್ಕ ವಿಧಿಸಿದ ತರುವಾಯ ಬೆಟ್ಟದ ವೀಕ್ಷಣೆಗೆ ಬರುವವರ ಸಂಖ್ಯೆ ಗಣನೀಯವಾಗಿ ಇಳಿಮುಖವಾಗಿದೆ, ಕೂಡಲೇ ಈ ನಿರ್ಧಾರವನ್ನು ಪುನರ್‌ಪರಿಶೀಲಿಸಬೇಕು ಎಂದೂ ಅವರು ಆಗ್ರಹಿಸಿದ್ದಾರೆ.

ಚೌಡಿಕಿ ಪದಗಾರರ ಕಲೆ - ಅರ್ಜಿ ಆಹ್ವಾನ : ಕೆಲವು ದೇವದಾಸಿಯರು ಇಂದೂ ಪರಂಪರಾಗತ ಚೌಡಿಕಿ ಪದಗಳ ನೆರವಿನಿಂದಲೇ ಜೀವನ ನಡೆಸುತ್ತಿದ್ದು, ಅಂತಹ ದೇವದಾಸಿ ಕಲಾವಿದರನ್ನು ಗುರುತಿಸಿ ಜೌಡಿಕಿ ಪದಗಳ ಪುನಶ್ಚೇತನಕ್ಕೆ ಕ್ರಮ ಕೈಗೊಳ್ಳಬೇಕು ಎಂಬ ಸೂಚನೆ ರಾಜ್ಯ ಮಹಿಳಾ ಆಯೋಗದ ದೇವದಾಸಿಯರ ಪುನರ್ವಸತಿ ಸಮಾವೇಶದಲ್ಲಿ ವ್ಯಕ್ತವಾಗಿದೆ.

ಈ ಹಿನ್ನೆಲೆಯಲ್ಲಿ ಬಳ್ಳಾರಿ ಜಿಲ್ಲಾ ವ್ಯಾಪ್ತಿಯಲ್ಲಿರುವ ಮಹಿಳಾ ಚೌಡಿಕೆ ಪದಗಾರರು ತಮ್ಮ ಹೆಸರು, ವಿಳಾಸವುಳ್ಳ ಅರ್ಜಿಗಳನ್ನು ಸಹಾಯಕ ನಿರ್ದೇಶಕರು, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ, ಡಾ. ಜೋಳದರಾಶಿ ದೊಡ್ಡನಗೌಡ ರಂಗಮಂದಿರ, ಬಳ್ಳಾರಿ ಇವರಿಗೆ ಫೆ.9ರೊಳಗೆ ಸಲ್ಲಿಸುವಂತೆ ಪ್ರಕಟಣೆ ತಿಳಿಸಿದೆ.

ವಾರ್ತಾಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...