ಸಿಲಿಕಾನ್‌ ಕಣಿವೆಯಲ್ಲಿ ಪುಸ್ತಕ ಪ್ರಿಯರಿಗೊಂದು ಕುಂಭಮೇಳ!

ಬೆಂಗಳೂರು : ಒಳ್ಳೆಯ ಡಿಕ್ಷನರಿ ಕೊಂಡುಕೊಳ್ಳಬೇಕು ಅಂದುಕೊಂಡಿದ್ದೀರಾ ? ಇತ್ತೀಚೆಗೆ ಪ್ರಕಟವಾಗಿರುವ ಕನ್ನಡ ಕವನದ ಪುಸ್ತಕ ಬೇಕೇ ? ಅಲ್ಲಿ ಇಲ್ಲಿ ಸುತ್ತಾಡಿ ಬೇಕಿದ್ದು ಸಿಗದೆ ನಿರಾಶರಾಗಿದ್ದೀರಾ ? ಇನ್ನು ಚಿಂತೆಬೇಡ. ಎಲ್ಲ ಬಗೆಯ ಓದುಗರ ಅಭಿರುಚಿ ಗಮನದಲ್ಲಿಟ್ಟ ದೊಡ್ಡದೊಂದು ಪುಸ್ತಕ ಮೇಳ ಸದ್ಯದಲ್ಲೇ ಬೆಂಗಳೂರಿನಲ್ಲಿ ಏರ್ಪಾಟಾಗುತ್ತಿದೆ. ಪುಸ್ತಕ ಪ್ರಾಧಿಕಾರ ಹತ್ತು ದಿನಗಳ ಈ ಪುಸ್ತಕ ಮೇಳವನ್ನು ವ್ಯವಸ್ಥೆ ಮಾಡುತ್ತಿದೆ.

ಫೆಬ್ರವರಿ 25ರಿಂದ ಮಾರ್ಚ್‌ 6ರವರೆಗೆ ರಾಜ್ಯ ಮಟ್ಟದ ಕನ್ನಡ ಪುಸ್ತಕ ಮೇಳ ನಡೆಯಲಿದ್ದು, ರಾಜ್ಯದ ಹಳ್ಳಿ, ಜಿಲ್ಲೆ, ತಾಲ್ಲೂಕುಗಳಲ್ಲಿರುವ ಪುಸ್ತಕ ಪ್ರಕಾಶಕರು ತಮ್ಮ ಪುಟ್ಟ ಟೆಂಟಿನ ಮಳಿಗೆಯಲ್ಲಿ ಪುಸ್ತಕ ರಾಶಿಯನ್ನು ಬಿಡಿಸಿಡಲಿದ್ದಾರೆ. ಪುಸ್ತಕ ಪ್ರಿಯರು ಮತ್ತು ರಾಜ್ಯದ ಪುಸ್ತಕ ಮಾರಾಟಗಾರರು ಪುಸ್ತಕ ಮೇಳದಲ್ಲಿ ಸೇರಲಿದ್ದಾರೆ.

ಮಳಿಗೆಗಳನ್ನು ತೆರೆಯಲು ಇಚ್ಚಿಸುವ ಪುಸ್ತಕ ವ್ಯಾಪಾರಿಗಳಿಗೆ ಪ್ರಾಧಿಕಾರವು ಒಂದು ಮಳಿಗೆಯನ್ನು ಉಚಿತವಾಗಿ ನೀಡುತ್ತದೆ. ಅಲ್ಲದೆ ಈ ಮೇಳದಲ್ಲಿ ಎಲ್ಲ ರೀತಿಯ ಪುಸ್ತಕಗಳ ಮಾರಾಟಕ್ಕೂ ಅವಕಾಶವಿದೆ. ಇದಕ್ಕೆ ಸಂಬಂಧಿಸಿದಂತೆ ಪ್ರಕಾಶಕರು, ಫೆಬ್ರವರಿ 5ರಿಂದ ಪ್ರಾಧಿಕಾರದ ಕಚೇರಿಯಲ್ಲಿ ಸಿಗುವ ಉಚಿತ ಅರ್ಜಿಯನ್ನು ಭರ್ತಿ ಮಾಡಿ ಫೆ. 15ರೊಳಗೆ ಸಲ್ಲಿಸಬೇಕು. ರಾಜ್ಯದ ಇತರ ಜಿಲ್ಲೆಯವರಾದರೆ, ಆಯಾ ಜಿಲ್ಲೆಯ ಕನ್ನಡ ಸಂಸ್ಕೃತಿ ಇಲಾಖೆಯ ಸಹಾಯ ನಿರ್ದೇಶಕರ ಕಚೇರಿಯಲ್ಲಿ ಅರ್ಜಿ ಪಡೆದುಕೊಳ್ಳಬಹುದು.

ಹೆಚ್ಚಿನ ವಿವರಗಳಿಗೆ ಈ ವಿಳಾಸವನ್ನು ಸಂಪರ್ಕಿಸಬಹುದು - ಆಡಳಿತಾಧಿಕಾರಿ, ಕನ್ನಡ ಪುಸ್ತಕ ಪ್ರಾಧಿಕಾರ, ಪಂಪ ಮಹಾಕವಿ ರಸ್ತೆ, ಚಾಮರಾಜ ಪೇಟೆ, ಬೆಂಗಳೂರು-18 ; ಫೋನ್‌ : 080-6674138, 6603812 -

(ಇನ್ಫೋ ವಾರ್ತೆ)